Kơčăo bruă mrô 8 hơmâo ngă lu hơbô̆ bruă pơčeh phrâo, lăp djơ̆ hăng rim kual plơi pla, ba glăi tơlơi pơplih prong biă amăng plơi pla mơnuih djuai ƀiă hăng kual čư̆ siăng kriang pơtâo.

Hăng hơbô̆ bruă pôr pơthâo, pơđĭ tui tơlơi thâo pơmin, hơdôm Grup “Pô nao hlâo mơ̆ng tơlơi pơplih phrâo” hăng “Grup pôr pơthâo amăng plơi pla” jing phun akha bang hyu tơlơi thâo pơmin. Mơ̆ng hrơi jơnum, ngă sen, pôr pơthâo hăng tơlơi Yuan wơ̆t hăng tơlơi djuai ania ƀiă, hơdôm tơlơi pơhing kơ ngă bơkơnar đah rơkơi đah kơmơi, tơlơi sat răm mơ̆ng dŏ rơkơi bơnai aka ƀu truh thun, dŏ ană anong wa pô hăng tơlơi taih amang djơ̆ ngă amăng sang anŏ hơmâo mut tơma amăng plơi pla laih. Hmư̆ hing hloh ƀơi plơi Chùa (Quảng Trị) ƀudah plơi Huổi Ho (Điện Biên), bruă dŏ rơkơi bơnai mơ̆ng anet hăng dŏ ană anong wa pô plai biă mă yơh, lu čơđai đah kơmơi hơmâo pơsur nao hrăm glăi hră. Adơi Hồ Thị Bảy dŏ ƀơi plơi Chùa, să Hiếu Giang, tơring čar Quảng Trị lăi:“Hrơi pôr pơhing anai djru ba kâo thâo hluh hloh, ăt kah hăng thâo wai lăng pơgang drơi mă pô. Thâo bĕ hĭ tơlơi jŭ sat kiăng hơdip klă hiam hloh. Mơ̆ng anun kâo ăt thâo mơn thun dŏ anet lĕ ta kiăng hrăm hră ƀu djơ̆ ĕp rơkơi ôh. Kâo ăt kiăng mơ̆ng hrơi hrăm anai amra djru ƀu kơnong kâo ôh ăt djru ba lu gơyut gơyâo dong”.

Hăng hơbô̆ bruă djru bơwih ƀong, kơčăo bruă anai djru akŏ pơdong grup pơkra gơnam, hơbô̆ bruă čan prăk pơplih nao rai, pơtô bruă mă hăng ĕp anih sĭ mơdrô gơnam. Mơ̆ng bruă rông un jŭ truh kơ rông be, pla phun jrao, truh kơ bruă mơñam eng ao ƀudah čuă ngui amăng plơi pla, đah kơmơi hơmâo thim prăk dong. Tơlơi anai ƀu kơnong djru plai ƀiă rin rơpa đôč ôh, pơplih tơlơi hơdip đôč ôh mơ̆ ăt pơđĭ tui tơlơi dưi pơhiăp mơ̆ng ƀing đah kơmơi amăng sang anŏ hăng plơi pla.

Hơbô̆ bruă djru ba ƀing đah kơmơi hăng čơđai sang anŏ tơnap: Jơlan hơdră “Amĭ rông”, djru prăk hrăm hră, hră pơhlôm nua ia jrao ƀudah akŏ pơdong “sang pơđao tơlơi khăp pap” jing anih kơnang kjăp kơ lu mơnuih tơnap tap. Hơdôm bruă ngă anai pơdah tơlơi pơmin thâo khăp pap dlăm biă, djru ba ƀing đah kơmơi hăng čơđai muai dưi hrưn đĭ, mut hrŏm amăng tơlơi hơdip phrâo, hăng đĭ kyar.

