Tơdơi kơ ha wơ̆t hrơi tơjuh tung tut ƀơi ia rơsĭ, ƀattô hyu mă akan hơdang mơ̆ng sang Đỗ Văn Tiến, phường Hoài Nhơn Đông, tơring čar Gia Lai glăi truh pơ hang rơnuk rơnua, djơ̆ hăng tơlơi pơkă ba glăi akan bă čơgăn dưm akan. Tui hăng ơi Tiến lăi, bruă hyu mă akan hơdang amăng ia rơsĭ ră anai jai hrơi arăng pơkă tong ten biă mă. Hơdôm tơlơi soh hyu mă akan kah hăng aka ƀu hơmâo hră brơi hyu mă, hyu mă akan ƀơi kual ia rơsĭ arăng kom, ngă ƀu djơ̆ bruă juăt thâo, nao rơgao ling pơkă guai; ƀu djă hnơ̆ng pơtruh nao rai tơlơi pơhing re se hăng ƀing dŏ krăp lăng; ƀu hơmâo čih pioh ƀudah čih pioh ƀu tơpă hrơi mông hyu mă bruă trah akan; mă yua gơnam mă akan anŏ arăng kom ƀudah hyu mă akan truh pơ anih ia rơsĭ dêh čar arăng....lêng kơ pơsir kơđi khut khăt. Yua kơ anun, bruă kiăng thâo tong ten djop tơlơi pơtrun anun jing juăt tui laih hăng yom biă mă kơ rim wơ̆t či trun nao amăng ia rơsĭ mă akan hơdang.

“Kơnuk kơna hơmâo ngă hră pơtrun, ƀing tơhan pơgang guai dêh čar, tơhan hyu ĕp lăng bruă mă akan hơdang rim blan hyu pơtô lăi brơi ƀing gơmơi mơnuih ƀôn sang dŏ ter hang ia rơsĭ. Čang rơmang abih bang ană plơi pla thâo hluh hăng ngă tui djơ̆, hră pơar khom djop, hyu mă akan hơdang anăm ngă soh glăi pioh kơ Việt Nam ta tañ arăng lui hĭ kak kơñĭ huăi kom sĭ mơdrô mơnong akan hơdang truh pơ tač rơngiao hơmâo boh tŭ yua kơ ta mơ̆n”.

Ăt kah hăng lu sang anŏ mă akan hơdang pơkŏn mơ̆n, mơnuih mă akan Nguyễn Hữu Kính, grup 3, Bãi Xếp, phường Quy Nhơn Nam hơmâo tong ten hăng bruă ia rơsĭ, tui anun yơh bruă ngă tui djơ̆ tơlơi phiăn ƀu kơnong bĕ hĭ anăm brơi arăng bơtơhmal đôč ôh, dŏ jing bruă ngă pơgang ba ta pô hăng pơgang kơ bruă bơwih ƀong huă kơ sang anŏ sui thun.

“Ƀing gơmơi dưi hơmâo Puih kơđông tơhan pơgang guai dêh čar ƀơi amăng jang djru pơtô brơi tơlơi phiăn, ngă tui djop tơlơi pơtrun hyu amăng ia rơsĭ, kiăng mơnuih ƀôn sang thâo hluh hăng ngă tui djơ̆, ƀu ngă soh tơlơi pơkă. Mơ̆ng djop ƀattô đĭ hyu brơi ngă tui djơ̆ tơlơi phiăn hơmâo pơtô brơi laih. Bơni kơ tơhan pơgang guai dêh čar djru ba gơmơi kiăng thâo hluh hơdôm tơlơi pơtrun hrŏm pioh gơmơi ngă tui”.

Đại uý Lê Văn Hòa, Khua sang bruă ĕp lăng mơ̆ng tơhan pơgang guai dêh čar Mũi Tấn brơi thâo, pơ anăp anai Hră pơtrun 246 mơ̆ng kơnuk kơna pơkă, hơdră bơtơhmal tơlơi soh khom đŭ prăk amăng bruă hyu mă akan hơdang dưi ngă tui sit nik pơhrua kơ Hră pơtrun hlâo kơ anun. Yua kơ anun, ƀing tơhan khom duăi hyu sem re se, djru pơtô lăi kơ mơnuih ƀôn sang lơ̆m ngă hră brơi ƀattô dưi nao hăng glăi jưh.

“Hăng tơlơi pơtrun phrâo kơ bruă đŭ bơtơhmal tơlơi soh hăng IUU lĕ anom bruă gơmơi pok pơhai brơi hyu pơtô lăi pơtum mơnuih ƀôn sang mă akan tơdơi kơ gơñu glăi mơ̆ng hyu amăng ia rơsĭ, pơtum ƀơi tơdrun pŭ đĭ akan pơ ahng. Hăng ƀing ngă soh glăi lĕ amra pơsir tơpă, khut khăt tui tơlơi phiăn pơkă, laih dơ̆ng lăi pơthâo gong gai kơnuk kơna plơi pla ăt thâo mơ̆n tơlơi soh hăng wai lăng mơnuih ƀôn sang ngă soh kiăng tañ lui hĭ kak kơñĭ kơ Việt Nam”.

