Mơ̆ng tơlơi pơhing mơnuih ƀôn sang dêh čar lăi pơthâo, Grup K51, sang bruă khua tơhan tơring čar Dak Lak hơmâo nao sem hăng ĕp ƀuh, rŭ kuai per tơlang tơhan djai pơsăn drơi jăn yua kơ lơ̆n ia ƀơi plơi Phum Vai Yoong, să Busara, tơring Betchanđa, tơring čar Mondulkiri.

Dua per tơlang tơhan pơsăn drơi hơmâo ĕp ƀuh ƀơi ter hang ia Dak Dam, hrŏm hăng lu gơnam dor hrŏm kah hăng jep kơsu, boh nut ao tơhan, mong huă asơi pơkra hăng pơsơi B52 hăng blŏ gêt ia jrao. Bruă rŭ kuai mă per tơlang anai amăng hơdôm hrơi blung a tơgŭ hyu ĕp bơyan phang anai, jing boh tơhnal ngă bruă tong ten, khut khăt ba mơtam, pơsit tơlơi pơhing mơ̆ng mơnuih ƀôn sang lăi pơthâo. Grup K51, sang bruă khua tơhan tơring čar Dak lak ăt gir run ngă bruă hyu ĕp, rŭ kuai tơlang tơhan djai pơsăn drơi jăn yua kơ lơ̆n ia ta dŏ glăi ƀơi dêh čar Kur; laih dơ̆ng djru hrŏm amăng bruă mă jak iâu 500 hrơi mlam, sơ̆n pran jua hyu ĕp tơlang ƀing ană bă ling tơhan tuh drah pơčah asar yua kơ lơ̆n ia, kiăng ba glăi ƀing gơñu glăi pơ plơi pla pô, hăng phung wang, sang anŏ amăng dêh čar pô.