Grup khua mua pơ ala mơnuih ƀôn sang dêh čar tơring čar Gia Lai yua kơ ơi Châu Ngọc Tuấn, Kơ-iăng khua ping gah tơring čar, Khua grup pơ ala mơnuih ƀôn sang dêh čar tơring čar ngă khua khul nao sem lăng bruă mă git gai wai lăng, mă yua kông ngăn, sang bruă kơnuk kơna rơbêh amăng phường Quy Nhơn.

Ră anai, Jơnum min mơnuih ƀôn sang phường Quy Nhơn wai lăng 5 boh sang bruă, abih bang anŏ prong rơhaih lơ̆n mơnai rơbêh 5.757 met karê. Bruă dăp glăi hơdôm boh sang bruă tơdơi kơ dăp glăi, hlăk mă yua djơ̆ găl mơ̆n. Hơmâo 4 amăng mrô 5 boh sang bruă hlăk dŏ ba yua, hơmâo ba yua kơ sang bruă Jơnum min mơnuih ƀôn sang phường hăng hơdôm sang bruă, kiăng hơmâo anih mă bruă hơđong huăi tơ̆i đưn. Giong jŭ yap glăi anăn hră pơar lơ̆n đang sang bruă, kông ngăn kơnuk kơna dŏ lu tơlơi gun ngă tơnap tap. Sa pok hră čih anăn găl tơlơi phiăn, hră pơar lơ̆n tơnah, hră pơkă anŏ găl lơ̆n mơnai aka ƀu djop ôh; mrô rơnoh čih pioh hơmâo tŭ mă mơ̆ng lu anih, lu rơnuk kiăng ngă pơrơđah hloh, jŭ yap rơđah rơđong hăng čih pơmut tañ. Hơdôm sang bruă pơdong sui thun laih, hlăk răm tui, kiăng ming pơkra glăi, lơ̆m anun prăk apah ming pơkra glăi tui hluai rơnoh prăk kah pơpha ba yua amăng sa thun.

Klah čun ƀơi mông jơnum nao sem lăng, Khua grup pơ ala mơnuih ƀôn sang dêh čar tơring čar Gia Lai, ơi Châu Ngọc Tuấn brơi thâo, Gia Lai lĕ sa amăng 12 boh tơring čar, ƀôn prong dưi hơmâo Jơnum min apăn bruă phun pơ ala mơnuih ƀôn sang dêh čar ruah ngă anih či nao pel ĕp bruă mă, ngă tui jơlan hơdră, tơlơi phiăn wai lăng, mă yua kông ngăn sang bruă kơnuk kơna pioh ngă anih mă bruă tơdơi kơ pơmut glăi sang bruă brơi hơbôt. Grup khua mua pơ ala mơnuih ƀôn sang dêh čar tơring čar, rơkâo kơ phường Quy Nhơn ăt khom jŭ yap glăi abih bang sang bruă, lơ̆n đang, kơtưn pel ĕp, krăp lăng bruă mă yua kông ngăn kơnuk kơna. Biă mă ñu kiăng sem glăi hơdôm sang bruă gah gru grua adoh suang, sang jơnum plơi, anăm pơsir hĭ kông ngăn ngă bơbeč djơ̆ anih jơnum, ngui ngor hrŏm amăng plơi pla.

Ƀơi Dak Lak, grup khua mua pơ ala mơnuih ƀôn sang dêh čar tơring čar hơmâo krăp lăng bruă ngă tui jơlan hơdră, tơlơi phiăn anai ƀơi phường Ƀuôn Ma Thuôt. Tơdơi kơ ngă tui gong gai kơnuk kơna dua gưl, jơnum min mơnuih ƀôn sang phường Ƀuôn Ma Thuôt, tơring čar Dak Lak tŭ mă git gai wai lăng 64 boh sang bruă, lơ̆n đang, amăng anun 13 boh sang bruă dŏ rơbêh, aka ƀu ba yua ôh. Bruă pơsir hĭ kông ngăn anai bưp lu tơlơi lông lăng, gun hĭ. Ơi Trịnh Vũ Quang, Khua anom bruă bơwih brơi anom bruă wai lăng kông ngăn kơnuk kơna phường Ƀuôn Ma Thuôt brơi thâo, phường hlăk bưp amăng bruă posit rơnoh brơi apah lơ̆m hră pơtrun mơ̆ng Ding jum prăk kăk hăng Ding jum Man pơdong aka ƀu găl ôh, pơtô brơi ăt phara mơ̆n:

