Amăng mông pơphun, Khua mua tơring čar Gia Lai hrŏm hăng khua mua anom bruă git gai ling tơhan tơring čar Gia Lai hơmâo mơ-it tơlơi tơña blan, pơ alum pran jua ƀing tơhan nao mă bruă tal anai. Grup K52 kiăng thâo tong ten tơlơi pơkă amăng tơlơi rô nao rai jar kmar, ngă tui djơ̆ tơlơi pơkă ling tơhan, hơdôm tơlơi pơkă mơng Ding jum ling tơhan, mơng Quân khu amăng tơlơi rô nao rai hăng tač rơngiao.

Thâo tong ten anih nao pel ĕp, hơdôm tơlơi pơhing bơdjơ̆ nao anih dor tơhan djai pơsăn drơi ƀơi anih ƀing gơñu jao nao ĕp, pơhlôm hơdôm tơlơi pơhing anai lêng hơmâo pel ĕp hlâo, pơsit tong. Anai lĕ tal 23 Grup K52 nao mă bruă pơ dêh čar Kur. Truh ră anai, Grup K52 hơmâo ĕp ƀuh, klơi ba glăi 1.468 per tơlang tơleh tơhan djai pơsăn drơi, tơhan djru blah wang hăng ƀing rơgơi kơhnâo Việt Nam djai amăng rơnuk blah wang ƀơi dêh čar Kur.