Sang anŏ yă Võ Thị Ngọc Nhị lĕ sa amăng hơdôm sang anŏ ba gru amăng să An Bình huăi ƀuh taih amăng sang anŏ, ơi yă amĭ ama hơdip ba gru hiam, ană tơčô lêng kơ săng. Yă Nhị hơmâo tơlơi gum djru abih pran jua mơng rơkơi ñu yua anun ñu hơmâo hrơi mông djru bruă đah kơmơi ƀơi ƀon lan, pơgôp hrŏm hăng đah kơmơi să An Bình bơwih brơi tơlơi hơdip kơ đah kơmơi amăng să. Yă Võ Thị Ngọc Nhị brơi thâo:

“Amăng sang anŏ gơmơi rơkơi lăi bơnai hmư̆, bơnai lăi rơkơi hmư̆, amĭ ama pơtô ană bă hmư̆ tui. Lơm tơbiă hyu gah rơngiao ăt ƀuh hơdôm boh sang anŏ pơkŏn ăt ƀu yâo mơ-ak kar hăng sang anŏ gơmơi. Sang anŏ gơmơi hơdip yâo mơ-ak ăt hơmâo mơnuih jum dar pơpŭ mơn, ăt ngă mơ-ak amăng pran jua. Hrơi kâo dŏ pơ sang, djop mơta bruă amăng sang kâo ngă abih. Bơ hrơi kâo nao jơnum pơƀut jao brơi rơkơi kâo, ñu ăt pioh mông kiăng tơnă hơbai asơi huă añăm ƀong brơi ană bă”.

Kar kăi hăng sang anŏ yă Trần Thị Sạn dŏ amăng să An Bình. Sang anŏ ñu hơdip hăng bruă pla boh trol. Ñu mut hrŏm grup đah kơmơi ƀu hơmâo taih amăng sang anŏ dong mơng hrơi akŏ pơjing truh ră anai. Yă Sạn rơngiao kơ bruă pơhlôm brơi tơlơi hơdip yâo mơ-ak amăng sang anŏ, ñu ăt pơtô ană tơčô thâo luă gŭ kơ amĭ ama, ơi yă, hơdip jê̆ giăm mơ-ak hăng mơnuih jum dar, laih dong pơtô pơblang, pơtrut pơsur ƀing adơi amai amăng grup ngă tui kiăng pơjing sang anŏ ƀu hơmâo taih amăng sang anŏ, hơdip yâo mơ-ak.

“Amăng sang anŏ gơmơi, kâi khŏm pơtô brơi ană bă, rơkơi kâo thâo kơ bruă taih amăng sang anŏ, laih dong bruă mă mơng gơmơi kah dưi pơtrut pơsur adơi amai pơkŏn. Kâo ăt pơtô pơblang kơ bruă pơgang taih amăng sang anŏ. Adơi amai kiăng mut hrŏm pơgang anăm brơi ƀuh tơlơi ngă ƀu hiam amăng sang anŏ”.

Hơbô̆ bruă “Grup đah kơmơi huă taih amăng sang anŏ” ƀơi grup 8, ƀut plơi Thanh Bình, să An Bình, tơring glông Châu Thành hơmâo 21 čô ding kơna. Amăng 8 thun rơgao, hơbô̆ bruă anai ba glăi tŭ yua. Blung a amăng grup hơmâo 3 boh sang anŏ ƀuh taih amăng sang anŏ samơ̆ ƀing adơi amai dŏ mlâo, ƀu khin lăi pơthâo yua anun eñ đôč yơh. Tơdơi kơ hơbô̆ bruă anai akŏ pơjing, mơng mông jơnum pơƀut ƀing adơi amai lêng kơ hluh rơđah kơ bruă pơgang taih amăng sang anŏ anun lĕ: lăi pơthâo brơi adơi amai amăng grup, nao ĕp tơl khul grup đah kơmơi amăng să črâo brơi, nao pơalum pran pran rơkơi anăm dŏ tui ngă dong tah, rơkâo gong gai ƀon lan nao pơgăn. Truh ră anai, grup hơbô̆ bruă “Grup đah kơmơi huăi hơmâo taih amăng sang anŏ” ƀu ƀuh bruă ngă sat amăng sang anŏ dong tah. Hăng amăng hơdôm thun giăm anai, bruă taih amăng sang anŏ amăng să hrŏ trun, huăi ƀuh hơdôm bruă ngă sat kơtang. Yă Huỳnh Thanh Tuyền, Khua khul pơlir hơbit đah kơmơi să An Bình, tơring glông Châu Thành, tơring čar Tây Ninh brơi thâo, mơng hrơi akŏ pơjing truh ră anai, grup đah kơmơi huăi hơmâo taih amăng sang anŏ hơmâo tơlơi đing nao gum djru lu biă mă mơng djop gưl gong gai yua anun bruă taih amăng sang anŏ hơmâo pơgang pơgăn, huăi hơmâo tơlơi ngă sat kơtang dong tah, pơgôp pơđĭ kyar bơwih ƀong mơnuih mơnam, hrưn đĭ tơlơi hơdip mơda amăng sang anŏ:

“Mơng hrơi akŏ pơjing thun 2015 truh ră anai, grup đah kơmơi huăi hơmâo taih amăng sang anŏ să hơmâo črâo brơi adơi amai hrưn đĭ amăng tơlơi pơmĭn hăng thâo hơdip hiam klă amăng sang anŏ, kơplah wah amĭ ama, ơi yă hăng ană tơčô. Mơng anun, ƀing adơi amai thâo ngă tui sit nik, thâo hơdip hiam, luă gŭ kơ mơnuih tha rơman. Hrŏm hăng anun, ƀing adơi amai ăt hơmâo rơkơi gơñu dong yua, djru amăng bruă mă. Pơ anăp anai, grup huăi hơmâo taih amăng sang anŏ amra ngă tui dong hơdôm boh tơhnal hăng hơdră bruă phrâo anun lĕ pơtrut adơi amai amăng grup mut hrŏm pơgôp prăk kak kiăng djru brơi ding kơna amăng grup dưi rông hlô, sĭ mơdrô hăng rơnoh prăk mơng 3 klăk truh pơ 5 klăi prăk”.

Bruă taih amăng sang anŏ lĕ bruă sat amăng mơnuih mơnam, ngă bơngŏt amăng ană mơnuih, ba glăi lu tơlơi sat răm brơi mơnuih ƀon sang, sit biă ñu hăng ƀing đah kơmơi, čơđai. Bruă taih amăng sang anŏ ƀơi sa, dua bit anih aka ƀu hơmâo lu tơlơi pơplih hăng aka ƀu plai ƀiă ôh, sit biă ñu ƀơi kual mơnuih djuai ania ƀiă. Ră anai lĕ hơmâo tơlơi đing nao mơng abih bang mơnuih. Yua anun yơh, hơbô̆ bruă “grup đah kơmơi huăi hơmâo taih amăng sang anŏ” mơng Khul pơlir hơbit đah kơmơi să An Bình, tơring glông Châu Thành, tơring čar Tây Ninh hơmâo akŏ pơjing, kiăng pơgôp pơjing tơlơi hơdip hiam klă, ƀơƀrư̆ pơjing sang anŏ yâo mơ-ak./.