Mơ̆ng thun 2022 truh abih blan 6 thun anai, ƀing pơala mơnuih ƀôn sang dêh čar hơmâo pơsit brơi pơtrun rơnoh mă jia 2% anăn duh jia sa črăn amăng hơpluh, djop mơta gơnam sĭ mơdrô, bơwih bơwăng hơmâo pơkă duh jia 10%, trun dŏ 8%. Kiăng pơtrut bruă mă, pơkra ming sĭ mơdrô, pơtrut arăng blơi gpơnam sĭ mơdrô, ngă tui tơhnal pơkă pơđĭ kyar 8% pơngŏ, Kơnuk kơna ăt pơdah thâo hăng khua mua pơ ala mơnuih ƀôn sang dêh čar Hră pơtrun mơ̆ng Khua pơ ala brơi pơtrun rơnoh mă jia sa črăn amăng hơpluh brơi kơ 6 blan rơnuč thun 2025 hăng abih amăng thun 2026. Rơđah biă mă ñu pok lu anăn gơnam sĭ mơdrô pơtrun mă jia 2%  rơnoh jia sa črăn amăng hơpluh kah hăng gơnam pơkra ming sĭ mơdrô, bruă tuai čuă ngui, gơnam mă yua rim hrơi, bruă bơwih bơwăng, boh thâo ia rơgơi tơlơi pơhing, gơnam pơkra ming mơ̆ng pơsơi yom tuh pơkra hlâo, hơdang pơtâo,  ia jrao hơdrap, gơnam yua gah ia jrao, hơdăng blơi pơmut hăng hơdăng sĭ mơdrô, ia săng, ia jâo. Ƀu pơtrun rơnoh mă jia hơdôm mơta gơnam sĭ mơdrô bruă dăng kông, prăk kăk, sang bruă prăk, mơdrô chứng khoán, hră pơhlôm nua, sĭ mơdrô lŏn mơnai, sang dŏ, gơnam ƀu thâo pŭ hyu, gơnam pơsơi mah, priă yom, gơnam pơkra ming hơduah mă amăng gŭ lŏn, lui kơnong hơdăng pơtâo, gơnam pơkra ming sĭ mơdrô rơnoh pơmă duh jia rơnoh yom laih, kơnong ƀu yap ba ia săng jâo đôč.

Tŭ ư hăng tơlơi rơkâo anau, ƀing ding kơna mơ̆ng Jơnum min apăn bruă phun pơ ala mơnuih ƀôn sang dêh čar rơkâo brơi pơtong rơđah hloh anŏ bơbeč djơ̆ jơlan hơdră pơtrun, Khua Jơnum min tơlơi bơwih ƀong hăng prăk kăk, ơi Phan Văn Mãi rơkâo:

“Mơ̆ng bruă pơkrem dăp glăi sang bruă kơnuk kơna ƀing ta dŏ ngă tui hăng khom ngă tui bruă tla prăk yua. Ngă tui hơdrôm tơlơi pơtrun anun, rơkâo kơnuk kơna pơtong glăi rơđah bruă pơhrui pơhrua, tla prăk pơhrua pioh jŭ yap glăi jơlan hơdră pơkă bơkơnar abih tih rơnoh prăk kông ngăn dêh čar”.

Pơblang brơi kiăng thâo rơđah hloh, Kơ-iăng khua dêh čar ơi Hồ Đức Phớc brơi thâo:

“Hăng hră pơtrun anai amra pơtrun rơnoh jia rơbêh 232 rơbâo klai prăk amăng thun anai. Kơnuk kơna amra pơtrut tui, hơmâo hơdră mă jia kiăng pơhlôm ngă bơkơnar prăk djă pioh kông ngăn kơnuk kơna. Thun anai, prăk blan pioh tla kơ ƀing pơdơi bruă hăng yua pơhrŏ mơnuih mă bruă amăng kơnuk kơna ƀing ta hlăk mă prăk pơkrem pioh prăk blan laih anun mă prăk kông ngăn kơnuk kơna pioh tla”.

Tui hăng Hră pơtrun phrâo anai, hrơi blan ngă tui Hră pơtrun mơ̆ng lơ 1/7/2025 truh abih lơ 31/12/2026.

Ăt amăng mông jơnum lok 44, Jơnum min apăn bruă phun pơ ala mơnuih ƀôn sang dêh čar pơgôp hiăp kơ bruă čih pơkra pơhrua glăi hơdôm mơta tơlơi pơkă Tơlơi phiăn jơnum khua mua pơ ala mơnuih ƀôn sang dêh čar. Bruă anai, kiăng pơhlôm ngă tui sa hơnơ̆ng hăng pơphun bruă mă mơ̆ng djop sang bruă gah khua pơ ala mơnuih ƀôn sang dêh čar, tơdơi kơ ngă tui bruă dăp glăi, pơhrŏ mrô mơnuih mă bruă, khom tŭ ư sa pran jua hăng djop tơlơi phiăn pơkă phrâo ră anai, ăt pơđĭ tui boh tŭ yua amăng bruă mă mơ̆ng khua pơ ala mơnuih ƀôn sang dêh čar rơnuk phrâo. Tui hăng anun, djop hră pơtrun, hră lăi pơthâo pơblang glăi, čih pioh tơlơi pơgôp hiăp hăng ƀư̆ glăi tơlơi phiăn, hră pơtrun phrâo ba pơdah brơi khua mua pơ ala mơnuih ƀôn sang dêh čar sem glăi hăng pơsit hơdôm bruă rơkâo lu mơta phara, mơ-it hlâo brơi kơsem min hơdôm tơlơi kiăng dŏ phara đơi, kaih hloh mơ-it nao amăng 48 mông hlâo kơ pơsit, đĭ tui dua wơ̆t pơkă hăng ră anai. Hră pơtrun phrâo ăt pơkă hrơi mông rim čô pô pơ ala dưi pơhiăp đĭ sa wơ̆t ƀu rơgao 5 mơnit ôh, tal dua ƀu rơgao 2 mơnit sit pơhiăp đĭ. Hră pơtrun phrâo ăt pơkă brơi mông lăi glăi mơ̆ng sang bruă hơmâo tơlơi dưi, khua anom bruă wai lăng kơ bruă anun, lăi glăi ƀu lu hloh kơ 15 mơnit ôh.

Ƀơi mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong:

“Kơtưn tơlơi tơpă pơhaih rơđah. Dua lĕ, kâo ƀuh khom pơđĭ tui anŏ tŭ yua pơčrong sai nao rai, pơkă mông pơčrong, anăn pơhiăp lu, dar nao rai, kiăng kơ djop tơlơi pơgôp hiăp pơtum nao anŏ phun kơ tơlơi kiăng. Yua kơ anun, pơsur ƀing pơ ala khom pơhiăp samơ̆ pơhiăp djơ̆, tong, hơmâo prăp hlâo tong ten, ƀơi anŏ tơlơi đĭ pơhiăp dưi mơ-it hlâo kơ khul čih hră kiăng pơtum glăi iâu anăn đĭ pơhiăp. Klâo lĕ khua mua pơ ala mơnuih ƀôn sang dêh čar ngă hiư̆m pă pơ anăp anai kơtưn bưp nao rai, pơhiăp hăng mơnuih ƀôn sang pô plĕ hră, ruah khua juăt kưtri. Amăng sang bruă khua pơ ala ba yua ia rơgơi mrô lĕ, ƀing ta khom jŭ yap tong ten yơh kơ tơlơi anai”.