VOV4.Jarai - Mơguah lơ 7/10, ƀơi plơi prong An Khê, Ping gah tơring čar, Khul pơ ala mơnuih ƀôn sang, Jơnum min mơnuih ƀôn sang, Jơnum min djop djuai ania mơnuih mơnam dêh čar Việt Nam plơi prong An Khê pơphun ngă Lơphet jôk atâo, lăi pơthâo hăng ba nao dor tơlang tơleng 19 čô ling tơhan pơsăn drơi yua kơ Grŭp K52 - Ƀirô git gai Khul ling tơhan tơring čar Gialai phrâo hyu hơduah ĕp, tum pơƀut.

Gialai lăi pơthâo, ba nao dor tơlang tơleh 19 čô ling tơhan pơsăn drơi

Kiăo tui anun, amăng blan 8 hăng blan 9 phrâo rơgao, ƀing apăn bruă tơhan, ling tơhan grŭp K52 tơring čar Gialai gum hrom hăng hơdôm bôh anom pơsit tơlơi pơhing mơng hơdôm ling tơhan hơđăp hăng mơnuih ƀôn sang lăi pơthâo kơ pơsat Ling tơhan pơsăn drơi ƀơi tơring glông Đak Pơ hăng plơi prong An Khê. Mơng anun, ƀing ling tơhan K52 hmâo ĕp ƀuh tơlang tơleh 18 čô ling tơhan ƀơi plơi prong An Khê, tơlang tơleh sa čô ling tơhan ƀơi tơring glông Đak Pơ. Hrom hăng anun, hơdôm gơnam ĕp ƀuh kah hăng: bôh nut ao, jao, jep kơ su, mong huă asơi./.

VOV.TN čih

Siu H’ Prăk pơblang