“Tui hăng tơlơi pơtrun mơ̆ng Ding jum Man pơdong pơkă thun blan mă yua kông ngăn soh glăi pơkă hăng hră pơtrun 141 mơ̆ng Ding jum prăk kăk. Bơhmutu, kông ngăn ring bruă mơnuih ƀôn sang mă yua hnơ̆ng 3 jao yua amăng 50 thun, samơ̆ pơtong glăi anŏ răm ƀăm sui thun jing sô laih tui hăng Hră pơtrun mrô 141 mơ̆ng Ding jum prăk kăk kơnong 25 thun đôč. Yua kơ anun, rơnoh pơkă kông ngăn ma yua samơ̆ khom pơhlưh hĭ anŏ sô, dŏ glăi dưi yua ƀiă thun đôč. Yua kơ anun, tơlơi tơnap tap amăng bruă pơtong rơnoh brơi apah yua”.

 Dơ̆ng mơ̆ng tơlơi hơmâo sit nik anun, grup hyu sem lăng mơ̆ng ƀing pơ ala mơnuih ƀôn sang dêh čar pơmin nao sa tơlơi phun aliăng: kiăng pơtong rơđah kông ngăn kơnuk kơna sang bruă dŏ rơbêh jing sa tơlơi kơtrâ̆o amăng bruă git gai wai lăng dram gơnam pioh pơđĭ kyar. Hơdră či tŭ mă kông ngăn dram gơnam sang bruă rơbêh ƀơi djop plơi pla amra jing jơlan hơdră pơsit tơlơi phiăn mă bruă pơanăp anai. Yă Lê Đào An Xuân, Kơ-iăng khua grup pơ ala mơnuih ƀôn sang tơring čar Dak lak čih pioh tơlơi gir run hăng bruă ngă khut khăt mơ̆ng phường Ƀuôn Ma Thuôt hăng hơdôm tơlơi tơnap tap, gun gan laih anun tơlơi rơkâo đĭ mơ̆ng phường, grup čih pioh, pơƀut glăi djop mơta tơlơi hơmâo ƀơi anih nao sem lăng amăng să, phường pơkŏn pioh lăi pơthâo kơ khua mua pơprong pơ ala mơnuih ƀôn sang amăng mông jơnum pơ anăp anai. Bruă wai lăng, mă yua kông ngăn jing sang bruă rơbêh tơdơi kơ pơmut glăi sang bruă kơnuk kơna jing sa tơlơi lu mơnuih đing nao, hlăk dưi hơmâo mơnuih ƀôn sang ruah khua amăng dêh čar đing nao.

“Bruă ba yua kông ngăn, biă mă ñu sang bruă rơbêh tơdơi kơ pơmut glăi lĕ kiăng hơmâo hơdră ngă tui tŭ yua hnun kah huăi phăk phai. Ƀing pơ ala mơnuih ƀôn sang dêh čar amra pơphun krăp lăng prong hloh amăng thun anai hăng bruă ba yua sang bruă rơbêh anun amăng đơ đam dêh čar”.

Găn rơgao bruă hơmâo sit nik ƀơi Gia Lai hăng Dak Lak, hơdôm tơlơi dŏ gun amăng bruă wai lăng kông ngăn sang bruă rơbêh tơdơi kơ dăp glăi ƀuh rơđah laih. Anai jing atur pioh kơ ƀing khua mua pơ ala mơnuih ƀôn sang dêh čar čih pơƀut glăi, rơkâo đĭ ngă pơgiong hĭ tơlơi phiăn, pơgang pioh kông ngăn dram gơnam kơnuk kơna dưi wai lăng tong ten, ba yua djơ̆ lăp, tŭ yua, huăi phăk phai laih anun bơwih brơi klă hloh tơlơi hơdip mơda mơnuih ƀôn sang.