Tơdơi kơ sa blan pok pơhai ngă tui sa blan mă bruă pơtum hloh, abih amăng glông bruă Khul hơmâo iâu pơčruh pơhrui glăi 762 klai prăk, dưi ngă 152% tơhnal pơkă, djru ba giăm 579 rơbâo čô mơnuih tơnap tap, ƀu hơmâo anih ưh kơnang amăng đơ đam dêh čar.

Dơ̆ng mơ̆ng hrơi jơnum ngă yang iâu pơphun bruă mă gưl dêh čar ƀơi Hà Nội, guang tơngan kuar mă djru tơlơi khăp pap hơmâo ngă bang bơngač prong hloh djop djang anih dưi pơtruh nao rai pơdah online pơƀuh ƀô̆ mơta lăng nao rai amăng tivi truh hăng 3000 anih pơdah ƀô̆ ƀơi plơi pla hăng anih anom ngă bruă hiam “Ƀôn lan djru tơlơi khăp pap-Pơtruh nao rai tơlơi khăp” ƀơi tơring čar Tuyên Quang, Nghệ An, An Giang. Hơbô̆ bruă anăn “Ƀôn lan djru tơlơi khăp pap-Pơtruh nao rai tơlơi khăp” ƀơi klâo boh tơring čar hơmâo pok pơhai pơhrui glăi rơbêh 4,4 klai prăk, man pơdong sang Khul ia jrao kyâo bơrơkal mriah, djru čơđai sang hră hăng sang anŏ ƀun rin. Hrŏm hăng anun, 1.750 anung gơnam rơnoh prăk 3,5 klai ăt djru ba hyu tơña bla mơnuih ƀôn sang bơbeč truh lŏn adai ngă hăng sang anŏ tơnap tap ƀun rin biă mă. Hơdôm boh tơhnal ngă bruă mơ̆ng Sa blan Khăp pap thun 2026 ƀuh rơđah pran jua thâo gum pơgôp, pơdjru nao rai, tui gru grua mơ̆ng đưm hiam klă hơmâo ngă hla hnil pơgang ba hla tơ̆i djuai ania ta./