Tlam lơ 17/9, anom bruă git gai ling tơhan tơring čar Dak Lak pơphun bưp ƀô̆ mơta mơnuih arăng đăo gơnang amăng kual mơnuih djuai ania ƀiă. Đơ đam tơring čar ră anai hơmâo rơbêh 1.060 čô mơnuih arăng đăo gơnang ba gru, mơng 49 djuai ania. Amăng mông bưp, ƀing gơñu lăi pơthâo tơlơi găn rơgao amăng bruă pơtô ba mơnuih ƀôn sang, pơsir kơđi tơlơi, man pơdong plơi pla phrâo, pơtrut pơsur hlăk ai nao ngă tơhan. Đĭ pơhiăp amăng mông bưp, khua tơhan Niê Ta, Khua anom bruă git gai ling tơhan tơring čar Dak lak tŭ yap tơlơi gum pơgôp prong mơng ƀing tha plơi, khua plơi, mơnuih arăng đăo gơnang hăng bruă jao wai pơgang rơnuk rơnua amăng ƀon lan.

Khua tơhan Niê Ta rơkâo tŏ tui pơlir hrŏm kơplah wah tơlơi phiăn kơnuk kơna hăng tơlơi phiăn amăng plơi pla, pơtô pơblang, pơsur mơnuih ƀôn sang ngă tui  tơlơi črâo trun mơng Ping gah hăng kơnuk kơna. Ƀrô tal anai, anom bruă git gai ling tơhan tơring čar hơmâo jao hră pơpŭ brơi 30 čô mơnuih ba gru amăng ngă tui bruă jao gah ling tơhan, pơgôp pơjing bruă wai pơgang amăng abih bang mơnuih.