Amăng anun, hơmâo giăm 1.500 boh sang anŏ hơmâo man pơdong sang phrâo hăng 440 boh sang anŏ hơmâo pơkra glăi. Tui anun, truh mông anai, tơring čar Kon Tum hơmâo 2/3 kơčăo bruă lŏm lui sang dŏ tơ̆I, sang phô̆. Tơring čar glăk pơƀut ngă bruă kiăng truh abih blan 6 amra dưi lŏm abih 824 boh sang dŏ tơ̆i sang phô̆ dŏ glăi. Kon Tum hơmâo ngă lu hơdră lui hĭ tơlơi pơmin tơguan, kơnang kơ tơlơi gum djru; bruă pơtâo čuah gơnam pioh man pơkra sang kơƀah hăng pơmă; kơƀah mơnuih mă bruă yua mơnuih ƀôn sang glăk pơƀut ngă hmua pla pơjing.

Lơ 11/4, kông ti TNHH sa ding kơna mrô 72 (Binh đoàn 15) hơmâo pơphun mông ngă lơphet ruh pơkra glăi sang dŏ jang jai, sang tơ̆i phŏ djru brơi 26 boh sang anŏ kông ñơn hăng mơnuih ƀôn sang amăng tơring glông Đức Cơ, tơring čar Gia Lai. Kông ti 72 hơmâo jak iâu pơgôp, gum tơngan hrŏm djru man pơdong phrâo 23 boh sang, pơkra ming 3 boh sang, hăng abih tih prăk mă yua rơbêh 1,3 klai prăk. Hrŏm hăng anun, kông ti hơmâo jak iâu ƀing apăn bruă, ling tơhan hăng ngă gêh gal brơi ƀing kông ñơn, mơnuih mă bruă mă prăk blan hlâo kiăng djru man pơdong sang phrâo. Hlâo anun, thun 2024, kông ti 72 ăt hơmâo jak iâu pơgôp kiăng djru man pơdong 11 boh sang  anun lĕ “sang ƀing gŏp”, “Sang gum pơgôp”, “Sang khăp pap khul mơnuih mă bruă mut phung” hăng abih tih 760 klăk prăk.

Ƀơi tơring čar Dak Nông, Grup pơkra hơdăng boh pơtâo – kông ngăn yơyôm amăng lăm lŏn Việt Nam (TKV) hơmâo brơi 350 klăk prăk pioh man pơdong 5 boh sang djru ba hơdôm boh sang anŏ djuai ƀiă ƀun rin. Anai jing prăk mơ̆ng TKV pioh ngă bruă “Lŏm lui sang dŏ tơ̆i, sang phô̆” ƀơi Dak Nông thun 2025. Rim boh sang hơmâo djru 70 klăk prăk man pơdong sang dŏ phrâo. Hơdôm boh sang anŏ hơmâo djru amăng tal anai lĕ H’Dôi (ƀôn Păng Sim, să Trường Xuân, tơring glông Dak Song), Điểu Nguyên (ƀôn Philơte, să Dak Ngo, tơring glông Tuy Đức); K’Sét (ƀôn B’Nor, să Dak Som, tơring glông Dak Glong), Thị Nú (ƀôn Bu Sêrê 1, să Dak Ru, tơring glông Dak Rlấp) hăng Nông Văn Dương (să Ƀuôn Choáh, tơring glông Krông Nô)./.