VOV4.Jarai - Čơtlăm lơ 9/9, Jơnum min mơnuih ƀôn sang tơring čar Gialai pơphun klah čun 20 thun pok pơhai ngă tui bruă brơi čan prăk gah hơdră bruă mơnuih mơnam pioh kơ mơnuih ƀun rin hăng mơnuih gah hơdră bruă gum djru pơkon tui Tơlơi pơtrun pơkă 78 mơng Kơnuk kơna.

Ngă tui tơlơi Pơtrun pơkă 78 mơng Kơnuk kơna, 20 thun rơgao, hơdôm bôh sang prăk gah hơdră bruă hmâo laih ƀơi abih bang plơi pla, khul grŭp kual ƀon ƀut mơnuih ƀôn sang amăng tơring čar Gialai hăng 220 bôh anom bơwih hră pơ-ar, rơbêh kơ 3.300 Grŭp pơkrem prăk hăng čan prăk, djru brơi rơbêh kơ 225.000 bôh sang anô̆ ƀun rin, sang anô̆ ƀun rin ƀơƀiă hrưn đĭ tơtlaih mơng ƀun rin kơjăp phik. Hmâo laih rơbêh kơ 783.500 wot čô mơnuih gah hơdră bruă čan mă kơmlai ƀiă pơđĭ kyar bơwih ƀong; 63.000 čô čơđai sang hră, ƀing hrăm gưl dlông tơnap tap dưi čan hrăm hră; djru pơdŏng 14.000 bôh sang dô̆ kơ sang anô̆ ƀun rin, pơdŏng 212.000 ring bruă ia yua hăng ring bruă agaih rơnăk anih anom dô̆. Rơwang 2021-2025, tơring čar Gialai rơkâo hơdôm bôh anom bơdjơ̆ nao pok pơhai ba glăi bôh tŭ yua dong prăk čan mă kơmlai ƀiă nao hrom hăng hơdôm jơlan gah pơkă mơng tơring čar kơ pơplih hơdră bơwih ƀong, pơdŏng plơi pla phrâo./.

Siu H’ Prăk: Pơblang