Jơnum min mơnuih ƀôn sang tơring čar Gia Lai hơmâo hră pơtrun kiăng ngă tui tơlơi git gai mơng Kơnuk kơna ruh hĭ sang tơ̆i rơ̆i, pơhlôm brơi sang dŏ rơnuk rơnua hăng hơđong. Tơring čar ba tơbiă hơnong pơkă ruh hĭ rơbêh 3.000 boh sang tơ̆i rơ̆i brơi hơdôm boh sang anŏ djru hơkrŭ, sang anŏ ƀun rin, giăm ƀun rin. Hơnong pơkă pơgiong hlâo kơ blan 9 thun 2025. Tui gơnong bruă mă-tơhan rơka hăng mơnuih mơnam tơring čar Gia Lai, mơng thun 2021 truh ră anai, tơring čar hơmâo djru man pơdong phrâo hăng pơkra ming 4.365 boh sang hăng abih tih prăk mă yua rơbêh 234 klai prăk. Samơ̆, tui hơduah ĕp phrâo hloh brơi ƀuh, tơring čar ăt dŏ rơbêh 3.000 boh sang anŏ ƀun rin, giăm ƀun rin hăng mơnuih djru hơkrŭ kiăng djru man pơdong sang phrâo ƀudah pơkra ming.

Kiăng pơtrut tañ bruă anai, Jơnum min mơnuih ƀôn sang tơring čar hơmâo jao gơnong bruă mă-tơhan rơka hăng mơnuih mơnam git gai gum hrŏm hăng hơdôm gơnong bruă, sang bruă bơdjơ̆ nao pơjing akŏ bruă tong ten, pơhlôm brơi djơ̆ mơnuih hăng anăm brơi bơdjơ̆ hrŏm hăng jơlan hơdră pơkŏn. Laih dong, gơnong bruă man pơdong gơgrong pơkra lăng tlâo rup sang kiăng man pơdong lăp djơ̆ hăng phiăn juăt amăng ƀon lan, lăp djơ̆ hăng hơnong pơkă boh thâo hăng pơhlôm djop prăk mă yua kiăng mơnuih ƀôn sang amuñ ruah mă.