Phrâo anai, ƀơi tơring čar Dak Nông hơmâo pơphun Jơnum pơtruh bruă pơkra gơnam hăng sĭ gơnam mơ̆ng hmua, hơmâo rơbêh 30 anom bơwih ƀong mơ̆ng ƀôn prong Hồ Chí Minh hrŏm hăng giăm 200 čô pơ ala mơ̆ng anom bơwih ƀong, anom ngă ƀong hrŏm, mơnuih ngă hmua mơ̆ng tơring čar Dak Nông. Ƀơi mông jơnum, hơdôm anom bơwih ƀong mơ̆ng ƀôn prong Hồ Chí Minh hrŏm hăng hơdôm anom bơwih ƀong, anom ngă ƀong hrŏm, mơnuih ngă hmua ƀơi tơring čar Dak Nông bơkơtuai tơpă ară hơdôm bruă ngă hrŏm pơtruh nao rai pơkra gơnam ba sĭ hăng čang rơmang mơ̆ng hơdôm bơnah. Ơi Nguyễn Văn Mười, Khua anom bruă gah Dơnung gah Kul ngă đang hmua Việt Nam brơi thâo:

“Bơdjơ̆ nao hơdôm tơlơi kiăng mơ̆ng rim anom bơwih ƀong lĕ gơmơi hơmâo pơƀut mơ-it kơ Khul mơnuih ngă hmua tơring čar laih anun amra mơ-it nao pơ hơdôm anom ngă ƀong hrŏm. Gah anom ngă ƀong hrŏm, gơmơi ăt rơkâo khul mơnuih ngă hmua pơƀut hơdôm tơlơi pơhing mơ̆ng anom ngă ƀong hrŏm kơ tơlơi rơgơi mơ̆ng ƀing gơñu, tui anun anom ngă ƀong hrŏm hơmâo anŏ hơget laih anun ƀing ta kiăng pơtruh nao rai ngă hrŏm hiư̆m pă”.

Pơhiăp ƀơi mông jơnum, ơi Hồ Văn Mười, Khua jơnum min mơnuih ƀôn sang tơring čar Dak Nông pơsit, ngă hmua mă yua boh thâo phrâo jing sa amăng 3 gong tơmeh phun pơđĭ kyar bơwih ƀong mơ̆ng tơring čar. Hăng hơdôm tơlơi gêh gal kơ lŏn tơnah, ia pruih, ayuh hyiăng...,tơring čar hơmâo gêh gal prong biă pơđĭ kyar ngă hmua pơlir hăng tuai čuă ngui pơdơi pơdă. Tơring čar jak iâu hăng amra djru ngă gal brơi kiăng hơdôm anom bơwih ƀong tuh pơ alin pơ Dak Nông.

“Kơđiăng lui mơ̆ng mông jơnum bơkơtuai anai lĕ thun tơdơi ƀing ta amra ngă tui prong hloh, kâo pơmin amra tŭ yua hloh. Khă hnun, mơ̆ng mông jơnum anai kâo čang rơmang amra bang hyu bruă gơnam mơ̆ng hmua mơ̆ng kual Dap Kơdư lăi hrŏm hăng Dak Nông lăi hơjăn hăng mơnuih blơi gơnam, ngă hiư̆m pă kiăng gơnam mơ̆ng hmua nao djơ̆ anih, klă, hăng nua găp ƀrô, biă ñu djru kơ mơnuih ngă hmua dưi pơđĭ kyar gơnam mơ̆ng hmua mơ̆ng ƀing gơñu; ngă hiư̆m pă kiăng huăi hơmâo bruă djơ̆ bơyan mơ̆ nua rơgêh hăng kơđai glăi, anăm brơi hơmâo bruă djru blơi gơnam sĭ ƀu kloh”.

