VOV4.Jarai-Djru ba mơnuih hơmâo gum pran bruă hơkrŭ lŏn ia sa jơlan hơdră phara biă mă kiăng ngă tui tơlơi juăt “Ƀong boh hơdor kơ pla, mơñum ia hơdor kơ pô klơi” mơ̆ng Ping gah, Kơnuk kơna ta pioh kơ mơnuih hơmâo pơyơr pran jua, tuh drah pơčah asar kơ bruă hơkrŭ lŏn ia. Yap mơ̆ng hrơi Khua mir sir Hồ Chí Minh mă lơ 27/7 jing hrơi hơdor kơ tơhan rơka hăng mơnuih pơsăn drơi jăn kơ lŏn ia, 75 thun rơgao, tơlơi phiăn dêh čar ta, jơlan hơdră djru mơnuih ngă hơkrŭ kơ lŏn ia, hơmâo pok pơhai hlom bom, ƀu kơnong pơdah rai bruă mă djru ba yôm mơ̆ng Ping gah, Kơnuk kơna hăng mơnuih ngă hơkrŭ đôč ôh, dŏ djru hrom yôm hloh amăng bruă pơhlôm brơi bruă mă pơgang tơlơi hơdip mơda kơ mơnuih mơnam, pơđĭ kyar lŏn ia hơđong kjăp.

Hăng bruă mă hơmâo jơlan hơdră djru kơ mơnuih hơmâo gum kơnuk kơna jai hrơi klă hloh laih anun glông bruă kơđi čar pok pơhai sa amăng plĕ, bruă mă djru ba mơnuih hơmâo ngă hơkrŭ lŏn ia pơblih lu laih, pơjing rai bruă mă hur har hơdor tơngia tla pran lu tui, ngă hrom sa amăng plĕ mơ̆ng gơnong dlông truh pơ plơi pla, ƀôn ƀut. Truh ră anai, đơ đam dêh čar hơmâo pơtong glăi hơmâo rơbêh 9 klăk 200 rơbâo čô mơnuih tuh rơyuh pran kơ bruă hơkrŭ lŏn ia, amăng anun rơbêh 1 klăk 300 rơbâo čô mơnuih kơnuk kơna djru ba hơmâo prăk blan. Rĭm thun pơsir tơlơi djru ha wơ̆t kơ mơ̆ng 6 truh 8 rơbâo čô mơnuih, ba nao 580 rơbâo wơ̆t mơnuih hơmâo djru kơnuk kơna pioh pơkă lăng pơjrao duăm ruă rĭm rơwang pơkă laih anun djru pơtô hrăm kơ năng ai 40 rơbâo wơ̆t, hơmâo mơnuih sang anŏ djru kơnuk kơna. Rơnoh prăk djru kơ mơnuih hơkrŭ pơkă pơblih tui hluai anŏ gêh găl hăng pơđĭ tui kah hăng prăk blan pơkă mơ̆ng rơnoh kơnuk kơna blung a laih anun đĭ tui ƀơƀrư̆.

Grup pơ ala mơnuih ngă hơkrŭ nao čuă plơi prong jưh jom Hà Nội

Tui hăng Hră pơtrun  mrô 75, lơ 24/7/2021 mơ̆ng Kơnuk kơna, pơkă hnong tŭ mă tơlơi djru, prăk apah hăng tơlơi lăng ba mơ̆ng kơnuk kơna pioh kơ mơnuih ngă hơkrŭ lŏn ia hơmâo pơblih pơđĭ tui, rơnoh prăk đĭ truh 800 klai prăk pơkă amăng 10 mơta jơlan hơdră djru ba phrâo kơ mơnuih ngă bruă hơkrŭ wơ̆t hăng mơnuih amăng sang anŏ gơñu hai. Prăk djru kơ sang anŏ djă pơsat mơnuih pơsăn drơi jăn kơ lŏn ia mơ̆ng 500 rơbâo prăk sa čô, sa thun đĭ tui 1.400.000 prăk; prăk djru pơjrao duăm ruă lăng ba pơ sang anŏ mơ̆ng 1.110.000 prăk đĭ tui truh 1.462.600 prăk sa thun sa čô; rơnoh prăk djru pơjrao pơ anih pơtum mơ̆ng 2.200.000 đĭ tui 2.923.200 prăk sa thun sa čô.....Ơi Châu Văn Đa, Khua anom wai lăng mơnuih hơkrŭ kơ lŏn ia, Gơnong bruă Mă bruă Tơhan rơka hăng Mơnuih mơnam tơring čar Trà Vinh lăi:

"Ngă tui jơlan hơdră djru kơ mơnuih hơkrŭ lŏn ia lĕ tơring čar Trà Vinh ră anai hlăk wai lăng giăm 65 rơbâo čô mơnuih hơmâo gum pran kơ bruă hơkrŭ, amăng anun 19 rơbâo čô mơnuih djai pơsăn drơi jăn kơ lŏn ia, hăng tơhan rơka rơkač lĕ hơmâo 11 rơbâo čô hăng lu ƀing pơkŏn dơ̆ng. Ră anai, tơring čar Trà Vinh hlăk djru ba giăm 12 rơbâo čô mơnuih hơmâo djru kơ kơna, arăng djru ba rĭm blan. Ră anai, tui hăng tơlơi pơkă, Gơnong bruă Mă bruă Tơhan rơka hăng Mơnuih mơnam lăi, hơmâo ba prăk djru anai mơ̆ng lơ 1 truh lơ 10 hăng dua dơ̆ng lĕ hơdră tla prăk dưi mơ-it kơ sang dăng kông djă ba brơi laih anun ngă tui giong mơtam hlâo kơ lơ 10 rĭm blan”.

