Tui hăng Gơnong bruă čar tơring čar Dak Nông, thun hrăm 2023-2024 đơ đam tơring čar kơƀah 1021 čô nai pơtô ruah tui phiăn pơkă phun, amăng anun, gưl čơđai anet kơƀah 235 čô nai, gưl sa kơƀah 324 čô nai, gưl 2 kơƀah 260 čô nai hăng gưl 3 kơƀah 202 čô nai. Tơlơi kơƀah nai pơtô čơđai hmâo bơdjơ̆ nao prong biă hăng bruă pơtô pơhrăm, biă ñu ƀơi kual asuek, ataih, kual djuai ania ƀiă.

Kiăng pơsir jăng jai tơlơi kơƀah nai pơtô anai, Jơnum min mơnuih ƀôn sang tơring čar Dak Nông phrâo lăi pơthâo hăng Khul pơ ala mơnuih ƀôn sang tơring čar pel ĕp hluai tui 622 hră pơkôl kơ nai pơtô, hrơi kĭ pơkôl lĕ 12 blan. Yă Nguyễn Thị Thu Hường, Khua Gơnong bruă čar tơring čar Dak Nông brơi thâo, khă kơƀah rơbêh sa rơbâo čô nai pơtô samơ̆ kơnong kơ pơphô brơi kĭ pơkôl 622 pok hră pơkôl lĕ ngă tui Tơlơi pơtrun pơsit 111 thun 2022 mơ̆ng Gong gai. Gah sui thun, tơring čar amra rơkâo đĭ hăng kơnuk kơna pioh pơhrua nao mơnuih pơtô tui phiăn pơkă kơ gơnong bruă pơtô pơhrăm ƀơi tơring čar, pơhlôm mrô tui tơlơi pơkă./.