Amăng krah ring bruă Rơwang bruă Tơdron lak kual krah plơi prong Gia Nghĩa, hơdôm pluh bôh rơdêh mă yua glăk klơi bư̆, čuk ngă dưm dơ̆. Ơi Trương Công Tiến, Khua git gai ring bruă dơnao ia Gia Nghĩa, Sang bruă pơčruh hrom man pơdŏng Phú Hiển Vinh, brơi thâo, anom glăk hơneč mă ayuh hyiăng phang khôt kiăng pơtrut tañ bruă man pơkra:

 “Ră anai hmâo yak truh bơyan phang laih, anom man pơkra ƀing gơmơi pơkĕ hăng pô tuh pơplai amra đing nao măi mok mơnuih mă bruă kiăng pơtrut tañ rơnoh man pơkra, pơhlôm truh abih lơ 31/12/2022 amra ngă giong bruă pơkă anih anom pla bơnga kyâu hăng hơdôm bruă čuk bư̆ dô̆ glăi”.

Ơi Hồ Sỹ Điệp, Kơ-iăng Khua Grŭp wai lăng rơwang bruă tuh pơplai man pơdŏng tơring čar Daknông brơi thâo, Rơwang bruă tơdron lak kual krak plơi prong Gia Nghĩa hmâo abih bang rơnoh tuh pơplai 400 klai prăk, rơwang ngă tui mơng thun 2022-2025. Prăk pơpha thun 2022 lĕ 54 klai prăk. Khă anai lĕ ring bruă phun mơng tơring čar samơ̆ bưp lu tơlơi tơnap biă mơng bruă mă yua pơkra truh pơsit hơdră dăp man pơkra, pơpha prăk mă yua... Ră anai phun ñu hơdôm anô̆ gun dưi pơtlaih laih djru kơ bruă man pơkra:

 “Grŭp hmâo mă bruă pơtrut anom bruă lăi pơthâo pơtrut tañ rơnoh bruă. Bơ̆ bruă pơsir lŏn mă yua man pơkra lĕ ră anai phun ñu ngă giong jao laih kơ pô tuh pơplai kiăng truh lơ 15/11 amra pok pơhai man pơkra”.

Thun 2022 abih bang prăk tuh pơplai bruă hrom mơng tơring čar Daknông lĕ rơbêh kơ 2.783 klai prăk. Yap truh rơnuč blan 10, tơring čar phrâo pơsir năng ai ñu 50% kơčăo bruă. Bôh than kaih lĕ yua kơ lom ngă tui hơdôm rơwang bruă hră pơ-ar ngă sui hrơi hăng ngă gun lom pơsir lŏn man pơkra. Ơi Lê Văn Chiến, Kơ-iăng Khua Jơnum min mơnuih ƀôn sang tơring čar Daknông, brơi thâo, pơtrut rơnoh pơsir prăk, tơring čar hmâo pơplih laih ngăn rơnoh hơdôm rơwang bruă ƀu dưi ngă giong hơdai nao hơdôm rơwang bruă hmâo ngă tui giong laih; pơtrut hơdôm pô tuh pơplai, hơdôm mơnuih gơgrong man pơkra amăng hơdôm blan bơyan phang; hăng khom pơtlaih mơtăm hơdôm tơlơi gun amăng bruă pơsir prăk mă yua lŏn. Daknông pơkôl amra pơsir hmâo rơbêh lơ 95% kơčăo bruă prăk dưi jao.

 “Thun anai Daknông pơphun phrâo ring bruă lu biă, hơdôm ring bruă hmâo prăk prong biă, hmâo giăm truh ha mơkrah mrô prăk tuh pơplai hrom mơng sa thun. Hơdôm ring bruă anai kiăng hmâo hrơi pơkă pioh prăp lui tuh pơplai lĕ, truh mông anai abih bang hơdôm ring bruă glăk juă nua, hăng amra pơsir prăk amăng blan 11, blan 12. Lom hơdôm ring bruă anai mơ̆ juă nua giong thơ rơnoh pơsir prăk amra đĭ lu biă. Hăng ƀing gơmơi pơkôl hăng Gong gai dêh čar lĕ thun anai amra pơsir prăk rơbêh kơ 95% mrô prăk tuh pơplai bruă hrom”./.