Ƀơi mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn lăi rơđah, Jơnum ruah khua ping gah Anom bruă pơ ala mơnuih ƀôn sang dêh čar tal 1 pơphun amăng hrơi mông lŏn ia ta phrâo mut amăng rơnuk đĭ kyar phrâo, ƀơi anăp tơlơi kiăng jai hrơi prong tui, kiăng hơmâo tơlơi gơgrong bruă prong biă mă hăng Ping gah Anom bruă pơ ala mơnuih ƀôn sang dêh čar, djru pơđĭ tui kjăp kơtang amăng bruă akŏ pơdong hăng pơgang ba Lŏn ia:“Anai ƀu kơnong jing hrơi lăng glăi, pơtŏng lăp djơ̆, tơpă sit, abih bang hơdôm tơlơi dưi ngă, tơlơi dŏ tơdu, phun tơhnal, tơlơi kơđiăng lui mơ̆ng rơwang bruă hlâo, ăt prăp rơmet klă bruă mă pơ anăp, hơdră đĭ kyar hăng bruă yôm phun kiăng ngă amăng rơwang thun 2025-2030, laih dong ruah mơnuih ngă khua rơgơi, hơmâo tơlơi pơmin klă, dưi glăm bruă mơ̆ Ping gah, Khua mua pơ ala mơnuih ƀôn sang dêh čar hăng Mơnuih ƀôn sang jao”.

Ƀơi mông jơnum, ding kơna Khul khua apăn bruă phun Ping gah Anom bruă pơ ala mơnuih ƀôn sang dêh čar pơgôp hiăp tong ten kơ bruă prăp rơmet hră pơ-ar kơ mông Jơnum, kơ bruă pôr pơhing, čơkă tuai, bơwih brơi hăng bruă pel ĕp, krăp lăng.

Khua git gai pơ ala mơnuih ƀôn sang dêh čar ơi Trần Thanh Mẫn bơni kơ hơdôm khul grup, hơdôm anom bruă Ping gah, Jơnum min pel ĕp hăng Anom bruă Ping gah hơmâo prăp rơmet hlâo, pơhlôm anŏ klă, djơ̆ hrơi pơkă hơdôm tơlơi prăp lui kơ mông Jơnum; Bruă ruah khua hơmâo ngă djơ̆ tơlơi phiăn, pơhlôm tơlơi dưi, tơpă sit, tañ giong bruă prăp rơmet mơnuih ngă khua amăng ping gah. Jao bruă rơđah kơ ƀing ding kơna Khul apăn bruă phun Ping gah git gai mông jơnum hơdôm ping gah amăng gơnong dlông.

Hră pơ-ar pơdah pơ mông Jơnum hơmâo čih pơkra hlâo, mă tơlơi pơgôp hiăp mơ̆ng lu anih, pơhmư̆, ngă giong tui hrơi pơkă. Akŏ bruă, hơdră ngă bruă Jơnum ruah khua ping gah blung a hơmâo tơlơi tŭ ư hrŏm lu biă. Bruă pel ĕp, krăp lăng hơmâo lăng yôm, pơhlôm djơ̆ tơlơi pơkă gah kơđi čar, hră pơ-ar, bruă ruah mơnuih ngă khua prong.

Kơ bruă čih pơkra hră pơtrun kơ mông Jơnum, Khua git gai pơ ala mơnuih ƀôn sang jao kơ Grup čih hră pơtrun hmư̆ tui djŏp tơlơi pơgôp hiăp mơ̆ng hơdôm anom bruă ping gah, ƀing kơhnăk, mơnuih ping gah, mơnuih mă bruă. Hơdôm tơlơi lăi pơthâo khŏm pơƀuh djơ̆ tơlơi hơmâo sit nik, lăi tơpă sit, abih bang hơdôm boh than hơmâo ngă, tơlơi gêh gal, aka ƀu dưi ngă amăng rơwang bruă rơgao, phun tơhnal, tơlơi kơđiăng lui pơƀuh rơđah jơlan ngă bruă, bruă mă yôm phun hăng ba tơbiă hơdră sit nik dưi ngă, pơplih prong amăng rơwang bruă pơ anăp:“Hơdôm hră pơtrun Jơnum ruah khua kiăng tum teč, dlăm, amuñ pơčrông sai, kiăng hơmâo tơlơi tŭ ư hrŏm amăng mông Jơnum. Amăng anun, Hră lăi pơthâo glăi bruă kơđi čar jing lăi pơthâo akŏ phun, kiăng kiăo tui djơ̆ hăng tơlơi git gai, tơlơi pơtrun, jơlan anăp nao prong amăng hơdôm tơlơi pơtrun Jơnum ruah khua ping gah dêh čar tal 14; Hră lăi pơthâo lăng glăi djŏp tơlơi aka ƀu dưi ngă mơ̆ng ping gah khŏm hơmâo tơlơi kơtưn nao pơ anăp, thâo lăng glăi tơlơi soh mơ̆ng pô, tơlơi soh mơ̆ng pô pơkŏn hăng pơsit rơđah tơlơi gơgrong bruă mơ̆ng khul grup, hơjăn pô kơ bruă git gai, črâo bruă mơ̆ng Ping gah Anom bruă pơ ala mơnuih ƀôn sang dêh čar. Hră pơtrun kiăng kiăo tui jơlan ngă bruă mơ̆ng Ding jum kơđi čar, Khul khua git gai Ping gah dêh čar jing bruă hrŏm, samơ̆ tơlơi phara mơ̆ng Khua mua pơ ala mơnuih ƀôn sang čih pơkra tơlơi phiăn, krăp lăng hăng pơsit hơdôm bruă yôm mơ̆ng lŏn ia".

Kơ bruă ruah khua, Khua git gai pơ ala mơnuih ƀôn sang jao bruă kiăng pơtŏng lăng rơđah rơđông, pơhlôm ngă djơ̆ hăng tơlơi pơtrun mơ̆ng Ping gah, ngă klă bruă sem lăng ƀing khua, bruă pơƀuh mơnuih ngă khua amăng Khul khua gum bruă git gai Ping gah phrâo pơhlôm djơ̆, huăi gum kơ pô hlơi drơi hơpă ôh, rơđah rơđông, tŏ tui anŏ klă hiam, lăng yôm anŏ klă, hơmâo djŏp mrô kiăng djơ̆ tui anih mă bruă kiăng; ping gah rơwang bruă phrâo kiăng rơgơi, kjăp bruă čar, hơdip hiam, hơmâo mơnuih ƀôn sang đăo kơnang. Laih dong ngă klă bruă pơtô tơlơi pơmin tơpă sit, kiăng abih bang tŭ ư, gum pơgôp nao rai, bong kjăp pran ngă bruă djơ̆ tơlơi phiăn, tơlơi pơkă mơ̆ng Ping gah.

Khua git gai pơ ala mơnuih ƀôn sang dêh čar đăo kơnang, hăng pran jua thâo gum pơgôp, gir run prong hăng gơgrong bruă mơ̆ng abih bang khua mua, mơnuih ping gah, bruă prăp rơmet Jơnum ruah khua ping gah Anom bruă pơ ala mơnuih ƀôn sang dêh čar tal 1 amra dưi ngă djơ̆ hrơi pơkă, klă, tŭ yua, djru ngă truh kih Jơnum ruah khua lăi hơjăn hăng Jơnum ruah khua Ping gah dêh čar tal 14 lăi hrŏm./.