VOV4.Jarai - Tui hăng jơlan hơdră ngă bruă dêh čar kơ hrŏ trun sang anŏ rin hơđong kơjăp thun 2022 phrâo pơtrun, Jơnum min mơnuih ƀon sang tơring čar Gia Lai git gai hơdôm boh tơring glông, anom bruă pok pơhai abih bang hơdră ngă bruă đah mơng pơhrŏ trun 2% mrô sang anŏ rin hăng 3% mrô sang anŏ rin mơnuih djuai ƀiă.

Gia Lai djru ba mơnuih ƀon sang hrŏ trun hơđong tơlơi rin.

Gơnong bruă Mơnuih mă bruă - Tơhan rơka hăng Mơnuih mơnam tơring čar Gia Lai amra lăi pơthâo pơtô brơi gong gai, ping gah plơi pla hơdôm hơdră ngă bruă rơđah, djru ba sang anŏ rin tơklaih mơng tơlơi rin rơpa. Laih dong mă yua klă prăk djru mơng Kơnuk kơna, ngă hrŏm hăng djŏp jơnum min, khul grup, anom bruă mơnuih mơnam djŏp gưl đah mơng iâu pơthưr anom bơwih ƀong, mơnuih ƀon sang djru ba kơ mơnuih rin bơwih ƀong. Amăng hơdôm thun rơgao, tơring čar Gia Lai hơmâo tuh pơ plai rơbêh 1.270 klai prăk mơng bruă tơring čar, pơphun ngă lu bruă djru sang anŏ rin hrăm bruă, pơplih bruă rông gơnam pla phun, blơi hră pơhlôm nua ia jrao, khăm pơjrao brơi đôč.

Siu H’Mai: Pơblang