Ayong Rčom Dun 30 thun, djuai ania Jarai, plơi Ngol Rông, să Ia Krêl, tơring glông Đưk Kơ, dưi hơmâo kông ty 74, Binh đoàn 15 iâu pơmut mă bruă ngă kông ñơn reh kơtăk kơsu mơ̆ng akŏ thun anai ñu lăi, prăk blan ñu 7 klăk prăk sa blan, anun tơlơi hơdip sang anŏ ñu hơđong ƀiă laih.

“Hlâo kơ mut ngă kông ñơn lĕ sang anŏ gơmơi tơnap tap đơi, ră anai hơmâo sang dŏ, hơmâo bruă mă kâo ăt kiăng mơ̆n hơđong hloh, tơdơi anai ană bă dưi hrăm hră, kâo bơni kông ty hơmâo djru ba kâo”.

Kiăng ngă klă bruă mă pơđĭ kyar bơwih ƀong huă lir hơbit hăng bruă pơgang tơlơi rơnuk rơnua dêh čar thun 2025 hăng hơdôm thun tơdơi adih, Binh đoàn 15 hơmâo tơlơi kiăng jak iâu 1.489 čô mơnuih mă bruă apah ƀơi tơring čar Gia Lai. Ƀơi tơring glông giăm guai dêh čar Đưk Kơ, hơmâo kông ty 74, kông ty 75, Binh đoàn 15. Hơdôm thun rơgao, hơmâo pơtô pơhrăm brơi giăm 2000 čô mơnuih hrăm bruă rek, mă kơtăk kơsu, lêng kơ mơnuih djuai ƀiă soh. Đại tá Trịnh Hà Tâm, Khua kông ty 75 lăi kơ bruă pơtô hrăm mơnuih ƀôn sang amăng kual:

“Kông ty 75 hơmâo iâu pơmut djop mơnuih mă bruă, abih bang lĕ mơnuih amăng plơi pla soh. Lơ̆m pơtô hrăm, ta djru ba abih djop mơta mơ̆ng gơnam yua mă bruă, truh kơ  djă thong dao reh kơtăk kơsu pioh hrăm hăng pơtô brơi hơdră reh kơtăk kơsu yua kơ bruă ngă anai kiăng hơmâo hơdră, tơlơi thâo djơ̆ lăp, tong ten, kơđiăng biă mă, anun yơh pơtô gơñu khom thâo, brơi ƀing nai pơtô hăng khua mua pơčrâo brơi tơl anih, ƀơi anăp mơta, 3 mơta tơlơi hrŏm hăng mơnuih mă bruă”.

Đại tá Khuất Bá Cao, Khua git gai ping gah, Kơ-iăng khua anom bruă tơhan Binh đoàn 15 lăi pơtong, sang bruă đing nao biă mă iâu mơnuih djuai ƀiă mut mă bruă ngă kông ñơn; anai lĕ sa jơlan hơdră yom biă mă mơ̆ng Ping gah, Sang bruă khua tơhan Binh đoàn 15. Mơ̆ng anun, djru hrŏm pơđĭ kyar bơwih ƀong huă, pơđĭ tui tơlơi hơdip mơda mơnuih ƀôn sang, pơgang rơnuk rơnua hơđong kơđi čar, rơnuk rơnua mơnuih mơnam giăm guai dêh čar. Đại tá Khuất Bá Cao lăi pơtong:

“Giăm 8000 čô mơnuih ƀôn sang djuai ƀiă mơ̆ng Binh đoàn 15 dưi hơmâo gơmơi đing nao iâu pơmut mă bruă, gơmơi git gai brơi djop sang bruă gah Binh đoàn đing nao, pơđĭ tui tơlơi thâo ăt kah hăng pơtrut bruă mă jak iâu mơnuih djuai ƀiă mut mă bruă, ngă kông ñơn, pioh pơhlôm djop mrô mơnuih mă bruă, pơgang hơđong rơnoh prăk pơhrui glăi, dưi hơđong tơlơi hơdip mơda ană plơi hăng bruă mă, prăk apah, prăk blan mă bruă; djru ba gơnam yua pioh mă bruă, pơtô hrăm khom thâo mă bruă, djru ba pơjeh phun pla, prăk čan tuh pơ alin kơ bruă mă. Sơ̆n pran jua pơtô ba, pôr pơthâo, jak iâu ană plơi pla mơnuih găng añrăng mut mă bruă, ngă kông ñơn thâo hơdră reh kơtăk kơsu”.

