Hră lăi pơthâo ƀơi mông jơnum brơi ƀuh, tơdơi kơ 8 blan pok pơhai, tơring čar hơmâo man pơdong phrâo hăng pơkra ming glăi rơbêh 8.900 boh sang kơ mơnuih ƀun rin, hăng rơnoh prăk tuh pơ alin truh giăm 698 klai.

Khua git gai ping gah, ơi Nguyễn Đình Trung lăi pơtong, boh tơhnal anai ƀu kơnong djru hơdôm rơbâo boh sang anŏ hơđong anih dŏ đôč ôh, dŏ djru ba hơdră pơsir tơlơi hơdip mơda, bơwih ƀong huă kơ mơnuih mơnam, jing atur pơđĭ kyar kơjăp. Khua git gai ping gah tơring čar Dak Lak rơkâo djop gưl  anom bruă, ăt pơtrut bruă đing nao pơsir tơlơi bơwih ƀong huă, djru hơdră ngă hơđong tơlơi hơdip mơda, kiăng truh thun 2030 sang anŏ ƀun rin abih yơh. Ƀrô tal anai, khua mua tơring čar Đồng Nai ăt djru ba 38 klai prăk gum hrŏm amăng Jơlan hơdră lŏm lui sang tơ̆i, sang phŏ ƀơi tơring čar Dak Lak.