Bơ hăng Puih kơđông tơhan pơgang guai dêh čar amăng jang tơdrun kompan Quy Nhơn, sang bruă ƀu kơnong hyu pơtô lăi ƀơi tơdrun mă akan, anih jưh ƀattô đôč ôh, dŏ pơphun lu mông bưp, pơtum glăi ană plơi, lăi pơthâo tơlơi phiăn pơkă ƀơi djop plơi pla mơnuih ƀôn sang mă akan hơdang. Boh yom phun lăi nao hơdôm tơlơi pơkă bruă bơtơhmal tơlơi soh đŭ prăk hăng hơdră bơtơhmal pơhrua nao hơdôm tơlơi soh hơmâo čih pơthâo amăng hră pơtrun 246 phrâo hloh. Trung tá Vũ Đức Tuệ, Khua puih kơđông tơhan pơgang guai dêh čả amăng jang tơdrun kompan Quy Nhơn brơi thâo:

“Tơdơi kơ rim wơ̆t pôr pơthâo tơlơi pơhing amra djru mơnuih ƀôn sang mă akan hơdang thâo hluh tơlơi phiăn pơkă, mơ̆ng anun pơđĭ tui tơlơi thâo hluh ngă tui djơ̆ tơlơi pơtô hăng lăi pơthâo glăi kơ mơnuih amăng sang anŏ thâo ngă tui. Kơnang kơ hip hră tơlơi pơhing điện tử, jing plang tơlơi pơhing mơnuih mơnam amăng internet, gru kơnăl QR ƀing gơmơi hơmâo mơ-it nao kơ djop pô hơmâo măi telephôn rơgơi ƀuh tơlơi pơtô, kơnong pơmut tui gru QR kiăng thâo gơmơi pơtong glăi, pơsir brơi kơ mơnuih ƀôn sang djơ̆ tơlơi phiăn”.

Gia Lai ră anai hơmâo 3.147 boh ƀattô amăng mrô 3.152 boh ƀattô hyu mă akan hơmâo dưi truă măi tơlơi pơhing, pơhiăp nao rai, lăi pơthâo anih đuăi hyu pioh krăp lăng sŭ mơ̆ng ataih.

Ơi Nguyễn Anh Dũng, Kơ-iăng khua anom bruă wai lăng Tơdrun kompan mă akan tơring čar Gia Lai, brơi thâo, bruă hyu pơtô lăi dưi pơphun na nao, dơ̆ng mơ̆ng bruă ƀattô prăp či trun nao amăng ia rơsĭ pơ ataih, truh hrơi ƀattô anun glăi jưh. Yua kơ anun, mơnuih ƀôn sang hyu mă akan hơdang hơmâo prăp lui bruă či ngă hră pơar djơ̆ tơlơi phiăn hyu mă akan amăng ia rơsĭ, boh nik ñu tơlơi pơtrun brơi djơ̆ anăm soh glăi tơlơi pơtrun IUU.

“Laih sa rơwư̆ pok pơhai brơi mơnuih ƀôn sang thâo hluh tơlơi pơtrun IUU anun yơh glăi pơ anih jưh tơdrun kompan lêng kơ ngă djơ̆ soh, mă bruă amuñ, hyu mă akan hơdong huăi soh glăi ôh. Truh ră  anai, abih bang ƀattô song nan prong ngă tui djơ̆, hrơi blan pơ anăp ăt gir run ngă hrŏm djop sang bruă pơtô brơi bruă čih pioh hơdrôm hră điện tử kiăng mơnuih ƀôn sang lăi pơthâo pơhaih tong ten amăng bruă ba yua mrô hăng djơ̆ jơlan hơdră tơring čar pơkă”.

Hră pơtrun 246/2026/NĐ-CP amra ngă tui sit nik mơ̆ng kơnôl 18/8. Bruă kơtưn hyu pơtô lăi, ĕp lăng hăng pơsir tơlơi ngă soh, dưi hơmâo tơhan djop sang bruă kơnuk kơna pơtong glăi jing hơdră yom biă kiăng pơđĭ tui tơlơi thâo hluh kơ mơnuih ƀôn sang ngă tui tơlơi phiăn kơnuk kơna, pioh kơ mơnuih mă akan hơdang, pơgăn hĭ bruă ngă soh tơlơi pơtrun IUU, djru hrŏm amăng dêh čar pơsir hĭ tañ arăng ruh lui kak kơñi ngă soh glăi yua Jơnum min kual Mi kô̆ kom kơ anom bruă akan hơdang Việt Nam.