Amăng 40 thun laih rơgao, ƀơi kual gah kơdư Lŏn Dap Kơdư, Binh đoàn 15 ngă tui dua bruă, hrŏm hăng bơwih ƀong huă laih anun pơgang dêh čar rah. Ră anai anom bruă anai wai lăng 44.295 ha đang kơsu hăng giăm 400 ha hmua pơdai, đang boh čroh, hrŏm hăng 6 boh sang măi pơkra glăi kơtăk kơsu, jua kơtang 55.000 tơn sa thun. Binh đoàn hơmâo pơčruh hrŏm 2.800 klai prăk amăng keh prăk kông ngăn kơnuk kơna, pơsir bruă mă hơđong brơi rơbêh 16.000 čô mơnuih amăng anun rơbêh 60% mơnuih djuai ƀiă. Hơbô̆ bruă lir hơbit plah wah kông ñơn djuai ania Yuan hăng djuai ania ƀiă hơmâo 4.200 boh sang anŏ, krôp ngă hrŏm dua bơnah sang anŏ,pơdjru nao rai tong ten, gum pơgôp, pơđĭ tui tơlơi hơdip mơda mơnuih ƀôn sang. Tha plơi ơi Rčom Čič, plơi Beng, să giăm guai Ia Čiă, tơring glông Ia Grai, Gia Lai brơi thâo, yua hơmâo jơlan hơdră mơ̆ng Binh đoàn 15, jak iâu mut ngă kông ñơn anun tơlơi hơdip mơda mơnuih ƀôn sang dưi pơblih ƀuh rơđah ba mơtam.

“Binh đoàn 15 pơđĭ kyar kual pla kơsu, kơphê ƀơi tơring guai dêh čar či Ia Grai, Čư̆ prong, Đưk Kơ, tơlơi hơdip mơda mơnuih ƀôn sang đĭ đăi laih. Ƀơi să gơmơi, kông ñơn mơ̆ng kông ty 74, Binh đoàn 15 hơmâo 7 grup mă bruă. Kơnong plơi gơmơi đôč hơmâo 200 čô Jarai mut mă bruă ngă kông ñơn. Biă mă ñu kông ty đing nao bruă hơdôm sang anŏ hơdai gum hrŏm, pơtô ba bruă pla hăng wai lăng phun kơsu, hmua pơdai djơ̆ hơdră. Hơnơ̆ng hơdip mơda mơ̆ng mơnuih ƀôn sang pơblih phrâo laih”.

Binh đoàn 15 ngă klă bruă jĕ giăm pơtô ba ană plơi, djru hrŏm ngă klă bruă mă bơwih ƀong huă hăng pơgang rơnuk rơnua lŏn ia, pơhlôm hơđong ƀơi kual giăm guai dêh čar tơring čar Gia Lai, Kon Tum. Binh đoàn hơmâo pơsir bruă mă brơi 9000 čô hơmâo bruă mă hơđong, lêng kơ mơnuih djuai ƀiă soh; pơphun brơi 4.200 krôp sang anŏ ngă kông ñơn djuai ania Yuan ngă adơi ayong pơdjru nao rai hăng sang anŏ mơnuih djuai ƀiă pơđĭ kyar bơwih ƀong huă.

Bruă đing nao djru ba tơlơi hơdip mơda ƀing ngă kông ñơn, biă mă ñu kông ñơn mơnuih djuai ƀiă lĕ bruă ngă  ƀu jưh hĭ dơ̆ pơsir bruă mă hăng hơmâo prăk pơhrui glăi hơđong đôč ôh, dŏ jing bruă mă sui hơđong lir hơbit plah wah sang bruă mơdrô, gong gai kơnuk kơna hăng mơnuih ƀôn sang. Hơdôm bruă mă rơđah rơđong, glăm ba sit nik mơ̆ng Binh đoàn 15 amăng lu thun laih rơgao, jing sa kơnôl brơi ƀuh tơlơi djru pran jua mă bruă yua kơ ană plơi pla, yua kơ anŏ pơđĭ kyar hơđong kơjăp amăng kual giăm guai dêh čar či Lŏn Dap Kơdư.