Tơring čar Lâm Đồng tơdơi kơ pơmut hrŏm hơmâo 5 boh să ƀơi tơring hơmâo guai dêh čar kah hăng Quảng Trực, Tuy Đức, Thuận Hạnh, Thuận An, Dak Wil, jĕ giăm sô̆ hăng guai hăng dêh čar pơtao Kur. Klâo boh sang hră đôm lăm, kơnuk kơna čem rông dưi pơphun man pơdong ƀơi să Dak Wil, Thuận Hạnh, Tuy Đức hăng rơnoh prăk tuh pơ alin 657 klai. Sang hră boh prong ñu, man pơdong hnơ̆ng pơkă mrô III, hơmâo sang dlông tal, mơ̆ng 1 tal truh 3 tal. Thun blan man pơdong mơ̆ng blan 3/2026 truh abih blan 8/2027 khom giong. Laih man giong sang hră, sit ba yua lĕ, hơdôm sang hră anai amra čơkă rơbêh 4.150 čô čơđai sang hră gưl sa truh pơ gưl dua nao hrăm, jing ană bă, ană tơčô mơnuih djuai ƀiă mut hrăm.

Ƀơi să Dak Wil, ơi Hồ Văn Mười, Khua Jơnum min mơnuih ƀôn sang tơring čar Lâm Đồng pơtrun hiăp, khua anom bruă tuh pơ alin prăk kăk, khua sang bruă tŭ mă bruă apah man pơdong khom ƀuăn ngă djơ̆ hrơi blan pơkă; djop gơnong bruă, anom bruă kơnuk kơna tơring čar iâu pơmut djop nai pơtô, laih dơ̆ng čih anăn djop mrô čơđai sang hră mut hrăm. Ơi Hồ Văn Mười lăi.

“Rơkâo khua anom bruă tuh pơ alin, hơdôm sang bruă apah man pơdong khom ngă hrŏm tong ten, čih rek gru rup, hơbô̆ man pơdong sang hră, ngă hiư̆m pă man pơdong djơ̆ hrơi blan pơkă, bruă jao tŭ yua kơjăp jing bruă khom đing nao mrô sa. Gơnong bruă Pơtô hăng Pơjuăt, ƀing apăn bruă ngă khua djop anom bruă ăt khom jŭ yap rơđah, ĕp glăi djop mrô nai pơtô; djop tơhnal pơkă kơ bruă mă, gơnam yua amăng sang hră brơi djop; kah hăng bruă pơtô hrăm bơkơjăp drơi jăn, adoh suang….Ngă hiư̆m pă anai amra jing anih pơtô hrăm djơ̆ tơhnal pơkă phun”.

Dak Wil lĕ pơmut mơ̆ng dua boh să Ea Pô hăng Dak Wil, gah tơring glông Čư̆ Jŭt, tơring čar Dak Nông hơđăp. Bruă ping gah, kơnuk kơna ding nao tuh pơ alin čuk pơkra jơlan, man pơdong sang hră pơtô hrăm kiăng pơđĭ tui tơlơi thâo thăi kơ mơnuih ƀôn sang, djru hrŏm pơđĭ kyar tơlơi bơwih ƀong huă-mơnuih mơnam. Biă mă ñu, ƀing čơđai sang hră, sang hră kơnuk kơna čem rông dua gưl lĕ sa tơlơi čang rơmang prong, kiăng hơmâo anih dŏ, mơnong ƀong  huă, sang hră hrăm hơđong kơ čơđai dưi hrăm hăng prô̆ tơdăm prăm dra ƀa tơsâo lăp djơ̆. Adơi Nguyễn Trần Gia Linh, čơđai sang hră anih 5, jing 1 amăng 10 čô čơđai sang hră hrăm thâo găn rơgao mă tơlơi tơnap sang anŏ ƀơi să Dak Wil, hơ̆k mơak dưi tŭ mă prăk apah hrăm hră lơ̆m jơnum tơgŭ man pơdong sang hră đôm lăm dua gưl să Dak Wil, tơring čar Lâm Đồng, ñu lăi:

“Hrơi anai dưi truh pơ anai, kâo pơ-ư ang biă mă amăng  pran jua yua hơmâo tŭ mă tơlơi djru prăk hrăm hră. Thun pơ anăp đĭ anih 6, kâo amra dưi hrăm amăng sang hră phrâo hiam, hơmâo djop gơnam yua gêh găl. Sang hră hơmâo anih dŏ, anih huă ƀong, anih pit jing anih hrăm hră tŭ yua biă mă hăng ƀing gơmơi. Kâo gir run hrăm hră, pơtop pran jua drơi jăn klă hloh kiăng ƀing nai pơtô huăi rơngôt, huăi ngă kơ amĭ ama bơngơ̆t, huăi lui soh kông ngăn khua mua ping gah, gong gai kơnuk kơna hơmâo tuh pơ alin laih”.