Hơbô̆ bruă pơđĭ tui tơlơi rơgơi kơ mơnuih ngă bruă amăng Khul hăng ƀing kan ƀô̆ amăng plơi pla: Hơdôm anih pơtô hrăm kơ bruă pôr pơthâo, wai lăng bruă mă, hăng mă yua boh thâo phrâo pôr pơhing plang internet hơmâo prăp rơmet brơi ƀing khua mơnuih mă bruă amăng plơi pla thâo djă pioh, đĭ kyar hăng pok prong tui djŏp bruă mă. Bruă abih bang đah kơmơi amăng khul ƀơi hơdôm boh să guai dêh čar tơring čar Lào Cai hơmâo prăp lui măi computer, măi in hră jing tơlơi pơhmu brơi kơ tơlơi pơplih boh thâo mrô amăng Khul, pơđĭ tui boh tŭ yua bruă mă.

Kiăng hơdôm hơbô̆ bruă mơ̆ng Kơčăo bruă mrô 8 pơtrut tui boh tŭ yua hăng bang hyu djŏp anih, tui hăng yă Nguyễn Thị Minh Hương, Kơ-iăng khua Khul đah kơmơi Việt Nam, djŏp gưl khul kiăng pơtŏng lăng na nao, pơsit tơlơi kơtang, tơlơi tơdu mơ̆ng hơdôm hơbô̆ bruă anun. Mơ̆ng anun ngă tơpă tui tơlơi pơtrun, hră pơtô ba, ngă gêh gal kơ bruă pok prong tui. Rơngiao kơ anun kiăng pơtô dlăm hloh kơ boh thâo wai lăng, tơlơi pôr pơhing, krăp lăng kơ ƀing khua djŏp gưl, biă mă ñu lĕ amăng plơi pla. Kiăng pơtrut tui tơlơi gơgrong bruă mơ̆ng plơi pla, pơhlôm đah kơmơi hăng ană plơi jing mơnuih hlong či mut ngă bruă, mơ̆ng bruă pơmin, truh kơ ngă bruă hăng djă bong bruă mă. Tơlơi gum ngă mơ̆ng plơi pla jing tơlơi yôm pơsit ngă bruă hơđong kjăp mơ̆ng hơdôm hơbô̆ bruă. Yă Nguyễn Thị Minh Hương brơi thâo dong:“Lăng nao abih bang gơmơi ƀuh hơmâo tơlơi git gai ha amăng plĕ mơ̆ng Gơnong dlông truh pơ plơi pla, hơdôm boh tơring ăt krăp lăng kiăo tui jơlan hơdră ngă bruă hăng thâo pơplih hơdeč hmar lăp djơ̆ kiăng pok pơhai ngă bruă sit nik, lăp djơ̆ hăng plơi pla. Lu rơnoh pơkă dưi ngă hăng rơgao hơnong laih anun hơmâo tơlơi pơplih klă kơ tơlơi pơmin hơdră ngă bruă mơ̆ng mơnuih ƀôn sang, mơ̆ng đah kơmơi, wơ̆t hăng đah rơkơi, mơ̆ng ƀing tha truh kơ ƀing čơđai mơ̆ng anun djru pơsir hĭ hơdôm bruă ječ ameč hăng pơtrut bơkơnar đah rơkơi hăng đah kơmơi kual mơnuih ƀôn sang djuai ƀiă hăng čư̆ siăng”.

Kơčăo bruă mrô 8 ƀu kơnong jing hơdră ngă bruă ƀơi anăp đôč ôh mơ̆ ăt jing bruă ngă sui thun kiăng pơtrut ngă bơkơnar đah rơkơi đah kơmơi, hăng pơđĭ tui tơlơi gơgrong bruă mơ̆ng ƀing đah kơmơi laih anun djru đĭ kyar hơđong kjăp kual mơnuih ƀôn sang djuai ƀiă hăng čư̆ siăng. Hăng bruă pơđĭ tui anŏ klă hăng pok prong hơdôm hơbô̆ bruă, hơdôm anŏ yôm amăng bruă bơkơnar đah kơmơi đah rơkơi amra bang hyu djŏp plơi pla, djru đah kơmơi pơđĭ tui tơlơi rơgơi, tơlơi gêh gal, gum akŏ pơdong sa tơlơi hơdip tơdơi anai klă hloh, pơdrong sah hloh kơ lŏn ia./.