Nao čuă hăng rơngôt hrŏm hăng sang anô̆ pô djai, Kơ-iăng Khua Ding jum Nguyễn Quốc Trị rơkâo gong gai tơring glông Ea Kar đing nao truh tơlơi hơdip mơda gơnam tam, pran jua, ngă gal brơi djru sang anô̆ pô djai yak rơgao tơlơi rơngiă ngiom kiăng tañ hơđong glăi tơlơi hơdip mơda sang anô̆ hăng bruă hrăm hră mơ̆ng ƀing čơđai.

Khul wai lăng glai klô, Gơnong bruă đang hmua tơring čar Dak Lak gum hrŏm kơjăp hăng khul pơgang glai tañ pel ĕp, ngă rơđah kơđi tơlơi hăng ngă tui hơdôm hơdră gum djru tui djơ̆ tơlơi pơkă pioh kơ mơnuih mă bruă pơgang glai klô hmâo arăng pơanăh pơdjai. Tal anai, Grŭp hyu mă bruă mơ̆ng anom bruă đang hmua hăng pơđĭ kyar ƀôn lan, Gơnong bruă đang hmua hăng pơđĭ kyar ƀôn lan tơring čar Dak Lak hrŏm hăng anom bruă, mơnuih thâo tơngia ƀơk brơi gơnam djru sang anô̆ tañ hơđong tơlơi hơdip mơda./.