VOV4.Jarai-Amăng 5 blan akŏ thun 2022, ƀơi tơring čar Dak Nông ƀuh hăng pơsir 434 wơ̆t tơlơi ngă soh mă yua apui lơtrik, amăng anun 9 wơ̆t ngă soh pơkĕ apui lơtrik. Rơnoh apui lơtrik brơi duh glăi giăm 250 klăk prăk. Ră anai, djop anom bruă apui lơtrik ƀơi Dak Nông hlăk ngă hrom lu anom bruă kơnuk kơna hyu sem lăng, pel ĕp bruă yua apui lơtrik mơ̆ng mơnuih ƀôn sang.

Ƀing ngă bruă gah apui lơtrik nao ĕp ra se apui lơtrik mơnuih ƀôn sang mă yua

Anom bruă apui lơtrik ăt ngă tui na nao bruă krăo lăng amăng plang internet, kiăng tañ ƀuh hăng pơsir mơtam anŏ phara amăng bruă pơkĕ apui lơtrik, djru kơ mơnuih ƀôn sang khom sem lăng na nao bruă yua apui lơtrik. Mơ̆ng anun, pơphun bưp hăng pơblang rơđah kơ mơnuih yua apui lơtrik thâo yua hơgĕt apui yua lu đơi, đah mơ̆ng tañ pơsir hĭ anŏ ngă huač apui lơtrik tơdah hơmâo, kiăng pơhlôm tơlơi rơnuk rơnua, yua apui thâo pơkrem, tŭ yua.

Nay Jek: Pơblang