VOV4.Jarai - Dưi hmâo Ping gah, Kơnuk kơna lăng ba, hơdôm tal ƀat tô pơgiăng gơnam tam, gơnam Tết glăi nao pơ̆ tơring glông Trường Sa dong rim tal rơnuč thun, kiăng khul ling tơhan, mơnuih ƀôn sang ƀơi anai hmâo Tết pơhlôm djop, ba mơngơi mơng plơi pla, tơlơi pơđao mơng lŏn drŏn. Ƀơi jơlan anun, hmâo lu tơlơi lông, tơlơi hling hlang. Rơgao tơlơi čih “Jơlan nao pơ̆ Trường Sa: Ƀơi ƀat tô pơgiăng bơyan bơnga”, pô hyu mă tơlơi pơhing phrâo Gong phun jua pơhiăp dêh čar Việt Nam amra djru ƀing ta thâo hluh rơđah hloh kơ jơlan ƀơi ia rơsĭ kiăng dưi nao truh kual lŏn hling hlang, anih phun hmâo angin mơng lŏn ia:

Tơdơi mơng lŏn drŏn nao, ƀat tô Trường Sa 571 gah khul ling tơhan 411, lữ đoàn 955 mơng tơdrun tum păn Cam Ranh ba grŭp hyu mă bruă mơng ƀing gơmơi nao hơ-ư̆č hmưi Tết ling tơhan hăng mơnuih ƀôn sang hơdôm anih anom ƀơi bul ia rơsĭ Trường Sa. Ƀat tô djă ba jua pơhiăp ơ-or, hơdôm tơngan wŏt đơhơ đơhet hăng pran jua mơng lŏn drŏn mơ-ĭt kơ bul ia rơsĭ mơng lŏn ia. Jai đuăi ataih mơng kual lŏn, jua ia rơsĭ pah pung kơtang tui, tơlơi pơhiăp tlao ƀiă tui, hơdôm tal măt ƀat tô kah hăng phun kyâu rơbuh blua amăngƀat tô. Rơnuč thun, ia rơsĭ tơglăk lu hăng angin kơtang; lu mơnuih amăng grŭp hyu mă bruă ƀing gơmơi ƀu bĕ huing huang, hyơ hyor amăng drơi jăn. Ƀu hmâo lu mơnuih thâo, măt ƀat tô ƀu thâo krăn mơnuih hmâo pran hăng mơnuih ƀu ai buai ôh; hlơi đĭ ƀat tô lu wot ƀudah ƀiă đĭ ƀat tô. Tơl mơng grŭp bơwih kơ asơi ia ƀing hlăk ai, suaih pral hăng dưi ruah tŏng ten hai hlâo kơ nao, ăt ƀu tlaih mơn. Tui anun mơn rim hrơi tui anun, sit truh mông ƀong huă 4 wot, ha rơtuh anung asơi dưi hmâo grŭp bơwih brơi, pơhlôm jơman ƀong huă hmâo pran. Pô čih tơlơi pơhing phrâo Đức Thu mơng hră pơhing phrâo Hải Quân lăi pơthâo:

“Tal nao anai ƀing gơmơi bưp ia rơsĭ pah pung kơtang, anun abih bang hlơi hlơi leng kơ glêh hlăk hluai yua kơ ia tơglăk, ƀu mơhao ƀong huă hơget ôh samơ̆ lăng ƀuh tơlơi glêh glar mơng ƀing adơi ayong djă ƀat tô ƀing gơmơi kah hăng tŭ mă dong pran jua kơtang ƀơi jơlan nao pơ̆ Trường Sa”.

Kiăng pơhlôm hơdôm mông ƀong huă jơman, bruă tơnă hơbai ƀơi ƀat tô amăng mông ia rơsĭ tơglăk ƀu amuñ ôh. Hơdôm bôh gŏ mŏ amăng anih dưm ñu bơyan anai khom kă hĭ ñu kơjăp ƀơi hơdôm hnua kyâu kiăng kơ plai ƀiă yuh yah, tơbor. Đa lĕ bruă djă thong, sĭ tă gơnam tam ăt khom thâo mơn kiăng bĕ djơ̆ tơkai tơngan lom tơnă hơbai. Bơ̆ ayong Trần Nam Giang, pô wai lăng grŭp bơwih brơi kơ tuai ƀơi ƀat tô bruă mă yua gơnam ƀong huă tơnă hơbai ăt khom hmâo hơdră pha ra mơn:

“Hăng tơlơi găn rơgao mă bruă tơnă hơbai amăng ƀat tô nao pơ̆ Trường Sa amăng lu thun mơng pô, kiăng pơhlôm mông ƀong huă jơman hăng tâ̆o klă hloh kơ grŭp, gơnam ƀong ƀing gơmơi amra mă yua tui tơlơi glon añuai, añăm hla rok tañ răm ƀing gơmơi yua hlâo, kiăng pơhlôm anô̆ hơnong jơman ñu; tơdơi kơ anun kah mơng truh hơdôm gơnam ƀong amra dưi djă pioh sui. Anô̆ hơdjă amăng mông ƀong huă amra dưi pơđĭ tui. Lom mă bruă, ƀing gơmơi ăt pơpha tui mông hăng mơnuih mơn, kiăng hmâo mông bơwih brơi kơ grŭp klă hloh”.

