Na nao 12 thun, Sang hră đom lom djop djuai ania ƀiă tơring čar Gia Lai hmâo mrô čơđai hmâo mă ƀăng gưl 3, Khua Sang hră Võ Thành Nguyên brơi thâo, mơ̆ng akô̆ rim thun hrăm, sang hră hmâo gơgrong hlâo pơjing kơčăo bruă hrăm glăi lăp djơ̆ pioh pơplông. Ƀơi Sang hră gưl 3 Đinh Tiên Hoàng, tơring glông Krông Pa, anih hmâo 99% mrô čơđai lĕ djuai ania ƀiă, ƀing čơđai ăt dưi pơpha jing grŭp lăp djơ̆ bôh thâo pioh hrăm glăi kơ bruă pơplông.

Tal pơplông mă ƀăng gưl 3 lŏn ia thun anai ƀơi tơring čar Gia Lai hmâo 41 bôh anih anom pơplông hăng rơbêh kơ 15.300 čô čơđai ngă hră pơplông, amăng anun hmâo giăm truh 4100 čô čơđai djuai ania ƀiă. Tơlơi gơgrong hlâo mơ̆ng sang hră, hơdôm tơlơi wai lăng kơjăp mơ̆ng nai pơtô amra djru čơđai sang hră phing kơ pran jua mut pơplông ba glăi bôh tơhnal prong hloh./.