Ƀơi mông jơnum, ơi Trương Văn Đạt, kơ-iăng khua khul pơ ala mơnuih ƀôn sang tơring čar Gia Lai, hơmâo lăi pơthâo boh yom phun pơdjơ̆ nao kơ bruă ruah mơnuih ngă khua. Tui hăng tơlơi pơtrun mơ̆ng Jơnum min apăn bruă phun pơ ala mơnuih ƀôn sang dêh čar, tơring čar Gia Lai rơwang bruă thun 2021-2026 hơmâo abih bang 119 čô khua pơ ala. Laih dơ̆ng, djop anih mă bruă, pô ngă khua phun amăng khul pơ ala mơnuih ƀôn sang tơring čar dưi pôr pơthâo djop laih. Rơđah biă mă ñu, ơi Rahlan Chung, Kơ-iăng khua git gai ping gah, ngă khua Khul pơ ala mơnuih ƀôn sang tơring čar Gia Lai. Hơdôm čô kơ-iăng khua hăng khua grup anom bruă gơgrong djru bruă kơ khul pơ ala mơnuih ƀôn sang tơring čar hơmâo dăp djop laih. Kiăo tui kơ anun, khul pơ ala mơnuih ƀôn sang tơring čar pơdah thâo hră pơtrun mơ̆ng Khua dêh čar kơ bruă jao ngă khua jơnum min mơnuih ƀôn sang tơring čar Gia Lai, rơwang bruă thun 2021-2026. Amăng anun, ơi Phạm Anh Tuấn, Kơ-iăng khua ping gah tơring čar, dưi ngă khua jơnum min mơnuih ƀôn sang tơring čar, ta juăt iâu Chủ tịch UBND tỉnh Gia Lai; 6 čô kơ-iăng khua jơnum min mơnuih ƀôn sang tơring čar hơmâo pơpha bruă mă wai lăng amăng djop khul bruă.

Đĭ pơhiăp ƀơi anăp mông jơnum ƀing pơ ala mơnuih ƀôn sang tơring čar, ơi Phạm Anh Tuấn, Khua Jơnum min mơnuih ƀôn sang tơring čar Gia Lai ƀuăn:

“Ƀuăn mă bruă pơ anăp anai hăng bruă ngă tong ten hloh, tơpă, pơtrun bruă mă khom glăm ba hăng tŭ yua, amăng anun mă anŏ ba gru hlâo, tơlơi tơpă, bruă phun yom yơh ngă anŏ hrưn đĭ pơ anăp adih ngă bruă re se hloh lơ̆m git gai wai lăng amăng bruă kơnuk kơna. Hrŏm hơbit mă bruă, sa pran jua, ngă bruă khut khăt kiăng tŭ yua yua kiăng hơmâo hơbô̆ kơñ pơgi ni anăp brơi tơring čar Gia Lai phrâo jing tơring čar pơđĭ kyar hơđong kơjăp, bơkơnar, phrâo rơgơi, pơdrong sah hiam klă, bă hăng tơlơi khăp, kual lŏn mơ̆ rim boh sang bruă mơdrô, mơnuih ƀôn sang lêng kơ hơmâo tơlơi kiăng hrưn pioh pơgôp hrŏm pơđĭ kyar plơi pla ta pô”.

Amăng mông jơnum lok anai, ƀing pơ ala pơtum nao pơčrong sai kơ bruă, pơdah thâo tơlơi kiăng čih pơkra hră pơtrun yom, hơmâo: Akŏ pơdong hơdôm anom bruă gah sang bruă khua khul pơ ala mơnuih ƀôn sang tơring čar Gia Lai. Akŏ bruă pơphun jơnum tơđar mơ̆ng khul pơ ala mơnuih ƀôn sang tơring čar Gia Lai. Pơtong glăi anăn ƀing ding kơna khul phat kơđi amăng Sang phat kơđi mơnuih ƀôn sang tơring čar phrâo....Hơdôm boh yom phun anai, dưi lăng kah hăng yak rơbat nao blung a kiăng pơphun dăp glăi djop mơnuih apăn bruă sang bruă kơnuk kơna gong gai tơring čar, kiăng pơhlom djop tŭ yua hăng mă bruă sa amăng plĕ amăng rơwang bruă phrâo.

Pơhiăp ƀơi mông jơnum, ơi Hồ Quốc Dũng, Khua git gai ping gah tơring čar Gia Lai lăi pơtong:

“Kâo rơkâo ƀing gih mơnuih apăn bruă ngă khua djop sang bruă amăng tơring čar khom dăp glăi pơgiong tañ laih anun mut mă bruă akŏ pơdong dăp hơdră pơphun mă bruă rơđah rơđong, tum teč pioh pok pơhai ngă tui djơ̆ rơ-ua, tŭ yua boh glăi boh tơhnal klă hiam amăng djop bruă mă jao pơ anăp anai. Đăo kơnang kơ gru grua, khin hơtai, pran jua mă bruă thâo gum pơgôp laih anun anŏ kiăng hrưn đĭ mơ̆ng tơring čar Gia Lai phrâo, hăng tơlơi gir run khut khăt phrâo anăp nao sa boh tơring čar ba akŏ amăng kual Dap Kơdư hăng kual tong krah ter hang ia rơsĭ yak nao kơjăp hrŏm amăng dêh čar mut nao amăng rơnuk phrâo”.

Jơnum lok sa khul pơ ala mơnuih ƀôn sang dêh čar tơring čar Gia Lai tal XII jing sa yak rơbat blung a pioh kơ tơring čar Gia Lai anăp nao kơ tơhnal pơkă pơđĭ kyar hơđong kơjăp, jing sa boh tơring čar ba akŏ amăng kual hăng amăng dêh čar.