Jơnum lok 10 amra pơphun amăng lơ 20/10 laih anun pơđut amăng lơ 12/12. Him lăng Khua mua pơ ala mơnuih ƀôn sang amra sem lăng, hơmâo tơlơi pơtrun: 45 tơlơi phiăn, tơlơi pơtrun gah bruă čih pơkra tơlơi phiăn; 13 mơta bruă kơ bơwih ƀong huă – mơnuih mơnam, prăk kơnuk kơna, krăp lăng hăng pơsit hơdôm bruă yôm pơkŏn dong mơ̆ng lŏn ia; laih dong, hơmâo 13 mơta bruă mơ̆ng djŏp anom bruă mơ-it glăi kiăng ƀing khua pơ ala sem lăng.

Khua dêh čar ơi Phạm Minh Chính lăi, bruă čih pơkra tơlơi phiăn kiăo tui pran jua kơnuk kơna xã hội chủ nghĩa hơmâo mơ̆ng mơnuih ƀôn sang, yua mơnuih ƀôn sang akŏ pơdong hăng bơwih brơi kơ mơnuih ƀôn sang, mă ană mơnuih yơh ngă phun yôm hloh. Khua dêh čar kiăng dua anom bruă kah pơpha, ngă hrŏm kjăp, tŭ yua; hơdôm ding jum anom bruă kiăng ngă hrŏm hăng Jơnum min djŏp djuai ania mơnuih mơnam hăng pran jua kiăng kơtưn nao pơ anăp, klă, tŭ yua, pơhmư̆ tơlơi pơgôp hiăp mơ̆ng mơnuih ƀôn sang, mơnuih rơgơi kơhnâo, kơsem min boh thâo; bruă ngă tui ƀu klă, ƀu lăng hyu djŏp, hat he đơi, ƀrô pơhlôm tơlơi pơkă kơ anŏ klă, ngă kiăng prăp rơmet klă, yôm, tơpă sit; ngă hrŏm kjăp, djơ̆ hrŏm mơ̆ng djŏp anom bruă; pơtrut tui tơlơi rơgơi, laih dong mă yua tơlơi rơgơi ană mơnuih pơčeh rai. Khua dêh čar ơi Phạm Minh Chính lăi:“Pơplih phrâo tơlơi pơmin, pơtrut pơplih hơdră čih pơkra tơlơi phiăn, pơplih mơ̆ng tơlơi pơmin dlăm đơi gah wai lăng jing tơlơi pơmin pơplih phrâo hăng bơwih brơi. Anai jing tơlơi kiăng biă mă amăng mông hơne. Kiăo tui tơlơi hơmâo sit nik, tơbiă mơ̆ng tơlơi hơmâo sit ră anai, pơpŭ kơ tơlơi glăk hơmâo hăng ngă anun yơh jing rơnoh pơkă. Tơlơi pơmin mơ̆ng ƀing ta khŏm pơplih mơ̆ng anai. Kâo ră ruai tom ƀing gih thâo, tơlơi gêh gal hơmâo mơ̆ng tơlơi pơmin, tơlơi pơtrut pran jua hơmâo mơ̆ng tơlơi pơplih phrâo, pran kơtang hơmâo mơ̆ng mơnuih ƀôn sang. Anun jing hăng pran jua čih pơkra tơlơi phiăn, ƀing ta ăt kiăng sem lăng hăng lăi pơthâo khŏm ngă tui tơlơi pơmin anai”.

Tŭ ư hăng hơdôm tơlơi pơƀut glăi mơ̆ng Khua dêh čarh ơi Phạm Minh Chính, Khua git gai pơ ala mơnuih ƀôn sang dêh čar ơi Trần Thanh Mẫn lăi glăi, mơ̆ng anai truh kơ mông jơnum ƀu sui dong tah, biă ñu amăng hrơi mông glăk hơmâo lu bruă prong kah hăng prăp lui Jơnum ruah khua ping gah đơ đam dêh čar tal 14, ruah khua pơ ala mơnuih ƀôn sang dêh čar tal 16 hăng Jơnum min pơ ala mơnuih ƀôn sang dêh čar djŏp gưl rơwang thun 2026-2031. Mah hnun hai, Khua pơ ala mơnuih ƀôn sang dêh čar, Kơnuk kơna ăt khŏm prăp lui klă kơ mông jơnum lok 10, jơnum tal rơnuč mơ̆ng Rơwang bruă khua pơ ala tal 15.