Hrơi blan rơgao, anom bruă tuh tia pơkra gơnam lêng pơƀut pơtrut bruă jơnum đĭ kyar sĭ mơdrô đah mơ̆ng pơtruh nao rai mơnuih blơi gơnam mơnuih ƀôn sang, amăng anun hơmâo mơnuih ƀôn sang djuai ƀiă kual čư̆ siăng hăng kual ataih asuek. Ding jum tuh tia pơkra gơnam hrŏm hăng hơdôm boh tơring lêng kơ gir run kiăng gơnam tam hơmâo pơƀuh hyu djŏp anih laih anun hơmâo lu mơnuih hơduah ĕp. Bình Phước jing anih hơmâo lŏn tơnah hiam, ayuh hyiăng lăp djơ̆ či pơđĭ kyar phun boh ñông, hơmâo lăng kah hăng anih pla boh nông lu hloh hăng 50% đơ đam lŏn hăng rơbêh 54% mrô boh ñông amăng dêh čar. Yă Thân Thị Xiêm - Khua kông ti TNHH sa ding kơna An Thuận Phát brơi thâo:

“Ƀing gơmơi nao hrŏm hăng neh met wa ƀơi Bình Phước, mơ̆ng mơnuih djuai ƀiă, wơ̆t hăng mơnuih ƀôn sang djuai ania Stiêng, gơmơi dŏ hrŏm sui thun laih jing pơtruh hrŏm neh met wa lơ̆m bơya hơjan truh, hơdôm tơlơi tơnap mơ̆ng neh met wa lĕ ƀing gơmơi djru ba, laih anun lơ̆m hơmâo pĕ pơhrui lĕ gơmơi ăt hrŏm hăng neh met wa gơgrong bruă, kiăng ba boh ñông pơ sang măi pơkra, djơ̆ anăn gơnam mơ̆ng Bình Phước kiăng djru ba neh met wa tơdơi kơ hrơi hơjan hlim hăng tơdơi hrơi pĕ pơhrui, yua dah neh met wa pơ Bình Phước kơnong kơ phun ñông yơh jing gơnam pơhrui phun”.

Ngă tui kơčăo bruă pơtruh pơkra gơnam hăng ba sĭ gơnam mơ̆ng hmua, Lâm Đồng hơmâo akŏ pơdong hăng pơđĭ kyar hơdôm rơtuh anih sĭ mơdrô hrŏm, hăng giăm 16.000 boh sang anŏ tơjŭ pla laih anun năng ai 2 rơbâo ha mơkrah sang anŏ rông hlô. Hơdôm anih pơtruh nao rai pơkra gơnam anai hơmâo ngă prong hăng rơbêh 30 rơbâo ha phun pla djŏp djuai hăng pŭ hlô rông mơnŭ bip năng ai 850 rơbâo drơi. Ơi Nguyễn Văn Châu, Kơ-iăng khua gơnong bruă hmua hăng pơđĭ kyar ƀôn lan Lâm Đồng brơi thâo, kơčăo bruă anai hơmâo prăk tuh pơ alin năng ai 270 klai prăk. Bruă kiăng hơmâo truh rơnuč thun 2023, tơring čar hơmâo 200 anih pơtruh ngă hrŏm pơkra gơnam hăng ba sĭ gơnam mơ̆ng hmua, hăng 30% mrô gơnam mơ̆ng hmua yôm phun amra hơmâo ba sĭ tui hră kĭ pơkôl.

“Abih bang gơnam pơkra tui anih pơtruh pơkra sĭ gơnam hơđong hơmâo pô blơi, pơđĭ tui nua gơnam, pơhlôm hơdjă gơnam ƀong huă yua ngă hmua kiăo tui hơdră pơkra gơnam abih bang, lăp djơ̆ hăng tơlơi kiăng mơ̆ng anih sĭ mơdrô. Khă hnun, mrô gơnam mơ̆ng tơring čar Lâm Đồng jai hrơi đĭ kyar tui tơlơi kiăng ba sĭ gơnam hơđong hluai tui hơdôm anih pơtruh nao rai pơkra gơnam dŏ prong, lơ̆m anun prăk kơnuk kơna lĕ aset đôč. Yua hnun, amăng akŏ bruă ngă hmua phrâo thun 2022-2025 phrâo hơmâo tơring čar pơsit lĕ ăt djru ba prăk kăk či pok prong hăng pơđĭ kyar hloh hơdôm anih pơtruh nao rai pơkra gơnam phrâo”.