Hlâo kơ anun, lơ̆m dŏ ngă hmua, ơi Ksor Tân, tơkeng thun 1980, plơi Sơr, ƀuh čơđeh tơlang, jing ñu đing lĕ tơlang tơhan. Ayong Tân lăi pơthâo hăng Sang bruă khua git gai tơhan să Ia Boòng hăng Grup K52 nao sem lăng, pơsit brơi. Tơdơi kơ pok prong anih hyu ĕp, tơhan hơmâo ƀuh thim 2 per tơlang hrŏm hăng gơnam hơmâo pơtui. Tui anun, yap truh kơnôl 13/8, ƀu hơmâo kaih ôh, Tơhan K52 hơmâo rŭ đĭ 8 per tơlang tơhan ƀơi plơi Sơr, să Ia Boòng. Ră anai, hơdôm per tơlang hrŏm hăng gơnam hơmâo dor tom glăk hơmâo Tơhan K52 răk pioh, tơguan či pơsit tong ten, bơwih brơi bruă pơsit anăn krăn pô hăng ba nao dor tui tơlơi pơtrun.

Kơnôl 13/8, ƀing tơhan hơduah ĕp mơ̆ng Khul git gai ngă tui Bruă mă 500 hrơi mlam pơtrut hmar hơduah ĕp, rŭ kuai mă hăng pơsit anăn krăn pô tơhan djai pơsăn drơi jăn yua kơ lŏn ia ƀơi phường Nam Nha Trang, tơring čar Khánh Hòa, hơmâo ƀuh lu tơlang dŏ đing đăo lĕ tơhan ƀing tơhan pơsăn drơi ƀơi sang ia jrao tơhan đưm, lơ̆m rơ-ưng pơtâo, gah anih ngă hơkrŭ Đồng Bò. Hlâo kơ anun, kơnôl 4/8, ơi Nguyễn Văn Hưng, 65 thun, dŏ ƀơi grup Phước Tân, phường Nam Nha Trang, lăi pơthâo tơlơi pơhing kơ sang bruă kơnuk kơna ƀuh tơlang mơnuih djai ƀơi anih lăi sang ia jrao tơhan rơnuk blah ngă đưm, lơ̆m ñu hyu glai hlăk anun, rơgao hăng anai 20 thun laih. Mơ̆ng tơlơi pơhing anun, ƀing khua mua, ling tơhan phường Nam Nha Trang pơphun lu grup, hyu lu hrơi ĕp tui hăng tơlơi pơčrâo ba mơ̆ng ơi Hưng. Truh mơguah kơnôl 13/8, tơhan kơnuk kơna ĕp ƀuh tơlang thung prong, đing đăo tơlang tơhan pơsăn drơi jăn kơ lŏn ia. Anih ĕp ƀuh anun hlăk guang dar hĭ, pơgang tong ten hăng lăi pơthâo khua mua pơ dlông nao pơtong glăi, pơsir djơ̆ tơlơi phiăn.