Tui anun, Anom bruă ia jrao (Ding jum Kông an) ngă hrŏm hăng Sang ia jrao 199, Sang ia jrao 30/4, Kông an tơring čar Dak Lăk pơphun sem lăng tơlơi ruă, pơjrao brơi 300 čô mơnuih hơmâo anăn kơnuk kơna djru, sang anŏ tơnap tap. Pơ anai, hơmâo pơphun lu bruă gum djru kah hăng: Jơlan hơdră “Glăi pơ plơi pla”; Pơplông “Bơrơyuh teng mah” hăng jao glăi “Sang computer kơ ƀing čơđai” ƀơi Sang hră gưl dua Ea Tiêu; mă yua ring bruă “Tŭi apui rơđah bơngač plơi pla” hăng “Jơlan hla gru Lŏn ia”.

Ƀrô tal anai, Kông an tơring čar Dak Lăk ăt hyu mă bruă pôr pơthâo tơlơi phiăn hơđong kjăp rơnuk rơnua jơlan nao rai, pơgăn tơlơi truh đuh boh pơtuh, čuh mlăi, ƀlung ia; pơkra glăi sang jơnum gru grua plơi pla; nao čuă brơi gơnam kơ sang anŏ tơhan djai pơsăn drơi jăn kơ lŏn ia hăng kông an ƀơi 2 boh să Ea Tiêu hăng Ea K’tur tơring glông Čư̆ Kuin.