Mơguah lơ 12/5, ƀơi plơi prong Gia Nghĩa, Ding jum kông ang gum hrŏm hăng Jơnum min mơnuih ƀôn sang tơring čar Dak Nông hrŏm hăng hơdôm bôh anom djru pơphun ngă Lơphet pok phun hrơi pơphun pơdŏng, lŏm lui sang tơ̆i, sang răm; hrŏm hăng anun tŭ mă prăk mă yua hăng jao sang ngă gru amăng tơring čar. Ding jum Kông ang hmâo iâo pơhrui hăng jao 30 klai prăk pioh djru pơdŏng 500 bôh sang kơ sang anô̆ ƀun rin, ƀun rin ƀơƀiă hăng sang anô̆ gah hơdră bruă tơnap tap kơ sang dô̆ ƀơi Dak Nông.

Amăng mông ngă lơphet, Trung tướng Phạm Thế Tùng - Kơ-iăng Khua Ding jum Kông ang hơ-ưč hmưi hơdôm bôh sang anô̆ dưi čơkă mă sang, hrŏm hăng anun mơ-ĭt tơlơi bơni truh ƀing gum djru, hơdôm gơnong bruă, anom bruă ƀơi tơring čar Dak Nông hmâo gum hrŏm, gum hrŏm hăng Ding jum amăng bruă lŏm lui sang tơ̆i, sang răm ƀơi tơring čar. Tui hăng kơčăo bruă, tơring čar Dak Nông amra lŏm lui abih bang 1.755 bôh sang tơ̆i, sang răm, djru sang anô̆ ƀun rin, ƀun rin ƀơƀiă, sang anô̆ gah hơdră bruă hăng neh wa djuai ania ƀiă amăng đơ đam tơring čar. Yap truh ră anai, tơring čar ngă giong laih 75% mrô bruă hăng pơkă hlâo amra ngă giong bruă lŏm lui sang tơ̆i, sang răm hlâo kơ lơ 30/8/2025./.