VOV4.Jarai - Kơ bruă mơnuih Việt Nam hơmâo arăng plư pleč iâu nao mă bruă pơ dêh čar Kur, ƀơi mông jơnum mă tơlơi pơhing phrâo anai, Pô truh pơhiăp Ding jum pơtom hiăp Lê Thị Thu Hằng brơi thâo, hơdôm anom bruă pơ ala brơi Việt Nam ƀơi dêh čar Kur hơmâo pơhiăp nao rai na nao hăng ding jum, anom bruă ƀơi dêh čar, biă ñu lĕ hơdôm plơi pla giăm guai, laih anun hơdôm anom apăn bruă ƀơi dêh čar Kur hơmâo ngă lu bruă pơgang ba, djru brơi mơnuih tơnap tap, bưp tơlơi truh či ba glăi pơ dêh čar. Khua anih jưh pơ ala Việt Nam ƀơi dêh čar Kur hơmâo mrô telephôn iâu ječ pơgang ba mơnuih ƀon sang rim hrơi 24/7, ăt kah hăng hơmâo mrô iâu ječ mơng Anom bruă anih jưh pơ ala dêh čar hmư̆ tơlơi lăi pơthâo mơng ƀing bưp tơlơi truh, ăt kah hăng tơlơi pơhŭi hlâo pơkŏn. Hăng tơlơi ngă hrŏm mơng hơdôm anom bruă amăng dêh čar wơ̆t hăng ƀơi dêh čar Kur, truh mông anai, hơdôm anom bruă dua bơnah hơmâo ba glăi pơ dêh čar năng ai 400 čô mơnuih, djru brơi ngă hră pơ-ar djơ̆ tơlơi phiăn hăng năng ai 1.500 čô mơnuih tơnap tap amăng bruă nao rai, pơkă hrơi dŏ glăi ƀudah ngă soh tơlơi phiăn ƀơi dêh čar gơñu glăk dŏ hơdip. Ding jum pơtom hiăp hăng hơdôm anom bruă pơ ala brơi pơ dêh čar tač rơngiao amra ngă hrŏm hăng hơdôm anom bruă amăng dêh čar ta hăng dêh čar Kur či hyu hơduah ĕp, pơsir hĭ tañ hơdôm bruă soh sat anai.

Siu H’Mai: Pơblang