Yap truh abih 3 blan tal sa thun 2025, đơ đam tơring čar Dak Nông hmâo 70.671 bôh sang anô̆ glăk čan prăk ƀơi Sang prăk gah hơdră bruă, hăng abih bang mrô prăk giăm truh 4.800 klai prăk. Amăng anun, rơbêh kơ 24.000 bôh sang anô̆ lĕ djuai ania ƀiă, hăng mrô prăk rơbêh kơ 1.655 klai prăk. Abih bang hơdôm bôh sang anô̆ leng kơ mă yua ba glăi bôh tơhnal. Sang anô̆ ơi K’Biêng ƀơi ƀôn Phai Kol Pruđăng, să Dak Nia, plơi prong Gia Nghĩa, hmâo 2 ektar lŏn. Sang anô̆ dưi čan 90 klăk prăk mơ̆ng Sang prăk gah hơdră bruă pioh yua ngă đang kơphê hăng tiu ba glăi bôh tơhnal prong.

“Thun anai pơhrui mơ̆ng kơphê năng ai ñu 2,5-3 tơn asar kơphê krô, wot hăng tiu dong. Sĭ ăt hmâo mơn 200-250 klăk prăk sa thun. Abih bang leng kơ kơnang kơ ngăn drăp čan yua ngă đang hmua mơ̆ng sang prăk gah hơdră bruă lu thun hlâo. Phrâo anai kâo dô̆ čan dong 12 klăk prăk pioh khoer ia bơmun, blơi kơthung dưm ia, kơnang kơ anun hmâo ia hơdjă pơhlôm, tơlơi suaih pral abih bang mơnuih amăng sang pơhlôm”.

Truh ră anai, abih tih prăk brơi čan mơng sang bruă prăk djru mơnuih mơnam tơring čar Gia Lai lĕ 7.631 klai prăk, đĭ 153 klai prăk pơhmu hăng akŏ thun, amăng anun ngăn drăp ƀon lan 598 klai prăk. Ƀing apăn bruă djru čan prăk hơmâo gum hrŏm kjăp hăng ƀing apăn bruă amăng hơdôm grup kơđi čar-mơnuih mơnam, hăng bruă pơlir grup pơčrem hăng čan prăk amăng plơi pla. Yua anun, djop sang anŏ brơi čan prăk lêng kơ mă yua lăp djơ̆. Tha plơi Ksor Biếc dŏ amăng plơi Rơng, să Pờ Tó, tơring glông Ia Pa brơi thâo.

“Hlâo adih kâo čan prăk mơng sang bruă prăk kiăng kơ blơi rơmô, kâo čan 30 klăk prăk, tơdơi anun blơi 3 drơi rơmô. Tơdơi kơ 5 thun kâo sĭ rơmô, mă prăk anun tla glăi sang bruă prăk, kâo tla abih laih. Ră anai đing nao pơđĭ kyar bơwih ƀong amăng sang anŏ đôč”./.