VOV4.Jarai - Tơring čar Daklak glăk pok pơhai hơdôm rơwang bruă, ring bruă phun hăng tơlơi kiăng lŏn bư̆ lŏp truh ha klăk mĕt khô̆i lŏn. Tui anun mơn, hmâo sa tơlơi kơđai glăi lĕ đơ đam tơring čar akă hmâo lŏn hơpă dưi pơsit brơi ôh. Anô̆ pioh glăi ƀu klă lĕ lu rơwang bruă, ring bruă phun amra kaih hĭ rơnoh man pơdŏng yua kơ kơƀah lŏn.

Rơwang bruă Jơlan Hồ Chí Minh jơlan bĕ gah ngŏ Buôn Ma Thuột hmâo rơwang ataih giăm truh 40 rơwang km, abih bang prăk yua man pơkra rơbêh kơ 1.500 klai prăk, yua kơ Grŭp wai lăng rơwang bruă tuh pơplai man pơkra jơlan nao rai hăng đang hmua pơđĭ kyar ƀôn lan tơring čar Daklak ngă pô tuh pơplai. Rơwang bruă pơphun pok pơhai man pơkra amăng akô̆ thun anai hăng tui kơčăo bruă amra giong amăng thun 2023. Bruă pok pơhai man pơkra glăk bưp sa dua mơta tơlơi tơnap, tơlơi gun, biă ñu lŏn pioh pơkra jơlan. Ơi Hoàng Đình Chương, Khua Sang bruă An Nguyên, gơgrong man pơkra sa črăn hăng anung prăk mrô 4 mơng rơwang bruă abih bang jơlan ataih 10 km brơi thâo, ră anai glăk kơƀah 200.000 met khô̆i lŏn dor lop, ngă bơdjơ̆ nao rơnoh bruă mă pơkra. Tui hăng ơi Chương, bruă gơgrong lĕ gah pô tuh pơplai hăng anai lĕ tơlơi tơnap pơsir lơm akă hmâo lŏn pioh man pơkra:

“Amăng hơdră dăp lĕ 1 klăk met khô̆i lŏn samơ̆ glăk kơƀah 200.000 met khô̆i lŏn lĕ ƀu hmâo anih pioh mă lŏn. Amăng anun lĕ dŏng amăng anung prăk mrô 4 mơng Sang bruă An Nguyên, ră anai khom ĕp hmâo 200.000 met khô̆i lŏn mơng hơpă. Pô gơgrong tuh pơplai brơi thâo akă ĕp hmâo lŏn mơng hơpă ôh”.

Rơwang bruă Jơlan Hồ Chí Minh jơlan bĕ gah Ngŏ Buôn Ma Thuột glăk pok pơhai samơ̆ kơƀah lŏn dor lŏp, bư̆ ƀôr

Kơƀah lŏn yua dor lŏp, bư̆ bôr ăt lĕ tơlơi glăk hmâo ƀơi lu rơwang bruă phun pơ̆ tơring čar Daklak kah hăng rơwang bruă dơnao Ea Tam, hăng rơnoh mă yua năng ai ñu 1.500 klai prăk hăng rơwang bruă Jơlan Ngŏ – Yŭ, abih bang prăk mă yua rơbêh kơ 1.200 klai prăk yua kơ Grŭp wai lăng rơwang bruă plơi prong Buôn Ma Thuột ngă pô pơ ala kơ pô tuh pơplai. Ơi Lê Khắc Đô, Khua Anom bruă wai lăng lŏn čuah, Gơnong bruă wai lăng rơhuông adai lŏn mơnai tơring čar Daklak brơi thâo, tal hlâo adih lŏn dor lŏp, bư̆ bôr akă hmâo đing nao ôh, anun ba truh amăng hơdôm tơlơi pơkă hơđăp đơ đam tơring čar ƀu hmâo anih pioh mă lŏn hơpă ôh. Bruă mă yua lŏn biă ñu mă mơng hơdôm rơwang bruă, ring bruă pơkon ƀudah mơng tal gôm mơng hơdôm anih mă bôh pơtâo, samơ̆ mrô lŏn ƀu djop kơ hơdôm ring bruă, rơwang bruă glăk pok pơhai kah hăng ră anai ôh.

