Kơčăo bruă anai, rơnoh prăk tuh pơ alin rơbêh 1.516 klai prăk, dưi pơdong ƀơi 7 boh să ter guai dêh čar kah hăng Ia Mơ, Ia Puč, Ia Pnôn, Ia Nan, Ia Dom, Ia Čiă hăng Ia O. Truh akŏ blan 6, kơčăo bruă anai, hơmâo ngă giong ha mơkrah rơnoh jao man pơdong. Khă hnun, abih 7 boh sang hră anai ăt kaih năng ai 1 blan tui hăng anŏ pơkă.

Khul git gai bruă mă man pơdong ƀơi tơring čar Gia Lai rơkâo, mơ̆ng ră anai truh abih lơ 30/8, djop sang bruă ngă hrŏm khom pơphun tal kơtưn mă bruă hrơi mlam, jŭ yap, sem glăi, rim tơhnal pơkă, mơnuih mă bruă, pơhrua nao lu hloh, ba nao măi mok djru man pơdong kiăng ngă djơ̆ hrơi blan pơkă, jao glăi ring bruă sang hră amăng thun hrăm phrâo pơ anăp. Djop sang bruă pô kač rup man pơdong, ming pơkra, lăi pơthâo khom sem lăng re se tong ten, ĕp lăng ƀơi anăp, pơtong rơđah hnơ̆ng kơjăp, anŏ rơnuk rơnua bruă ming pơkra, ƀu ngă tơnap, pơgô̆ mă bruă ôh mơ̆ ngă bơbeč djơ̆ anŏ kơjăp, hiam klă kơ ring bruă anai.