Ƀơi să Ea Ƀung, tơring čar Dak Lak hơmâo ngă yang lŏn, tơgŭ ngă bruă man pơdong sang hră đôm lăm dua gưl, gưl sa hăng gưl dua Ea Ƀung. Ring bruă man pơdong tuh pơ alin truh 250 klai prăk mơ̆ng gơnong dlông hăng tơring čar djru, man pơdong ƀơi anih lŏn rơhaih 6 hektar plơi thôn 1. Laih ngă giong, sang hră anai dưi djop brơi 1.300 čô čơđai mut hrăm, jing čơđai djop djuai ania ƀiă ƀơi guai dêh čar. Ơi Phạm Thuỷ Tiên, Khua jơnum min pơ ala mơnuih ƀôn sang să Ea Ƀung brơi thâo, să Ea Ƀung dưi akŏ pơdong mơ̆ng dua boh să pơmut hrŏm Ea Ƀung hăng Ia Tơmôt, lŏn prong rơhaih, mơnuih ƀôn sang hui, bruă rô nao rai mơ̆ng čơđai sang hră ataih biă mă, boh nik ñu amăng bơyan hơjan, gleh glar biă mă. Bruă tuh pơ alin man pơdong sang hră đôm lăm dua gưl anai, amra djru pơblih kơtang biă mă kơ bruă pơtô hrăm ƀơi kual guai dêh čar.

“Jơlan hơdră mơ̆ng ping gah hăng kơnuk kơna tuh pơ alin kơ să Ea Ƀung sang hră anai, mơnuih ƀôn sang ƀuh mơak biă mă. Hơmâo sang hră anai mơta sa ană amôn dưi hrăm gưl sa hăng gưl dua kơnuk kơna čem rông ba laih, tơlơi rô nao rai huăi tơnap laih anun sang anŏ huăi rơngiă prăk kăk tuh rơyuh kơ ană bă hrăm hră, kiăng ană bă hơmâo anih hrăm klă hloh. Gơmơi đăo kơnang ƀing ană bă ƀơi kual guai dêh čar anai, kơñ pơgi dưi hrăm hră tŭ yua, dưi pơtô hrăm djơ̆ lăp, anăp nao kơñ pơgi akŏ pơdong guai dêh čar lŏn ia kơjăp tong ten”.

Quảng Ngãi lĕ sa amăng 17 boh tơring čar hơmâo jơlan guai dêh čar glông ataih hloh ƀơi kơdư hang, ăt pơphun ha amăng plĕ ngă yang lŏn tơgŭ man podong sang hră đôm lăm. 5 kơčăo bruă man pơdong sang hră đôm lăm dua gưl hơmâo pơphun ƀơi hơdôm să Bơ Y, Ia Tơi, Ia Đal, Đak Long, Đak Plô, tơring čar Quảng Ngãi, rơnoh prăk tuh pơ alin 1.116 klai. Rim boh sang hră dưi man pơdong ƀơi lŏn rơhaih 5 hektar, hnơ̆ng prong sang hră dưi djop mơ̆ng 700-1.600 čô čơđai sang hră, djơ̆ găl hăng rim kual. Sang hră dua gưl, gưl sa hăng gưl dua, lir hơbit ba glăi boh tŭ yua hrăm hră, plai ƀiă pơdong sang hră raih daih taih ha bit, pơjing anih pơdong sang hră sa ƀut. Yă Y Ngok, Kơ-iăng khua Jơnum min mơnuih ƀôn sang tơring čar Quảng Ngãi, brơi thâo, bruă man pơdong sang hră anai amra djru hrŏm pơđĭ tui boh tŭ yua klă hloh ƀơi kual giăm guai dêh čar lŏn kơdư hang:

“Lơ̆m ngă giong hơdôm sang hră anai, jing sang hră đôm lăm kơnuk kơna čem rông čơđai sang hră djuai ania ƀiă gưl sa hăng gưl dua să Bơ Y hăng hơdôm să ieo gah, pơphun man pơdong mơ̆ng mông anai, amra jing khul sang hră anih pơtô hrăm ba gru hlâo, anih rông pioh tơlơi čang rơmang, rŭ pơdong đĭ tơlơi kiăng hrăm hră hăng pơyơr pran jua kơ hơdôm rơnuk čơđai sang hră ƀơi guai dêh čar, djru hrŏm pơtô hrăm mơnuih mă bruă pioh pơđĭ kyar kual plơi pla, amăng tơring čar”.