Ơi Nguyễn Văn Nam, Kơ-iăng Khua Gơnong bruă man pơdŏng tơring čar Daknông brơi thâo, truh kơ ră anai, ƀơi tơring čar phrâo pok pơhai mă sa rơwang bruă sang dô̆ mơnuih mơnam hmâo hơdră pơkă giăm truh 18.000 m2, amăng anun hmâo 127 bôh sang. Rơwang bruă anai pok pơhai ƀơi phường Nghĩa Tân, plơi prong Gia Nghĩa, hmâo abih bang prăk tuh pơplai 139 klai prăk.

Tơdơi kơ 7 thun, Kơnuk kơna hmâo Tơlơi pơtrun pơkă 100 kơ pơđĭ kyar hăng wai lăng sang dô̆ mơnuih mơnam, ƀơi Daknông phrâo pok pơhai ƀah wư sa rơwang bruă

Tơdơi kơ 5 thun pok pơhai, 3 wot pơplih pơkra tơlơi pơsit hơdră pơtrun tuh pơplai, pơplih pô tuh pơplai hăng pơđĭ tui rơnoh tuh pơplai truh 162 klai prăk, rơwang bruă phrâo giong hmâo 16 bôh sang, 28 bôh sang pơkon glăk pơdŏng ƀah wư. Đa lĕ, lơm pok pơhai rơwang bruă blung a truh kơ ră anai dô̆ hmâo mơn lu tơlơi akă gal, ngă soh hăng glăk dưi pel ĕp pơđut rơwang bruă. Pơsit abih bang, ơi Nam lăi lĕ bruă pơđĭ kyar sang dô̆ mơnuih mơnam ƀơi tơring čar ră anai tơnap tap biă. Sa črăn yua kơ tơring čar dô̆ ƀun rin, akă hmâo tơlơi gal yua ngăn drăp kơnuk kơna pioh pok pơhai djru hơdôm anom bơwih ƀong pok pơhai ngă tui hơdôm rơwang bruă. Črăn pơkon lĕ, ƀing tuh pơplai mơnuih ƀôn sang akă đing nao lu truh bruă anai ƀơi tơring čar yua kơ hơdôm kual sang măi akă pơđĭ kyar, tơlơi kiăng sang dô̆ mơnuih mơnam dô̆ ƀiă./.