Lơ 10/11/2023, Khua pơ ala mơnuih ƀôn sang dêh čar hơmâo pơsit tŭ yap tơlơi pơtrun kơ bruă jŭ yap him lăng ngăn drăp kơnuk kơna thun 2024, tui anun Khua pơ ala mơnuih ƀôn sang dêh čar brơi mơ-it nao rơnoh ngăn drăp kơnuk kơna him lăng ngă tui 3 jơlan hơdră tui hơnong pơkă dêh čar thun 2023 hơdai mơng thun 2024. Boh than krăo lăng brơi ƀuh, bruă jao prăk kaih, kơnong kơ giăm 15% (dưm dưm 3.800 klai prăk). Tơdah ƀu dưi tŏ tui rơnoh prăk ngă tui amăng thun 2023 hơdai nao thun 2024, tơlơi anai amra lui hĭ jŭ yap him lăng thun 2023 giăm 16.000 klai prăk.

Đĭ pơhiăp amăng mông jơnum, Khua git gai pơ ala mơnuih ƀôn sang dêh čar ơi Vương Đình Huệ lăi pơtong bruă đing nao pơsir hĭ klă hloh prăk mă yua samơ̆ djơ̆ tơlơi pơkă, huăi ngă gun găn bơdjơ̆ nao tơlơi phiăn hăng lăng glăi tơlơi bơdjơ̆ nao mơng mă yua ngăn drăp. Ăt amăng mơguah lơ 15/11, Jơnum min apăn bruă Khua pơ ala mơnuih ƀôn sang dêh čar lăi pơthâo, tŭ mă, pơplih pơkra črăn tơlơi phiăn tơhan djru wai pơgang rơnuk rơnua, hơđong ƀơi ƀon lan hăng pơgôp hiăp kơ bruă hrŏ trun jua blơi yua gơnam.