Yă Hồ Thị Châu Loan, Kơ-iăng Khua Gơnong bruă Bruă mă Tơhan rơka hăng Mơnuih mơnam tơring čar Nghệ An brơi thâo, tơring čar ră anai, hơmâo rơbêh 68 rơbâo čô mơnuih ngă hơkrŭ, dong tal 3 amăng dêh čar. Rĭm blan prăk kơnuk kơna tla kơ mơnuih hơmâo djru bruă hơkrŭ truh kơ 136 klai prăk.

“Rĭm thun lơ 27/7, tơring čar hơmâo pơkra hơdră pioh pơphun bruă mă hơdor glăi Hrơi pioh kơ tơhan rơka rơkač hăng ƀing djai pơsăn drơi jăn kơ lŏn ia amăng tơring čar tŭ yua hăng yôm biă mă. Mah tơring čar dŏ lu tơlơi tơnap, mơnuih ngă hơkrŭ lu, samơ̆ gơmơi ăt gir run ngă tui klă hơdră kơnuk kơna djru kơ mơnuih hơmâo gumpran jua kơ bruă čar, kiăng hmao kru. Hơdor glăi tal 75 thun hrơi tơhan rơka rơkač hăng ƀing djai pơsăn drơi jăn kơ lŏn ia, rơngiao kơ bruă mă kah hăng tơđar, thun anai tơring čar dŏ hơmâo lu bruă mă, anun lĕ gơmơi pơphun jơnum bưp ƀô̆ mơta, bơni kơ mơnuih ngă hơkrŭ ba gru hlâo amăng tơring čar”.

Ơi Nguyễn Bá Hoan, Kơ-iăng Khua Ding jum Bruă mă Tơhan rơka hăng Mơnuih mơnam bưp ƀing ngă hơkrŭ

Rơngiao kơ jơlan hơdră mơ̆ng Ping gah, Kơnuk kơna, tơlơi gum hrom mơ̆ng mơnuih ƀôn sang djru kơ sang anŏ, mơnuih hơmâo gum kơnuk kơna ăt dưi đing nao hăng pơphun ngă bruă sit nik. Kơnong yap mơ̆ng thun 2011, bruă mă hơdor tơngia tla pran amăng đơ đam dêh čar ta hơmâo pơplai truh 5.600 klai prăk, man pơdong phrâo giăm 39 rơbâo boh sang hơdor tơngia, pơkra ming glăi 25 rơbâo boh sang sô hăng rơnoh prăk truh 13 rơbâo klai prăk; đơ đam dêh čar ta hơmâo rơbêh 4 rơbâo 100 čô neh wa arăng pơ anăn amĭ Việt Nam khin hơtai sông kơtang dŏ hơdip, dưi hơmâo djop anom bruă tŭ jum čem rông ba tơl abih tơlơi hơdip.

Truh rơnuč thun 2020 hơmâo giăm 99% mrô sang anŏ hơmâo djru kơnuk kơna hơmâo tơlơi hơdip bơkơnar ƀudah đĭ hloh tơhnal pơkă pơdưm abih bang mơnuih ƀôn sang anih dŏ; rơbêh 98% mrô să, phường, tơring kual ngă klă bruă djru tơhan rơka rơkač, sang anŏ mơnuih djai pơsăn drơi jăn kơ lŏn ia, mơnuih ngă hơkrŭ; kơtưn gir ngă giong bruă djru pơdong sang dŏ brơi kơ mơnuih hơmâo gum kơnuk kơna kiăng huăi hơmâo sang anŏ hlơi djơ̆ anăn sang anŏ ƀun rin. Ơi Nguyễn Bá Hoan, Kơ-iăng Khua Ding jum Bruă mă Tơhan rơka hăng Mơnuih mơnam brơi thâo:

“Thun blan rơgao, bruă mă mơnuih ƀôn sang djru hrom wai lăng, čem rông ba mơnuih ngă hơkrŭ hơmâo ngă klă laih. Bruă jak iâu djop anom bruă, khul mơnuih mơnam mut phung, ƀing mơnuih pơdrong čơmah lăng ba tơlơi hơdip mơda sang anŏ ƀing djru kơnuk kơna laih anun rông ba neh wa amĭ Việt Nam khin hơtai, laih anun lăng ba pơsat gong kut tơhan pơsăn drơi jăn kơ lŏn ia, man pơdong pra yang, anih h’ŭ kơ tơhan pơsăn drơi jăn kơ lŏn ia….ƀơi lu tơring čar pok pơhai tŭ yua biă mă, hơmâo tơlơi djru ba mơ̆ng djop gưl gong gai kơnuk kơna hăng mơnuih hơmâo pran jua čơmah, anom bruă sĭ mơdrô djru hrom.

Ƀrô djơ̆ hơdor glăi tal 75 thun, djop gưl gong gai kơnuk kơna hơmâo mă yua hơdôm rơtuh klai prăk dêh čar, prăk tơring čar, plơi pla hăng lu rơnoh prăk mơ̆ng sang bruă wai lăng djop djuai ania mơnuih mơnam Việt Nam, djop khul grup wai lăng čem rông, djru hrom mơnuih ruă nuă, tơhan rơka rơkač hăng sang anŏ ƀing hơkrŭ kơ lŏn ia laih anun ta đăo kơnang bruă mă anai ăt dưi đing nao lu hloh hăng pơtrut ngă tui klă kơñ pơgi ni anăp”.

Nay Jek: Pơblang