VOV4.Jarai - Jơnum min mơnuih ƀôn sang tơring čar Gialai phrâo mă yua Kơčăo bruă pok pơhai ngă tui Tơlơi pơtrun pơsit mrô 23 mơng Kơnuk kơna lơ 2/3/2022 mơng Kơnuk kơna kơ pơđĭ kyar bơwih ƀong kual guai dêh čar lŏn drŏn ƀơi tơring čar. Tơring čar Gialai hmâo 90km jơlan guai dêh čar giăm hăng tơring čar Ratanakiri, dêh čar Kur. Kual guai lŏn ia mơng tơring čar ră anai hmâo 7 bôh să mơng 3 bôh tơring glông guai dêh čar, hăng abih bang mrô mơnuih giăm truh 50.000 čô mơnuih gah 20 djuai ania adơi ayong dô̆ hơdip mơda. Kiăng pok pơhai bruă mă kiăng pơhlôm hơdôm tơhnal ba tơbiă hmâo ba tơbiă amăng Tơlơi pơtrun pơsit mrô 23 mơng Kơnuk kơna, Jơnum min mơnuih ƀôn sang tơring čar rơkâo hơdôm gơnong bruă, tơring glông, plơi prong đing nao pơdŏng hơdôm jơlan pơsir kiăng ngă tui tơhnal pơkă mơng kơčăo bruă anai hrom hăng anun lăi pơhing hyu djop bôh yôm Tơlơi pơtrun pơsit mơng Kơnuk kơna; kơtưn bruă lăi pơhing ngă tui hơdôm mơta hră phiăn kơ guai lŏn ia mơ̆ kơnuk kơna dua bôh dêh čar Việt Nam hăng Kur hmâo kĭ pơkôl./.

Siu H’ Prăk: Pơblang