Kiăng pơtlaih tơnap lŏn mă yua kơ hơdôm ring bruă, rơwang bruă, blan 2/2022 Gơnong bruă đang hmua hăng pơđĭ kyar ƀôn lan tơring čar hmâo pơphô brơi laih kơ Jơnum min mơnuih ƀôn sang tơring čar Daklak pơsit pơkă kual lŏn čuah, lăi pơthâo 59 bôh anih mă lŏn hăng mrô him lăng hmâo năng ai ñu 20 klăk met khô̆i, phun ñu djop brơi kơ hơdôm rơwang bruă, ring bruă. Khă hnun hai, rơwang hrơi pơkă kiăng pơsit mă yua sa dua anih anom mă lŏn bôh pơtâo kiăng mơng 7 truh kơ 8 blan, sa dua rơwang bruă amra kaih rơnoh bruă man pơkra. Ơi Lê Khắc Đô ăt pơblang mơn, hăng hơdôm rơwang bruă kơƀah lŏn dor lŏp, bư̆ bôr  lăi ha jăn, kơƀah gơnam man pơkra lăi hrom, hmâo bruă gơgrong mơng pô tuh pơplai hăng anom lăi pơthâo hơdră dăp man pơkra:

“Bruă gơgrong mơng gơñu lĕ khom nao pel ĕp ruah gơnam man pơkra. Phiăn pơkă pơjing rơwang bruă tuh pơplai pơdŏng ring bruă tơlơi dưm kơnar klơi bư̆ lĕ ih khom pơsit anih anom tuh djah tơdah kah hăng gơnam mă yua amăng rơwang bruă rơbêh, bơ̆ tơdah kơƀah lĕ ih khom pơsit anih mă yua gơnam. Anom bruă pel ĕp dăp hơdră khom ruah hơdôm anih anom mă yua djơ̆ kơ rơwang bruă, tơdơi kơ anun kah mơng ba tơbiă hơdôm jơlan pơsir. Anun lĕ lơm pơjing rơwang bruă tuh pơplai gơñu khom ngă hơdôm yak anun laih, mơng prăk pioh yua truh kơ rơwang bruă dưi ngă, rơwang bruă khom hmâo 3 yak”.

Bơ̆ bruă pơkon dong, ơi Trần Đình Nhuận, Khua Gơnong bruă kông ngăn dlai tlô hăng rơhuông adai lŏn mơnai tơring čar Daklak brơi thâo, tơlơi gun lơm mă lŏn kơ hơdôm ring bruă, rơwang bruă dô̆ yua kơ ƀu gal mơng hơdră pơkă, hơdră bruă. Tui hăng tơlơi phiăn lŏn drŏn, hăng lŏn bôh pơtâo juăt ñu kah hăng lŏn lĕ khom hmâo tơlơi pơkôl nao rai. Samơ̆ bruă anom bơwih ƀong nao pơkôl hăng mơnuih ƀôn sang ƀu jing yua kơ nua ñu lu đơi, hmâo anih đa đĭ truh hơdôm pluh klai prăk sa ektar, ƀu dưi ngă tui ôh. Hăng hơdôm rơwang bruă phun mơng lŏn ia, Khua pơ ala mơnuih ƀôn sang, Gong gai dêh čar hmâo Tơlơi pơtrun pơsit pha ra kiăng pơtlaih anô̆ gun, samơ̆ hăng hơdôm ring bruă ƀơi tơring čar lĕ tơnap biă:

“Tui rơwang pơkă mrô 3, Mơta tơlơi mrô 62 Tơlơi phiăn lŏn drŏn lĕ Kơnuk kơna pơhrui mă lŏn čuah bôh pơtâo, samơ̆ gah lui gơnam juăt yua tơđar, anun lĕ lŏn dor lŏp, bư̆ bôr, čuah, bôh pơtâo, hơdră pơkă khom hmâo tơlơi pơkôl dua bơnah. Amăng tơlơi anai, tơdah Kơnuk kơna mă lŏn kiăng pơsit hră hyu hơduah ĕp kiăng tuh pơplai bruă hrom lĕ dong mơng bruă prăp lui tuh pơplai khom pơsit anun lĕ hơdră dăp mơng ring bruă tuh pơplai bruă hrom anun kah mơng hmâo gru than djơ̆ phiăn mă pơhrui. Ƀơi hơdôm rơwang bruă gah gưl tơring čar, gưl tơring glông lĕ tơnap biă”.

Bruă kơƀah lŏn dor lŏp, bư̆ bôr glăk ngă lu rơwang bruă, ring bruă phun ƀơi Daklak amra kaih rơnoh bruă man pơkra. Hrom hăng hơdôm tơlơi akă gal amăng bruă pơkă kual, pel ĕp, pơjing rơwang bruă, hmâo bruă gơgrong mơng pô tuh pơplai hăng hơdôm anom bruă bơdjơ̆ nao lĕ, bruă mă yua lŏn kơ hơdôm ring bruă, rơwang bruă ăt glăk bưp tơlơi gun kiăng pơtlaih mơtăm mơn mơng hơdră pơkă hơdră gum djru gah lŏn drŏn, lŏn, čuah, bôh pơtâo./.

Công Bắc: Čih – Siu H’ Prăk: Pơblang