VOV4.Jarai - Hơdôm thun rơgao, yua hơmâo prăk brơi čan mă kơmlai aset, rơbêh 225.000 wơ̆t boh sang anŏ rin, giăm run hăng ƀing hơmâo anăn kơnuk kơna djru ƀơi tơring čar Gia Lai hơmâo gơnam pioh pơđĭ kyar ngă hmua pla pơjing, gan rơgao tơlơi tơnap tap, rin rơpa. Prăk brơi čan jing tơlơi kơnang, djru kơ mơnuih ƀun rin hơđong tơlơi hơdip.

Sang anŏ ayong Rčom Tích, jing sa amăng hơdôm boh sang ƀơi plơi Lung Prong, să Ia Kriêng, tơring glông Đức Cơ pơplih tơlơi hơdip tơdơi kơ hơmâo prăk čan. Blung a sang anŏ tơnap biă mă, sang dŏ ƀu hơmâo mơn, sang anŏ gơñu jing huăi rin tơpa dong, tah, pơkra glăi sang dŏ hiam hloh. Ayong Rčom Tích lăi nao anŏ klă mơng prăk kơnuk kơna brơi ñu čan:

“Mơng hrơi hơmâo sang bruă prăk djru mơnuih tơnap brơi čan prăk, sang anŏ gơmơi plai laih tơnap amăng bruă mă, pla boh ñông hăng kơphê. Lơ̆m aka ƀu hơmâo prăk čan, gơmơi tơnap biă mă, amăng thun 2017 kâo pla kơphê, tơdơi kơ anun pla boh ñông, bơwih ƀong hơđong tui laih”.

Prăk čan mă kơmlai ƀiă, lu sang anŏ mơnuih djuai ƀiă ƀơi Gia Lai huăi rin dong tah.

Amai Kpă H’Nen, dŏ ƀơi thôn 9, tơring kual Phú Thiện, lơ̆m trun dŏ hơjăn lĕ amĭ ama ñu brơi tui 5 sao hmua ia. Yua hmua anet đơi, mah rơkơi bơnai ñu gir ngă bruă laih samơ̆ ăt dŏ kơƀah mơn, hơmâo hơdôm pă ƀong hơdôm anun đôč yơh. Yua hơmâo tơlơi djru ba mơng adơi ayong, kơnung djuai, hơmâo gong gai plơi pla djru ba, ñu hơmâo čan 30 klăk prăk mơng Sang bruă prăk djru mơnuih mơnam tơring glông, ñu blơi thim đang, pla hơbơi plum dong. Amai Kpă H’Nen brơi thâo, truh ră anai sang anŏ ñu kla hnưh ƀiă abih laih, tơlơi hơdip dơnap tui mơn.

“Hlâo adih sang anŏ H’Nen tơnap biă, lơ̆m kâo hơmâo čan prăk mơng kơnuk kơna ta, kâo lăng tơlơi hơdip pơplih laih, dơnap hloh kơ mơng hlâo laih”.

Tui hăng Sang bruă prăk djru mơnuih mơnam tơring čar Gia Lai, anom bruă hơmâo ngă 17 jơlan hơdră brơi čan, hăng mrô prăk brơi čan truh 16.800 klai prăk, brơi čan truh pơ blan 9 giăm 5.800 klai prăk, hơmâo năng ai 400 rơbâo wơ̆t sang anŏ čan pioh ngă hmua pơkra gơnam, djru ngă tui jơlan hơdră dêh čar pơhrŏ trun sang anŏ rin, man pơdong plơi pla phrâo ƀơi anai. Ơi Lê Văn Trí, Khua sang bruă prăk djru mơnuih mơnam tơring čar Gia Lai brơi thâo, amăng hrơi blan pơ anăp, anom bruă pơhlôm 100% mrô sang anŏ rin hăng sang anŏ hơmâo anăn kơnuk kơna djru hơđăp dưi čan prăk mơng kơnuk kơna, kiăo tui jơlan ngă bruă mơng tơring čar kơ pơplih phrâo tơlơi bơwih ƀong hăng man pơdong plơi pla phrâo.        

“Amăng 20 thun pơphun ngă tui Tơlơi pơtrun mrô 78 hơmâo pơsit hơdră ngă bruă hăng wai lăng prăk čan klă laih. Sang bruă prăk djru mơnuih tơnap tơring čar Gia Lai amra ngă hrŏm hăng hơdôm gơnong bruă, khul grup brơi prăk čan djơ̆ hăng pô dưi čan, pơƀut wai lăng prăk brơi čan, lăi pơthâo brơi hơdôm boh sang anŏ čan prăk pioh ngă hmua, bơwih ƀong, djru brơi sang anŏ rin hăng sang anŏ hơmâo anăn kơnuk kơna djru pơkŏn dong pơđĭ kyar bơwih ƀong, hơđong tơlơi hơdip hăng hrưn đĭ tơbiă đuăi mơng tơlơi rin rơpa”.

Ră anai, Gia Lai hơmâo 91 boh să plơi pla phrâo, samơ̆ rơbêh 46% mrô mơnuih lĕ djuai ania ƀiă, tơlơi hơdip, tơlơi bơwih ƀong dŏ lu tơlơi tơnap. Hăng tơlơi anun, prăk brơi čan ăt jing tơlơi kơnang, djru brơi hơdôm boh plơi gir ngă bruă. Hơdôm khul grup hơmâo kơnuk kơna jao ngă bruă, ƀu kơnong ba prăk čan truh pơ tơngan pô kiăng djru đôč ôh mơ̆ ăt djru brơi ană plơi thâo hơdră ngă bruă, bơlăi nao rai kiăng dưi hrưn đĭ./.

Hoàng qui: Čih - Siu H’Mai: Pơblang