Khua git gai pơ ala mơnuih ƀôn sang dêh čar pơtă hlâo, hơdôm anom bruă čih pơkra tơlơi phiăn kiăng ngă djơ̆ Tơlơi phiăn, hơdôm tơlơi pơkă hơmâo pơtrun. Tơdơi kơ mông jơnum anai, Khua čih pioh Ƀirô khua pơ ala mơnuih ƀôn sang dêh čar ngă hrŏm hăng anom bruă kơnuk kơna dăp glăi jơlan hơdră lăp djơ̆ hăng hrơi pơphun jơnum mơ̆ng Ping gah. Dua bơnah kiăng ngă hrŏm tañ hloh bruă prăp rơmet hră pơ-ar, ba pơmut amăng App Anom bruă pơ ala mơnuih ƀôn sang kiăng ƀing khua sem lăng. Khua git gai pơ ala mơnuih ƀôn sang brơi thâo, hăng pran jua ngă bruă hơdeč hmar, ƀơi mông jơnum anai, Khua mua pơ ala mơnuih ƀôn sang dêh čar hăng Kơnuk kơna tŭ ư ƀu pơdơi tong krah tal jơnum:“Ƀing khua pơ ala ăt ƀu pơphun tơña dong tah, plih jing bruă pơkŏn dong, Kơnuk kơna mơit hră lăi pơthâo djŏp kiăng ƀing khua pơ ala bơkơtuai amăng ha hrơi. Anom bruă pơƀuh kơčăo bruă anai khŏm prăp lui tơlơi či lăi pơthâo, pơƀut hăng hơdôm hră lăi pơthâo kơ ƀing Khua ding jum, Khua anom bruă gơgrong wai lăng hơdôm hră pơ-ar anun. Hrŏ trun mông pơđok rim pok hră lăi pơthâo năng ai 5 mơnit, dăp glăi mông lăp djơ̆ hơdôm tơlơi phiăn, tơlơi pơtrun hăng mông mơnit ƀing khua pơ ala mơnuih ƀôn sang sem lăng gư̆ bơnut pơsit brơi. Yua kơ bruă phara hơjăn, anun jing tal jơnum Khua pơ ala mơnuih ƀôn sang dêh čar tal anai jing ƀing ta kah pơpha hơdôm grup či pơčrông sai. Hăng pran jua pơčrông sai tui grup bơwih ƀong, grup mơnuih mơnam, grup mơ̆ng tơlơi phiăn boh thâo ia rơgơi pơkra gơnam gah ling tơhan, rơnuk rơnua ƀing ta kah jing grup tơlơi phiăn či pơčrông sai”.

Khua git gai pơ ala mơnuih ƀôn sang dêh čar kiăng ƀing Khua ding jum, Khua khul wai lăng Djuai ania, ƀing Khua Jơnum min khŏm kiăo tui truh giong mơtăm hơdôm Tơlơi phiăn yua anom bruă gơñu čih pơkra, pơdah pơƀuh, pel ĕp truh kơ hrơi hơmâo ƀing khua pơ ala pơsit. Hrŏm hăng anun, ƀing Khua ding jum kiăng pơtrut pơsur anom bruă gơñu mă yua boh thâo pôr pơhing, boh thâo mrô, biă ñu lĕ mă yua tơlơi rơgơi ană mơnuih pơčeh phrâo amăng bruă lăng glăi tong ten djŏp tơlơi phiăn hơđăp, tơlơi phiăn phrâo kiăng pơhlôm tañ, tŭ yua. Khua git gai pơ ala mơnuih ƀôn sang dêh čar ơi Trần Thanh Mẫn tŭ ư hăng Khua dêh čar ơi Phạm Minh Chính lơ̆m lăi, dua bơnah kiăng ngă hrŏm tui pran jua gum pơgôp; lăi pơtŏng, tal jơnum anai jing tơlơi truh kih, tŭ yua hrŏm mơ̆ng Kơnuk kơna, Khua mua pơ ala mơnuih ƀôn sang dêh čar hăng tơlơi git gai mơ̆ng Khul khua apăn bruă git gai Ping gah, Ding jum kơđi čar, Khul khua git gai Ping gah hăng Khua git gai Ping gah ơi Tô Lâm./.