Pơ ala kơ khua git gai Grŭp lăng tui, Kơ-iăng Khua Khul djuai ania mơ̆ng Khua pơ ala mơnuih ƀôn sang dêh čar Nguyễn Lâm Thành brơi thâo, bôh tơhnal lăng tui brơi ƀuh, bruă pơsir kaih (biă ñu prăk bruă mă) lu ñu lĕ yua kơ ƀu đing, lu hră pơ-ar pơtô brơi truh rơnuc thun 2023 mơ̆ng dưi ngă giong, pơplih pơkra, pơhrua nao ngă tui, ba truh bôh tơhnal pơsir prăk hơdôm Jơlan hơdră pơkă mơ̆ng lŏn ia truh lơ 30/9/2023 ƀu lu ôh.

Jơnum min apăn bruă Khua pơ ala mơnuih ƀôn sang dêh čar pơsit bôh tơhnal lăng tui hơdôm Jơlan hơdră pơkă mơ̆ng lŏn ia kaih pơsir (biă ñu prăk bruă mă) phrâo hmâo năng ai ñu 15% (3.800 klai prăk). Tơdah ƀu dưi pơhrư̆i ngăn drăp ngă tui thun 2023 hơdai nao thun 2024 amra ba truh bruă lui hĭ prăk pơkă lăng hlâo thun 2023 năng ai ñu 16.000 klai prăk. Khua Jơnum min prăk kak Ngăn drăp mơ̆ng Khua pơ ala mơnuih ƀôn sang Lê Quang Mạnh lăi đĭ tơlơi gum pơhiăp:

 “Kâo ăt tŭ ư hrŏm mơn hăng tơlơi kiăng hloh mơ̆ng bruă hơdai ngăn drăp anai pioh kơ prăk pioh kơ bruă mă thun 2022 truh ră anai ăt akă pơsir abih mơn, dô̆ glăi năng ai ñu 3.713 klai prăk, yua kơ hlâo kơ Khua dêh čar hmâo lăi pơthâo glăi laih hơdôm hơdră pha ra lĕ akă pel ĕp ôh, anun yơh ƀu dưi pơsir prăk abih črăn prăk anai amăng thun 2023 anai. Khă hnun hai, bơdjơ̆ nao pơkă lăng hlâo prăk mă yua thun 2024 mơ̆ng Khua pơ ala mơnuih ƀôn sang dêh čar hmâo pel ĕp laih, anun rơkâo Ding jum kơčăo bruă tuh pơplai ngă rơđah dong tơlơi anai amăng pơhmăi hăng rơnoh pơkă hlâo mơ̆ng thun 2024 pioh Khua pơ ala mơnuih ƀôn sang hmâo glông jơlan pel ĕp”.

Hăng prăk mă mơ̆ng thun 2024, Kơ-iăng Khua dêh čar Trần Lưu Quang čang rơmang Jơnum min apăn bruă Khua pơ ala mơnuih ƀôn sang dêh čar hăng Khua pơ ala mơnuih ƀôn sang păp ñai hăng hluh brơi đa, yua kơ tơhnal ba tơbiă mơ̆ng bruă pơplih ngăn drăp anai jing prong biă pioh kơ hơdôm bôh tơring čar, ƀôn prong. “Tơdah pơđut hĭ ngăn rơnoh anai amra tơnap biă pơsir prăk mơ̆ng Gong gai dêh čar hmâo hrŏ trun, samơ̆ păp kơ hơdôm bôh tơring čar. Tơring čar ƀôn prong glăk čang rơmang biă, kiăng biă. Kơ-iăng Khua dêh čar Trần Lưu Quang lăi:

 “Ngăn rơnoh anai bôh nik ñu brơi kơ 3 jơlan hơdră anai ƀu lu ôh. Tơhnal pơkă mơ̆ng ƀing ta prong đơi, yua anun yơh, tơdah ră anai ƀing ta abih bang kah hăng ƀu dưi pơhrua nao thơ, tơnap kơ tơring čar, ƀôn prong. Tơlơi ră anai mrô prăk prong hloh gun hĭ bơdjơ̆ nao tơlơi pơsir hăng prăk kơ bruă mă ƀudah prăk mă yua na nao. Bơ̆ prăk yua pioh pơđĭ kyar lĕ, phun ñu tơdah ƀing gơmơi ngă tui đut tơhnal mơ̆ng ră anai truh lơ 31/1/2024 kơnong kơ dô̆ năng ai ñu rơbêh kơ 1 rơbâo klai prăk. Samơ̆ kơnong kơ prăk pioh kơ bruă mă ƀơi hơpă thơ năng ai ñu 4 rơbâo 500 prăk, samơ̆ bôh nik ñu ngăn rơnoh anai tơnap biă. Tơdah brơi hơdră pơtrun đut hlah amăng rơwang 7 hrơi Lăi pơthâo glăi mơ̆ng Gong gai mơ-ĭt nao hăng hmao lĕ ƀing gơmơi amra pok phun amăng lơ 28/11".

Klah čun mông jơnum, Khua git gai wai lăng pơ ala mơnuih ƀôn sang dêh čar Vương Đình Huệ brơi thâo, rơgao bơkơtuai brơi ƀuh, ƀing khua pơ ala phun ñu tŭ ư hăng bruă mă yua tơlơi pơtrun pơsit pơkă pha ra tui hơdră ngă rơguăt, samơ̆ hơdră pơdah ñu hiưm hơpă khom črông sai rơđah tui pran jua hmâo pơkă.

Hăng hơdôm tơlơi gah ngăn drăp kah hăng pơsit ngăn drăp mă yua, pơhrư̆i ngăn rơnoh, Khua git gai wai lăng pơ ala mơnuih ƀôn sang dêh čar rơkâo Kơ-iăng Khua dêh čar črâo ba hơdôm ƀirô prăp lui lăi pơthâo sit nik mơ̆ng Gong gai dêh čar kơ tơlơi anai; jao Jơnum min prăk kak, Ngăn drăp mơ̆ng Khua pơ ala mơnuih ƀôn sang pel ĕp glăi bôh yôm anai. “Pran jua lĕ pơtlaih đut hlah tơlơi gun amăng ngă tui hơdôm jơlan hơdră pơkă mơ̆ng lŏn ia samơ̆ ƀu dưi ba tơbiă tơlơi ƀu djơ̆ hrŏm amăng tơlơi phiăn”.

 “Ngăn drăp mơ̆ng thun 2024 phrâo rơgao pơkă laih, tơdơi anai dô̆ bơdjơ̆ nao bruă jŭ yap, pel ĕp glăi, pơsit mă yua ngăn drăp. Tui pran jua mă mơ̆ng thun 2023 hơdai nao thun 2024 đôč. Pran jua khom ngă djơ̆ tơlơi phiăn hăng ngă rơđah hmâo tơlơi ƀu djơ̆ hrŏm amăng tơlơi phiăn mơ̆n? Gah tơlơi dưi pel ĕp lĕ, Khua pơ ala mơnuih ƀôn sang dêh čar amra pơsit samơ̆ hmâo tơlơi ƀu djơ̆ hrŏm hăng tơlơi kơ pơsit prăk ngăn drăp mă yua mơ̆m? hmâo tơlơi ƀu djơ̆ hrŏm mơn hăng tơlơi jŭ yap, pel ĕp glăi, pơsit ngăn drăp mă yua mơ̆n? tơlơi ƀu djơ̆ hrŏm hăng Tơlơi pơsit mơ̆ng Khua pơ ala mơnuih ƀôn sang mơ̆n? Khom pơsit ngă pơtrut truh ngăn drăp”./.