VOV4.Jarai - Jơlan hơdră tui hơnong pơkă dêh čar amăng pơđĭ kyar bơwih ƀong huă - mơnuih mơnam ƀơi kual mơnuih djuai ania ƀiă hăng kual ataih, asuek rơwang thun 2021-2030 sit nik pok pơhai ƀơi ƀon lan dong mơng akŏ thun anai, tơlơi anai kiăng kơ pơsit tong tơlơi ƀuăn mơng Kơnuk kơna lơ̆m ngă tui hơdôm hơnong pơkă pơđĭ kyar hơđong kjăp, anăp nao pơhlôm “huăi hơmâo hlơi pioh glăi pơ tlôn”. Pô mă tơlơi pơhing phrâo mơng Gong phun jua pơhiăp dêh čar Việt Nam hơmâo mông bơră ruai hăng Khua ding jum, Khua Jơnum min djuai ania ơi Hầu A Lềnh kơ hơdôm bruă prap lui kiăng kơ Jơlan hơdră yôm phăn anai dưi pok pơhai ba glăi tŭ yua.

- Ơ Khua ding jum, thun 2022 lĕ thun blung a jơlan hơdră tui hơnong pơkă dêh čar amăng pơđĭ kyar bơwih ƀong huă - mơnuih mơnam ƀơi kual mơnuih djuai ania ƀiă hăng kual ataih, asuek sit nik pok pơhai rơwang tal 1 ƀơi ƀon lan. Rơkâo Khua ding jum lăi pơthâo hơdôm akŏ bruă amra đing nao kah brơi prăk kak mă yua amăng rơwang tal 1 mơng jơlan hơdră tui hơnong pơkă dêh čar tal anai đing nao hơdôm bruă hơget ñu?

- Khua ding jum Hầu A Lềnh: Amăng jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng kual ataih, asuek rơwang thun 2021-2030 hăng rơwang thun 2021-2025 hơmâo 10 akŏ bruă pơgôp hrŏm. Samơ̆, kiăng kơ yak nao thun 2022, ngă atur brơi hơdôm thun pơ anăp dong, Jơnum min djuai ania hơmâo tŭ ư hăng djop ding jum, gơnong bruă gơnong glông hăng pơmut hrŏm amăng akŏ bruă kah brơi prăk kak mă yua. Anun lĕ đing nao pơsir hơdôm bruă bơdjơ̆ nao sang dŏ, lŏn sang, lŏn ngă hmua, ia yua. Anai lĕ đing nao hơdôm bruă mơnuih ƀon sang kiăng hloh. Dua dong lĕ pơgiong hơdră bruă mă pơlir hơbit kơplah wah gơnong glông hăng ƀon lan kah hăng kiăng hơmâo rơnoh prăk tuh pơ alin lu biă mă.

Tlâo lĕ đing nao mă yua boh thâo măi mok hăng akŏ phun lĕ pơjing hơnong pơkă kiăng kơ sem lăng hơdôm bruă pơphun ngă tui jơlan hơdră anai. Hrŏm hăng bruă anai, ƀing gơmơi ăt kah pha prăk kak mă yua amăng thun 2022 brơi hơdôm bruă anun lĕ gah ia jrao, pơtô pơjuăt, boh thâo gru grua, wŏt bruă wai pơgang rơnuk rơnua, laih dong bruă pơtô pơblang, pơtrut pơsur, pơtô pơhrăm brơi ƀing apăn bruă wai lăng ƀơi djop gưl amăng bruă pok pơhai jơlan hơdră. Hăng đing nao jao bruă kơ Khul git gai mơng gơnong glông truh pơ ƀon lan kiăng kơ pơhlôm ha amăng plĕ kơplah wah gơnong glông hăng ƀon lan.

Khua ding jum, Khua Jơnum min djuai ania Hầu A Lềnh

- Hnun hă! Khua ding jum pơmĭn hiưm pă kơ hơdôm anŏ gal hăng tơlơi tơnap tap lơ̆m pok pơhai jơlan hơdră tui hơnong pơkă dêh čar amăng thun blan dêh čar glăk bơbeč nao kơtang amăng bơwih ƀong huă mơnuih mơnam yua klin Covid-19 ngă ?

Khua ding jum Hầu A Lềnh: Kơ hơdôm anŏ gal mơng jơlan hơdră, blung hlâo lĕ amăng tơlơi pơsit tuh pơ alin mơng Khua dêh čar hơmâo pơhlôm kah pha prăk kak djop brơi jơlan hơdră lĕ 104.000 klai, rơwang thun mơng anai truh thun 2025. Bruă pôr pơhing hơmâo pơphun hăng mơnuih ƀon sang ăt thâo rơđah kơ bruă anai hlâo anun laih.