Bruă phun mơng ƀat tô 571 lĕ ba grŭp hyu mă bruă nao hơ-ư̆č hmưi tết Trường Sa. Hrom hăng hơdôm mơta gơnam kiăng yua hloh, ƀat tô dô̆ pơgiăng tui than bơnga dar, phun kuâ̆t, hla rơnâo, braih ñar, un, ƀañ mư̆t, kĕo... djă jă mơngưi Tết mơng kual lŏn truh pơ̆ bul ia rơsĭ ataih yaih. Ƀơi ƀat tô nao pơ̆ Trường Sa tal anai dô̆ hmâo lu phun kyâu ƀơk brơi kơ hơdôm bul ia rơsĭ hơkrŭ pơsir kơthel tal 9 phrâo rơgao ngă. Hơdôm gơnam anai dưi hmâo ƀing djă ƀat tô rơnăk tâ̆o klă. Thiếu tá Trần Hữu Hào – Kơ-iăng Khua wai lăng bruă bơwih asơi añăm lữ đoàn 146, kual 4 ling tơhan ia rơsĭ brơi thâo:

“Yua kơ bơbeč mơng ayuh rơ-ŏt, angin kơtang, ia tơglăk prong, grŭp hyu mă bruă hmâo gơgrong hlâo hơdôm khul anung, dưm dăp, pơgăn gơnam tam, mă yua ia ƀlăng amăng ƀat tô pioh pruih kơ phun kyâu huăi djai gliu. Lom ba gơnam mơng ƀat tô truh ƀơi song, mơng song nao pơ̆ bul ia rơsĭ, grŭp hmâo črâo ba ngă klă bruă anung, pơgang, ƀu pioh ia rơsĭ hram mut amăng gơnam tam, pơhlôm klă hơdôm gơnam lom truh tơngan ling tơhan hăng mơnuih ƀôn sang ƀơi bul ia rơsĭ”.

Bơyan ia tơglăk ăt ngă mơn bruă ba grŭp hyu mă bruă hăng gơnam tam mơng ƀat tô nao pơ̆ hơdôm bôh bul ia rơsĭ jing hĭ tơnap tap hloh. Ƀat tô Trường Sa 571 kơnong kơ dưi jưh ƀơi giăm bul ia rơsĭ đôč; bruă ba mơnuih hăng pơgiăng gơnam tơdơi kơ anun lĕ yua song anet. Ia pah pung kơtang, djop mơnuih amăng grŭp trun ƀơi song leng kơ buh ao hơjan; gơnam yua, gơnam tam dưi gôm amăng kơdung nilong juăt yua kơ bruă hyu ƀơi ia rơsĭ kiăng huăi djơ̆ ia rơsĭ. Găn rơgao hơdôm tơlơi tơnap, grŭp hyu mă bruă ƀing gơmơi tŭč rơnuč ăt truh mơn pơ̆ hơdôm anih anom bul ia rơsĭ blung a ƀơi Trường Sa, hăng jao ƀơi tơngan ƀing ling tơhan ia rơsĭ hơdôm gơnam pơhlôm tâ̆o klă hloh. Tơl tơngan čơkă mă hơdôm gơnam mơng kual lŏn, pô mă bruă kơđi čar bul ia rơsĭ Đá Nam Hoàng Kim Lâm ƀu thâo dŏp tah pran jua ol kơdol:

 “Hăng mơnuih apăn bruă ling tơhan ƀơi bul ia rơsĭ, lom dưi čơkă mă hơdôm gơnam mơng kual lŏn mơ-ĭt nao, drơi pô ƀing gơmơi pơđao pran jua hloh, mưn ƀuh kah hăng ƀing gơmơi dưi jê̆ giăm hăng sang anô̆ hloh, hăng plơi pla hloh, amăng hơdôm hrơi dô̆ mă bruă ƀơi bul ia rơsĭ”.

Pran jua ol kơdol mơng ling tơhan hăng mơnuih ƀôn sang ƀơi bul ia rơsĭ Trường Sa lom hmâo mă hơdôm gơnam bơyan bơnga mơng kual lŏn ăt lĕ tơlơi mơ-ak mơng grŭp hyu mă bruă ƀing gơmơi, mơng ƀing djă ƀat tô 571 glăk “pơgiăng bơyan bơnga” nao pơ̆ hơdôm bul ia rơsĭ – anih phun hmâo angin, jua angin hling hlang mơng Lŏn ia./.

            VOV1: Čih – Siu H’ Prăk: Pơblang