Ƀơi dêh čar Kur, amăng thun anai, Grup K52 tơring čar Gia Lai hơmâo hyu ĕp, hơduah rŭ mă amăng 101 boh plơi, gah 3 boh tơring čar Ratanakiri, Stung Treng hăng Prehvihiar. Pơƀut mă hơmâo 81 tơlơi pơhing hăng rŭ hơmâo 18 per tơlang tơhan pơsăn drơi jăn kơ lŏn ia, hơmâo pơđĭ tui mrô tơlang tơhan djai pơsăn drơi jăn kơ lŏn ia mơ̆ng thun 2001 truh ră anai lĕ 1446 čô. Ăt amăng thun 2022, Grup K52 hơmâo hyu hơduah ĕp ƀuh 28 per tơlang tơhan pơsăn drơi ƀơi lu tơring čar. Abih bang lêng kơ pơphun h’ŭ hăng ba dor pơ pơsat gong kut djơ̆ anih.

Grup tơhan K52 dưi tŭ mă Miđai blah dưi mrô Klâo mơ̆ng Khua mir sir apah bơni

Tơring čar Gia Lai pơsit bruă mă amăng thun 2023, gir hyu ĕp mơ̆ng 40-60 per tơlang tơleh tơhan pơsăn drơi yua kơ lŏn ia. Ăt ngă tui bruă hyu ĕp hăng rŭ glăi tơlang tơleh tơhan pơsăn drơi mơ̆ng Việt Nam dŏ glăi pơ dêh čar Kur, tŭ ư hơdră či mă bruă, hyu hơduah ĕp, pơtum hăng rŭ glăi hơdôm tơlang tơleh ƀing tơhan pơsăn drơi aka ƀu hơmâo tơlơi pơhing tum teč.