Hơdôm akŏ bruă anet amăng jơlan hơdră hơmâo pơjing hluai tui tơlơi pơgôp hiăp kah hăng mơng bruă hơduah ĕp tong ten ƀơi djop ƀon lan, djop ding jum, gơnong bruă, yua anun bruă pok pơhai djơ̆ hăng tơlơi rơkâo ră anai, mơ̆ anai lĕ tơlơi pơtrut pơsur kiăng kơ ngă tui tơlơi dưi mơng mơnuih ƀon sang, hrưn đĭ đĭ pơklaih mơng ƀun rin.

Samơ̆, ăt dŏ lu bruă tơnap tap. Găn rơgao thun blan klin kman lar hyu laih rơgao, tơlơi hơdip kơ hơdôm sang anŏ ƀun rin, ră anai jai tơnap tap dong. Yua anun, bruă hơkrŭ glăi mơng neh met wa amra glêh tap mơn. Pơphun ngă tui hơdôm hơdră amăng djop plơi pla ăt bưp tơnap tap pơhmu hăng hơdôm hrơi blung hlâo pơsit ngă tui jơlan hơdră.

Hrŏm hăng anun hơdôm bruă sit nik amra ƀuh lơ̆m pơphun ngă tui jơlan hơdră, pơhmutu lĕ ƀuh lu dong sang anŏ rin rơpa amăng să rin mơng bruă jŭ yap glăi mrô mơnuih rin rơpa thun 2021 tui hơnong pơkă tơnap tap djop mơta. Yua anun, bruă pok prong dong mơnuih, plơi pla kiăng djru amra hrŏ trun prăk tuh pơ alin. Tơdah ƀu tuh pơ alin amăng plơi pla amra ngă bơngŏt amăng mơnuih ƀon sang, kiăng kơ pơtô pơblang hăng pơhrua bruă brơi kơ lăp djơ̆ hloh.

Anai lĕ hơdôm tơlơi tơnap mơ̆ ƀing gơmơi pơsit mơng blung hlâo mơtăm hăng glăk hơmâo hơdôm hơdră bruă kiăng gum hrŏm hăng djop ding jum, gơnong bruă, ƀon lan kiăng pơsir hĭ hơdôm bruă anai.

- Hăng hơdôm tơlơi tơnap tap tui hăng Khua ding jum hơmâo lăi nao, kiăng pok pơhai jơlan hơdră ba glăi tŭ yua mơng blung hlâo mơtăm, gơnong bruă bơdjơ̆ nao hăng djop ƀon lan amra ngă hiưm pă kiăng pơgăn bruă mă yua khưi khai, ƀudah hưp ƀong kông ngăn lơ̆m pok pơhai hơdôm akŏ bruă anai ?

Khua ding jum Hầu A Lềnh: Tui kâo pơmĭn kiăng kơ pơgăn hŭi mă yua khưi khai amăng hrơi blan pơphun ngă tui Jơlan hơdră, ƀudah hơdôm bruă hưp ƀong kông ngăn ăt kiăng đing nao mơn. Samơ̆ hăng pran jua ngă tui tơlơi git gai mơng Ping gah hăng Kơnuk kơna, hơdôm hră pơ-ar, tơlơi pơkă amăng hơdră bruă, tơlơi gơgrong, jao bruă tui gưl mă bruă amra pơgang, pơgăn hơdôm tơlơi ngă soh anai. Amăng anun hơmâo hơdôm hơdră yôm biă mă. Anun lĕ bruă čih amăng hră pơ-ar kiăng kơ tong ten bruă jao, tơlơi glăm ba lĕ yôm phăn biă mă, anai lĕ tơlơi gơgrong mơng djop gưl.

Hrŏm hăng bruă pok pơhai khut khăt mơng hơdôm anom bruă wai lăng mơng Kơnuk kơna kiăng pơtrut krăo lăng mơng Khua pơ ala mơnuih ƀon sang dêh čar, djop khul grup kơđi čar mơnuih mơnam hăng krăo lăng mơng mơnuih ƀon sang, laih dong mơng hơdôm anom bruă pôr pơhing. Tui kâo pơmĭn tơdah pok pơhai ha amăng plĕ mơng djop hơdră bruă anai amra plai ƀiă hơdôm bruă tuh pơ alin ƀu djơ̆ mơnuih, ƀu djơ̆ anih ƀudah hưp ƀong kông ngăn. Ƀing gơmơi ăt đing nao kơ bruă anai amăng bruă čih pơkra hơdôm hră pơ-ar, tơlơi pơkă.

- Hai! Bơni kơ Khua ding jum hơmâo pioh mông bơră ruai amăng hrơi anai.

Siu Đoan: Pơblang