VOV4.Jarai - Dong mơng akô̆ thun 2022 truh ră anai, Anom bơwih kơ bruă mă, Gơnong bruă wai lăng mơnuih mă bruă, tơhan rơka ruă hăng mơnuih mơnam tơring čar Daklak hmâo pơsir prăk djru gah hră pơgang rơngiă bruă mă hăng 8.640 pok hră pơ-ar, đĭ 43,8% bơhmu hăng thun 2021. Tui Anom bơwih brơi bruă mă tơring čar Daklak, amăng mrô 8.600 pok hră pơ-ar rơkâo pơsir prăk djru mơnuih rơngiă bruă mă, hmâo rơbêh kơ 5.700 čô mơnuih mă bruă ƀơi hơdôm bôh tơring čar pơkon, rơbêh kơ 2.800 čô mơnuih ƀơi tơring čar, abih bang prăk tla  tui hră djru mơnuih rơngiă bruă mă lĕ 132 klai prăk.

Hrom hăng anun Anom hmâo djru laih pơtô bruă mă kơ 310 čô mơnuih glăk čơkă mă hơdră djru tui hră pơgang rơngiă bruă mă hăng mrô prăk djru 1 klai 900 klăk prăk. Tui ơi Trần Xuân Đa, Kơ-iăng Khua Anom, kiăng djru mơnuih rơngiă bruă mă tañ hmâo mă prăk djru, amăng 3 blan rơnuč thun Anom amra đĭ dong mrô mơnuih mă bruă kơ Anom bơwih brơi hră pơ-ar ƀơi plơi prong Buôn Hồ, tơring glông Ea Kar hăng ƀơi Anom kiăng tŭ mă dong, pơsir prăk djru tui hră pơgang rơngiă bruă mă kiăng pơhlôm jơlan gah 3 djơ̆: djơ̆ mơnuih, djơ̆ hơdră djru hăng djơ̆ hrơi blan./.

Siu H’ Prăk: Pơblang