Anom pơgang ba mơnuih mơnam lu mơta bruă tơring čar Gia Lai mơ̆ng sui jing laih anih pơđao pran jua mơ̆ng lu čơđai drit druai, hmâo tơlơi hơdip tơnap. Sa dua čô čơđai juăt laih hăng anih anom anai mơ̆ng hrơi tơkeng rai, lu čơđai pơkon rai pơ̆ anai lơm sang anô̆ hmâo tơlơi pơplih. Adơi Kpuih H' Kiều, lăi pơthâo:

  “Kâo hăng adơi kâo dô̆ ƀơi anai giăm hmâo 7 thun laih. Mơ̆ng hrơi rai pơ̆ anai ƀing nai wai lăng pơtô ba abih pran jua bơwih brơi, bơni kơ ƀing nai ƀơi anom hmâo rông ba laih ƀing gơmơi prong đĭ hăng jing mơnuih”.

Yă Tạ Thị Anh Đào, Khua Anom pơgang ba mơnuih mơnam lu mơta bruă tơring čar Gia Lai, brơi thâo, anom ră anai glăk rông ba rơbêh kơ 60 čô čơđai drit druai hăng čơđai ƀu klă drơi jăn. Ƀing nai pơtô, mơnuih mă bruă leng kơ kiăng khăp, bơwih brơi ƀing čơđai kah hăng mơnuih sa bôh sang anô̆.

 “Rơngiao kơ bruă ngă tui hơdră pơkă mơ̆ng Kơnuk kơna lĕ Tơlơi pơtrun pơkă 20, ƀing čơđai hmâo prăk ƀong huă, prăk blơi yua, sum ao... Hrŏm hăng anun, anom hmâo čơkă mă tơlơi lăng ba, gum djru mơ̆ng hơdôm khul grŭp, mơnuih pioh brơi ƀing čơđai hmâo rơnoh hơdip jai hrơi jai klă hloh. Ngă hiưm hơpă ƀing čơđai ƀơi anom ăt ƀuh lĕ, pô dưi hmâo lăng ba, pơgang ba mơ̆ng mơnuih mơnam”.

Tơlơi pơhing mơ̆ng Gơnong bruă wai lăng mơnuih mă bruă tơhan rơka ruă hăng mơnuih mơnam tơring čar Gia Lai, đơ đam tơring čar ră anai hmâo rơbêh kơ 5000 čô čơđai tơnap tap. Hrŏm hăng anun lĕ lĕ hơdôm rơtuh rơbâo čô čơđai ƀơi hơdôm kual tơnap tap. Hăng tơhnal pơkă pơhlôm tơlơi dưi čơđai muai hăng pơgang hlôm hlâo hmâo arăng ngă sat, hmâo tơlơi truh, rơka ruă, hơdôm gơnong bruă, tơring glông plơi prong hmâo pơphun lu bruă mă pôr pơhing, pơđĭ tui tơlơi pơmin hăng bruă gơgrong mơ̆ng plơi pla mơnuih mơnam. Ơi Phạm Trần Anh, Kơ-iăng Khua Gơnong bruă wai lăng mơnuih mă bruă tơhan rơka ruă hăng mơnuih mơnam tơring čar Gia Lai, lăi:

  “Gia Lai biă ñu ƀơi hơdôm kual asuek, ataih, anih ngui ngor kơ čơđai muai kơƀah biă. Gơnong bruă ăt rơkâo mơn hơdôm khul grŭp amăng hơdôm hrơi pơdơi prong pơphun anih anom ngui ngor kơ ƀing čơđai amăng hơdôm hrơi mông pơdơi sang hră pioh hmâo anih ngui ngor pơhlôm; bĕ hmâo čơđai nao pơ̆ kual ƀu pơhlôm ba truh tơlơi ƀu klă lăp hning rơngôt”.

 Thun hlâo, Keh prăk pơgang ba čơđai muai tơring čar Gia Lai pơsur hmâo laih 3 klai 380 klăk prăk, amăng anun prăk mơta hăng gơnam tam mơ̆ng ƀing thâo tơngia gum djru. Mơ̆ng ngăn rơnoh anai, amăng thun 2023 hăng 6 blan akô̆ thun 2024, Grŭp wai lăng Keh prăk hmâo mă yua laih 2 klai 435 klăk prăk breh pơjrao brơi hơtai bôh kơ 20 čô čơđai tơnap tap, 17 čô čơđai kơƀah tơƀông; brơi 50 bôh rơdêh dang wang kơ čơđai tơnap tap.

Ayong Đỗ Đức Thanh, Kơ-iăng Khua git gai Khul hlăk ai tơring čar Gia Lai, lăi pơthâo, amăng blan mă bruă yua kơ cơđai muai thun anai, hlăk ai amăng tơring čar hmâo jao laih hơdôm rơbâo anung gơnam, hơdôm hơdră bơwih ƀong, pơphun hơdôm jơlan hơdră pơplih djah kơsu mă gơnam, brơi rơdêh dang wang kơ čơđai sang hră ƀun rin yak rơgao tơlơi tơnap, pioh pơsur, pơtrut ƀing čơđai:

“Grŭp mă bruă Khul hlăk ai tơring čar ăt hmâo ba tơbiă mơn tơhnal lĕ, hơdôm khul grŭp hlăk ai čơkă mă prăk djru na nao kơ čơđai muai hmâo tơlơi hơdip tơnap, hmâo hră čih anăn hăng bruă mă rơđah ƀu kơnong kơ hăng gơnam tam, ngăn rơnoh hăng hơdôm anung gơnam ôh mơ̆, dô̆ pơphun hyu čuă tơña bla, pơsur pran jua djru ba ƀing čơđai amăng hrăm hră hăng amăng tơlơi hơdip mơda”.

 Khă hnun hai, hăng anô̆ phara mơ̆ng tơring čar hmâo lu neh wa djuai ania ƀiă, bruă bơwih ƀong dô̆ hmâo lu tơlơi tơnap, khom hmâo tơlơi gir run na nao hăng tơlơi gum tơngan hrŏm mơ̆ng plơi pla mơnuih mơnam amăng bruă bơwih brơi kơ čơđai muai.

Pơgang, bơwih brơi hăng pơtô pơhrăm čơđai muai ră anai jing pơjing khul mơnuih kơjăp mă bruă, bôh than pơjing tơlơi pơđĭ kyar kơjăp sui thun mơ̆ng lŏn ia pơgi kơdih anai. Blan mă bruă yua kơ čơđai muai jing tal pioh hơdôm gưl, gơnong bruă, mơnuih thâo tơngia ƀơi tơring čar pơdah pran jua gơgrong pơgang ba, bơwih brơi hăng pơtô juăt čơđai muai. Gơnong bruă wai lăng mơnuih mă bruă tơhan rơka ruă hăng mơnuih mơnam tơring čar Gia Lai iâo pơthưr hơdôm khul grŭp, mơnuih, anom bơwih ƀong, mơnuih thâo tơngia lăng ba gum tơngan hrŏm djru ngăn rơnoh pioh djru sit nik, ba glăi bôh tơhnal kơ čơđai muai hmâo tơlơi hơdip tơnap, čơđai ƀu hmâo anih kơnang... hluai tui Keh prăk pơgang ba čơđai muai tơring čar Gia Lai. Hăng hơdôm tơlơi gir run mơ̆ng abih bang mơnuih mơnam, čơđai muai hmâo tơlơi hơdip mơda tơnap ƀơi Gia Lai glăk amăng ƀrư̆ dưi bơwih brơi, pơgang hăng hmâo tơlơi hơdip mơda klă hiam hloh./.