Akŏ bruă mrô 8 lĕ akŏ bruă yôm phara kơ bơkơnar đah rơkơi đah kơmơi dong amăng Jơlan hơdră tui hơnong pơkă dêh čar, pơdah tơlơi đing nao dơlăm mơng Ping gah hăng kơnuk kơna. Rơwang thun 2021-2025, Akŏ bruă 8 hơmâo ba glăi boh tŭ yua prong. Bruă wai lăng hăng pơphun ngă tui hơmâo pok pơhai tañ, hăng bruă akŏ pơjing Khul wai lăng Akŏ bruă mơng gơnong glông truh pơ gưl tơring čar amăng djop ƀon lan. Gơnong glông hơmâo ba tơbiă 17 hră pơ-ar črâo ba hăng pơphun pel ĕp, pơsir hĭ tơlơi gun hmao tlôn.

Ngăn rơnoh ăt hơmâo jak iâu gum pơgôp lu, hăng ngăn drăp jao trun giăm 2.000 klai prăk, lu hloh mơng gơnong glông. Lu hơnong pơkă phun bơdjơ̆ nao bruă akŏ pơjing grup pơtô pơblang amăng ƀon lan, grup mơng tơlơi pơplih hăng hrưn đĭ ngă bruă klă brơi ƀing apăn bruă đah kơmơi djuai ania ƀiă dưi ngă klă hăng rơgao hơnong pơkă. Hơdôm hơbô̆ bruă anun lĕ “Anih đăo gơnang” hơmâo ba glăi tŭ yua, laih dong djru brơi wŏt đah rơkơi amăng hơdôm bruă bơdjơ̆ nao.

Mah hơmâo hơdôm tơlơi truh kih, bruă bơkơnar đah rơkơi đah kơmơi amăng hơdôm akŏ bruă mơng Jơlan hơdră tui hơnong pơkă dêh čar kual mơnuih djuai ania ƀiă hăng čư̆ siăng ăt dong ƀơi anăp lu tơlơi gun kiăng sem lăng tong ten. Anai lĕ anŏ aka ƀu klă amăng kah pơpha hăng mă yua ngăn drăp ƀon lan; anai lĕ hơdôm tơlơi tơnap tap amăng pơsit ƀing kiăng djru ba hăng pok pơhai boh tơhnal; anai lĕ hơdôm anŏ aka ƀu klă amăng bruă pơtô hrăm hrưn đĭ ngă bruă klă; ƀudah hơdôm anŏ aka ƀu klă amăng bruă pơlir hơdră djru đah rơkơi đah kơmơi amăng hơdôm akŏ bruă phara.

Kơ anŏ aka ƀu klă amăng kah pơpha hăng mă yua prăk kak, mah Ding jum prăk kak hơmâo tơlơi pơtrun mrô 55 hơmâo hơdră ngă gêh gal kiăng ƀôn lan kah pơpha ngăn drăp, samơ̆ tui tơlơi sit nik, lu tơring čar kual mơnuih djuai ania ƀiă hăng čư̆ siăng bưp tơnap tap amang pơhrui, ba truh kơ bruă kah pơpha prăk kak brơi akŏ bruă mrô 8 aka ƀu lăp djơ̆ hăng tơlơi rơkâo. Hơdôm grup pơtô pơblang amăng ƀon lan, mah hơmâo akŏ pơjing hăng pơtop hrăm, samơ̆ tŭ mă prăk djru aset đôč, ƀu djop prăk kak kiăng kơ tŏ tui ngă bruă sit nik. Bruă jak iâu pơgôp kiăng pơhrua dong prăk kak ăt bưp tơnap tap, aka ƀu djơ̆ hăng tơlơi kiăng.

Kơ anŏ aka ƀu klă amăng bruă pơlir hơdră djru đah rơkơi đah kơmơi amăng hơdôm akŏ bruă phara, tui tơlơi lăi pơthâo mơng ƀing rơgơi črâo ba hơdră bruă, nai prin tha Phạm Thái Hưng brơi thâo: hơdôm hră pơ-ar črâo ba mơng gơnong glông hăng ƀon lan aka ƀu đing nao bruă anai djop ôh.

“Amăng mrô giăm 200 hơnong pơkă ba tơbiă amăng Jơlan hơdră tui hơnong pơkă dêh čar, hơmâo truh 71 hơnong pơkă kiăng pha pơpha phara đah rơkơi đah kơmơi, samơ̆ bruă ngă tui sit nik ăt lu tơlơi lông. Tơlơi anai ngă kơ bruă jao pơtrut bơkơnar đah rơkơi đah kơmơi amăng kual mơnuih djuai ania ƀiă, hlâo anun tơnap biă mă yơh, ră anai jai glêh glar dong kiăng djơ̆ hơnong pơkă tui hăng Hơdră bruă yôm phun dêh čar ba tơbiă”.

Ăt tui nai prin tha Phạm Thái Hưng, kiăng pơtrut tŭ yua bruă pơlir hơdră djru đah rơkơi đah kơmơi, pơhlôm hơdôm hơnong pơkă amăng bơkơnar đah rơkơi đah kơmơi mơng tơlơi pơtrun mrô 88 Khua pơ ala mơnuih ƀôn sang dêh čar hăng hơdră yôm phun dêh čar, kiăng hơmâo hơdôm tơlơi pơplih tong ten amăng tŭ mă. Amăng anun kiăng hơdră djru đah rơkơi đah kơmơi amăng djop akŏ bruă pơprong hăng akŏ bruă đơđet amăng jơlan hơdră tui hơnong pơkă dêh čar. Tơlơi anai kiăng hơmâo tơlơi črâo ba tong ten kơ ngăn drăp hăng bruă mă, mơng anom bruă git gai gum hrŏm Jơlan hơdră tui hơnong pơkă dêh čar hăng Jơnum min djuai ania. Kiăng pơplih phrâo bruă pơtô hrưn đĭ ngă bruă klă. Mơng pơtop hrăm ƀiă hrơi truh hơdră hrưn đĭ boh thâo tui tơlơi pơkă, đing nao tơlơi sit nik hăng tơlơi găn rơgao. Laih dong, kiăng kơtưn pơtô pơblang amăng ƀon lan; pơsit tong glăi akŏ phun tuh pơ alin hăng tŏ tui ngă bruă hăng pok prong hơdôm hơbô̆ bruă ba glăi tŭ yua.

Bruă pơsir hĭ hơdôm anŏ aka ƀu klă ƀu djơ̆ kơnong hrưn đĭ boh tŭ yua bruă mă mơng akŏ bruă mrô 8 đôč ôh mơ̆ ăt jing akŏ phun kiăng jơlan hơdră tui hơnong pơkă dêh čar kual mơnuih djuai ania ƀiă hăng čư̆ siăng dưi ngă tui hơnong pơkă abih bang amăng pơđĭ kyar hơđong kjăp hăng bơkơnar, ƀu brơi hlơi ôh dŏ glăi gah tlôn./.