Ơi Ka Phu Beng lĕ mơnuih djuai ania Cơ Tu, dŏ amăng să Cà Dy, tơring glông Nam Giang, tơring čar Quảng Nam. Ră anai jing sang anŏ pơhrui glăi hơmâo hmăi yơh samơ̆ ñu ăt aka ƀu wơr thun blan tơnap tap hlâo adih, dua rơkơi bơnai ñu gir run mă bruă samơ̆ tơlơi hơdip ăt kơƀah djop mơta.

Hmư̆ ia bah ƀing apăn bruă să pơtrut pơsur hăng črâo brơi bruă bơwih ƀong huă, ñu khin hơtai čan 50 klăk prăk mơng Sang bruă prăk djru mơnuih mơnam kiăng kai pơkra glăi lŏn hmua, pla phun boh troh, pla kyâo pơtâo, laih dong pok prong rông hlô. Ră anai ơi Ka Phu Beng hơmâo ruah lĕ mơnuih ngă hmua rơgơi amăng tơring glông.

“Sang anŏ gơmơi rông 5 drơi rơmô ania, blan rơgao sĭ 2 drơi ană, sa drơi 7 klăk prăk. Pơhrui 80 klăk prăk ha thun. Sang anŏ pla phun boh troh sĭ ăt pơhrui hmâo hmăi mơn. Hơdôm gơnong bruă bơdjơ̆ nao tơring glông Nam Giang črâo brơi bruă čem rông hlô mơnong, pla pơjing. Pơtô brơi bruă bơwih ƀong kơ hơdôm boh sang anŏ amăng ƀon lan. Prăk pơhrui mơng glai rưng, rông hlô, ngă tơlơi hơdip đĭ đăi ƀiă, dưi pơklaih mơng ƀun rin. Mơng anun, sang anŏ hơmâo man pơdong sang, čem rông 3 čô ană hrăm hră truh sang hră gưl prong”.

Tơring glông Nam Giang hơmâo giăm 80% mrô mơnuih lĕ djuai ania ƀiă. Amăng tơring glông hơmâo 200 hơbô̆ bruă mơnuih ngă hmua bơwih ƀong pơlir ngă hmua-đang glai, pơđĭ kyar bơwih ƀong huă grup ngă hrŏm tui hơdôm grup sang anŏ pơlir hơbit, pơplih phun pla, hlô rông. Lu sang anŏ hơmâo pơhrui glăi hơđong mơng hơdôm pluh klăk prăk truh hơdôm rơtuh klăk prăk ha thun. Ơi Châu Văn Ngọ, Kơ-iăng Khua Jơnum min mơnuih ƀôn sang tơring glông Nam Giang brơi thâo: Mơng hơdôm ngăn rơnoh djru mơng Kơnuk kơna hăng tơring čar, rơngiao kơ bruă tuh pơ alin man pơdong anih anom, tơring glông Nam Giang hơmâo djru mơnuih ƀôn sang pơjing lu hơbô̆ bruă bơwih ƀong tong ten lăp djơ̆ hăng tơlơi sit nik ƀơi ƀon lan, djru ƀing gơñu hrưn đĭ prăk pơhrui. Ră anai mrô sang anŏ ƀun rin amăng tơring glông Nam Giang hrŏ trun dŏ 25%. Rĭm thun, mrô sang anŏ ƀun rin hrŏ trun 8%.

“Hluai tui tơlơi gum djru tuh pơ alin mơng Kơnuk kơna kah hăng jak iâu pơgôp, tơring glông Nam Giang hơmâo pok pơhai ngă tui hơdôm jơlan gah, akŏ bruă amăng ƀon lan. Rơngiao kơ bruă tuh pơ alin man pơkra anih anom kiăng djru bơwih ƀong huă hăng tơlơi hơdip mơda, bruă djru pơđĭ kyar bơwih ƀong huă, djru brơi tơlơi hơdip kơ mơnuih djuai ania ƀiă, sit biă ñu lĕ hơdôm boh sang anŏ ƀun rin, giăm ƀun rin, sang anŏ phrâo pơklaih mơng ƀun rin kiăng djru brơi neh met wa hơmâo ngăn rơnoh pơklaih mơng ƀin rin hơđong kjăp. Amăng anun, hơmâo hơdôm hơbô̆ bruă pơđĭ kyar bơwih ƀong tui jơlan gah pơlir hơbit rơnoh yôm kơplah wah anom bơwih ƀong sĭ mơdrô kiăng blơi pơhrui gơnam tam. Yua anun hơmâo pơgôp amăng bruă pơhrŏ trun ƀun rin, man pơdong plơi pla phrâo”.

Hơdôm jơlan hơdră tui hơnong pơkă dêh čar, sit biă ñu lĕ jơlan hơdră tui hơnong pơkă dêh čar pơhrŏ trun ƀun rin hơđong kjăp djru brơi hơdôm rơbâo čô mơnuih djuai ania ƀiă, kual ataih ayaih, kual čư̆ siăng tơring čar Quảng Nam hơmâo djru brơi bơwih ƀong, djru brơi anah phun pla, črâo brơi bruă rông hlô, pla pơjing, djru brơi ƀing gơñu pok prong bơwih ƀong. Ơi Hồ Quang Bửu, Kơ-iăng Khua Jơnum min mơnuih ƀôn sang tơring čar Quảng Nam brơi thâo:

“Hơdôm jơlan hơdră tui hơnong pơkă mơng gơnong glông kah hăng ngăn drăp mơng tơring čar djru brơi neh met wa kual mơnuih djuai ania ƀiă tơring čar Quang Nam hơmâo tŏ tui tŭ yua, ngă pơplih ƀô̆ mơta pơđĭ kyar bơwih ƀong huă mơnuih mơnam kual čư̆ siăng. Ră anai, ƀing gơmơi glăk git gai pok prong hơdôm hơbô̆ bruă anai ngă hiưm pă lu sang anŏ kah hăng plơi pla, sit biă ñu amăng kual čư̆ siăng tañ pơđĭ kyar hơdôm hơbô̆ bruă anai. Mơng anun, pơgôp brơi kơ bruă đĭ tui prăk pơhrui, pơhrŏ trun ƀun rin hơđong kjăp./.