VOV4.Jarai - Kơ-iăng khua dêh čar ơi Lê Minh Khái phrâo kĭ hră brơi čan prăk hăng ƀing čơđai sang hră gưl anet, prong sang anŏ tơnap či blơi măi computer, gơnam yua gah bruă hrăm mơng ataih. Tơlơi pơsit anai lăi rơđah, čơđai sang hră khŏm hơmâo hơdôm tơlơi pơkă anai kah mơng dưi čan: sang anŏ rin, giăm rin, sang anŏ dŏ kơƀah mơn tui hăng tơlơi phiăn pơkă, ƀudah sang anŏ tơnap tap yua klin Covid-19 ngă (hơmâo amĭ ama djai ƀudah ama ƀudah amĭ djai yua klin Covid-19). Tal dua lĕ ƀu hơmâo măi computer, măi pioh hrăm mơng ataih laih anun aka ƀu hơmâo mă prăk djru blơi măi hơget ôh pioh hrăm mơng ataih. Hrơi pơkă brơi čan sui biă mă 36 blan. Kơmlai ñu 1,2%/thun. Kơmlai tơdah tla rơgao hrơi pơkă dưm dưm hăng kơmlai brơi sang anŏ rin čan mă ƀơi mông čan prăk mơn. Tơlơi pơtrun anai dưi mă yua mơng lơ 4/4/2022.

Siu H’Mai: Pơblang