VOV4.Jarai-Khul mut phung djop anom bruă kơnuk kơna hăng anom bruă sĭ mơdrô tơring čar Dak Nông phrâo jao glăi ring bruă “Apui bơngač jơlan plơi pla” kơ mơnuih ƀôn sang hăng gong gai să Trường Xuân, tơring glông Dak Song.

Hlăk ai anom bruă apui lơtrik dưm truă pul apui lơtrik bơngač jơlan plơi

Ring bruă hơmâo 40 boh pul apui pơkĕ hăng pil pơ-iă yang hrơi, bơngač dua arăt jơlan plơi N’Jang hăng plơi Ding Plei să Trường Xuân, hrĕ apui abih bang glông 2 km. Ring bruă anai, rơnoh prăk abih tih 60 klăk prăk yua hlăk ai tơdăm dra mut phung djop sang bruă kơnuk kơna, anom bruă sĭ mơdrô amăng tơring čar pơčruh; hlăk ai anom bruă apui lơtrik Dak Nông gum hrom. Hơdôm arăt jơlan dua boh plơi dưi hơmâo apui bơngač amăng mơmŏt mlam djru hrom bruă pơgang tơlơi rơnuk rơnua amăng plơi pla, ngă gêh găl pioh kơ mơnuih ƀôn sang rô nao rai amuñ hloh.

Hlăk ai mut phung jai glăi ring bruă apui bơngač jơlan plơi pla ƀơi să Trường Xuân

Ring bruă “Apui bơngač jơlan plơi pla” ăt sa ring bruă pơdah rai pran jua kơsung nao pơ anăp, pơyơr pran jua yua kơ tơlơi hơdip mơda mơnuih ƀôn sang amăng plơi pla mơ̆ng hlăk ai tơring čar Dak Nông gum hrom djru man pơdong plơi pla phrâo.

Nay Jek: Pơblang