Ngă tui hơdră mă bruă mơ̆ng Khul apăn bruă ping gah plơi prong Plei Ku tal XII “Kơ bruă pơtrut kơtang pơhrŏ ƀun rin hơđong kjăp, pơđĭ tui boh tŭ yua amăng tơlơi hơdip mơda mơnuih ƀôn sang, biă mă ñu ƀơi djop plơi pla mơnuih ƀôn sang djuai ƀiă amăng plơi prong”, mơ̆ng thun 2021 truh ră anai, plơi prong hơmâo ngă hrŏm hăng djop sang bruă, anom bruă, jơnum min mơnuih ƀôn sang djop să, phường jak iâu sang bruă bơwih ƀong sĭ mơdrô, sang anŏ mơnuih ƀôn sang pơdrong čơmah, djru hrŏm “Keh prăk yua mơnuih ƀun rin plơi prong” laih anun mơ̆ng mơnuih mơnam ƀơi să djru 95 boh sang anŏ man pơdong sang phrâo hăng ming pơkra glăi sang dŏ tơ̆i, răm hăng abih tih rơnoh prăk truh 4 klai 700 klăk prăk; djru phun pla, hơbâo, kmơ̆k pruai, prăk čan mă bruă 1 klai 200 klăk; djru 252 boh sang anŏ ƀun rin, giăm ƀun rin, phrâo pơklaih ƀun rin dưi čan hăng prăk kơmlai ƀiă abih tih rơnoh prăk 13 klai 800 klăk prăk. Ơi Trần Tấn Quang.

Khua anom wai lăng bơwih ƀong huă plơi prong Plei Ku, brơi thâo, mrô sang anŏ ƀun rin ƀơi plơi prong trun dŏ 0,24%, abih bang jŭ yap hơmâo 149 boh sang anŏ. Plơi prong ăt hlăk kơsem min, pok pơhai lu hơbô̆ bruă bơwih ƀong huă gêh găl tŭ yua hloh kơ bruă anai.