Lơ 21/10, Jơnum min djop djuai ania mơnuih mơnam Việt Nam tơring čar Gia Lai pơphun Jơnum pơpŭ Khua Jơnum min djop djuai ania mơnuih mơnam gưl să hăng Khua khul jơnum min djop djuai ania mơnuih mơnam ba gru tơring čar Gia Lai rơwang thun 2017-2022. Gia Lai hơmâo 220 Khua Jơnum min djop djuai ania mơnuih mơnam Việt Nam gưl să hăng 1.576 Khua khul Jơnum min djop djuai ania mơnuih mơnam.

Mông jơnum

Kiăng kơ ngă tui pran gơgrong gum djru mơnuih mơnam, amăng 5 thun laih rơgao, ƀing mơnuih apăn bruă lêng kơ gir gum hrŏm hăng hơdôm gơnong bruă, anom bruă hyu pơtô pơblang, pơtrut pơsur mơnuih ƀon sang gum pơgôp, gum djru, pơgôp prăk djru man pơdong sang, djru brơi sang anŏ ƀun rin, pơyơr lŏn man pơkra jơlan glông amăng plơi pla phrâo; pơtô pơblang, pơsur mơnuih djuai ania ƀiă pơplih tơlơi pơmĭn, bruă mă kiăng pơklaih mơng ƀun rin hơđong kjăp. Lu mơnuih apăn bruă hơmâo hơbô̆ bruă klă, thâo pơčeh phrâo, tŭ yua amăng pơtô pơblang, pơtrut pơsur, jak iâu abih bang mơnuih ngă tui pran kơtang amăng gum pơgôp djop djuai ania. Ƀrô tal anai, Jơnum min mơnuih ƀon sang tơring čar tơring čar Gia Lai hăng Jơnum min djop djuai ania mơnuih mơnam Việt Nam tơring čar Gia Lai hơmâo jao hră pơpŭ brơi 92 čô mơnuih apăn bruă thâo rơgơi.